ފަނޑިޔާރަކު އަންދާލި ރާއްޖޭގެ ރަސްގެފާނުގެ ވާހަކަ!

ޒަމާނުއްސުރެ ރާއްޖޭގެ އެތެރެ ކޮއިލު ފާހަގަވެފައިވަނީ ހަމަނުޖެހުންތަކުން ފުރިގެންވާ ތަނެއްގެ ގޮތުގައެވެ. ބޮޑުންގެ މެދުގައި އަރައިރުން އޮވެ، އެ އަރައިރުމުގައި ލޭ އޮހޮރުވާ ހިސާބަށް ދާކަމީ ތާރީޚުގެ ސަފްހާތަކުން އެނގިހާމަވާން ހުރި ކަމެކެވެ. މިގޮތުން ގިނަފަހަރަށް މިފަދަ އަރައިރުން ހިނގަނީ ވެރިކަމުގެ ތަޚުތުގެ އާރާއި ބާރު ހޯދުމަށް ކަމުގައިވިޔަސް، ބައެއް ފަހަރު ހައްޤުބަސް ބުނެގެންވެސް މީހުންގެ ލޭ އޮހޮރުވާފައި އެބަހުއްޓެވެ.

މި ބީދައިން ދިވެހި ތާރީޚުގެ ކަޅު ސަފްހާތަކުގެ ތެރެއިން އެނގެން އޮންނަ އެއް ވާހަކައަކީ ފަނޑިޔާރު މަނިކުފާނު ހައްޤުބަސް ވިދާޅުމުން، އެކަމާއި ހިތްޕުޅާ ނުވެގެން ރަސްގެފާނަކު ވަރަށް އަނިޔާވެރިކޮށް އެފަނޑިޔާރު މަރާލި ވާހަކައެވެ. ތާރީހީ ރިވާޔަތްތަކުގައި މި ވާހަކަ އެނގެން އޮންނައިރު، މި ވާހަކައަކީ އަދުލު އިންސާފުގެ ނިޒާމުން ރަސްކަމުގެ ބާރު ދެކެ ބިރުނުގަނެ ދިޔަ ފަހަރުތަކުގެ ތެރެއިން ފަހަރެކެވެ.

މިއީ އައްސުލްތާން ޙާއްޖަ ޙަސަން ސިރީ ރާދަވީރު މަހާރަދުން ނުވަތަ މަޝްހޫރު ހަދި ހަސަން ރަސްގެފާނުގެ ވާހަކައެވެ.

މި ރަސްގެފާނުގެ ދައުރުގެ މެދުތެރެއިން ހައްޖުގެ މަތިވެރި އަޅުކަން އަދާކުރެއްވުމަށް ގަސްދުކުރައްވައިގެން، އެމަނިކުފާނުގެ ދަރިކަލުންނާއި ވެރިކަމުގެ ބޮޑުންގެ މައްޗަށް ވެރިކަން ހިންގުން ދޫކުރައްވައި މައްކާއަށް ވަޑައިގެންނެވިއެވެ. ހައްޖުކުރުމުގެ ނިޔަތުގައި ދަތުރުމަތީގައި ގިނަ ދުވަސްތަކެއް އުޅުއްވުމަށްފަހު، ހައްޖު ކުރައްވައި އެނބުރި މާލެ ވަޑައިގެންނެވީ 70 އެއްހާ ބަބުރު އަޅުން ގޮވައިގެންނެވެ. ބެލެވޭ ގޮތުގައި މިއީ އެފްރިކާ ހިސާބުގެ އަޅުންތަކެކެވެ.

ރަސްގެފާނަށް މިއަޅުންތައް ވެގެންދިޔައީ މާ ހިތްޕުޅާވާ ބަޔަކަށެވެ. ހަދި ހަސަން ރަސްގެފާނު ހެއްދެވި ގޮތަކީ ގަނޑުވަރުގައި ގެންގުޅުއްވާ ދިވެހި ޚާދިމުންގެ ބަދަލުގައި މި އެފްރިކާގެ އަޅުން ގެންގުޅުއްވަން ފެއްޓެވީއެވެ. މި އަޅުންތައް މި ބީދައިން ގެންގުޅެމުން ދަނިކޮށް، އެއިން އެކަކު އާންމު ދިވެއްސަކު މަރާލައިފިއެވެ.

އެ ޒަމާނުގައިވެސް އޮންނަ އުސޫލަކީ ކުށެއް ކޮށްފިނަމަ އިންސާފުވެރި ނިޔާއެއް ކަނޑައެޅުމުގެ މަގުސަދުގައި މީހަކު ފަނޑިޔާރުގެއަށް ގެންދަނީއެވެ. މި އަޅުމީހާވެސް ފަނޑިޔާރެއްގެ ކުރިމައްޗަށް ހާޒިރުކުރެވުނު އިރު، އޭނާގެ މައްޗަށް އަދުލު ކަނޑައެޅުމަށް ހުރީ އަލްޤާޒީ ޙަސަން ޝީރާޒީއެވެ. ގާޒީ ހަސަން ޝިރާޖީ ބޭނުންފުޅުވީ އެ އަޅުމީހާގެ މައްޗަށް ޝަރީއަތުން އިއްވަންޖެހޭނެ ހުކުމެއް އިއްވުމަށެވެ. ނަމަވެސް މިކަން ވެގެންދިޔައީ ހަދި ހަސަން ރަސްގެފާނަށް މާބޮޑަށް ހިތްޕުޅާވީ ކަމަކަށް ނޫނެވެ.

އިސާހިތަކު މި ދެބޭފުޅުންގެ މެދުގައި އަރައިރުން އުފެދިއްޖެއެވެ. މިކަން ބޮޑުވެ، ހަދި ހަސަން ރަސްގެފާނު އެންމެ ފަހުން ބޭނުންފުޅުވީ ފަނޑިޔާރު މަނިކުފާނުގެ ދުވަސް ދުއްވާލާށެވެ. އެހެންކަމުން ރަދުންގެ އަމުރުފުޅަށް ފަނޑިޔާރުކަލޭގެފާނުގެ ގައިގާ ކަފަ ބަނދެފައި ރޯކޮށްލެވުނުކަމަށް ބުނެވެއެވެ.

ގުދުރަތުގެ ނިޔާ ކިހާ މަތިވެރިތޯއެވެ. މިކަން ކުރުމަށްފަހު ރަސްގެފާނަށްވެސް ހިންދަމާލައިގެން އެހާ ގިނަ ދުވަހަކު ނުހުރެވުނެވެ. މި ހާދިސާއަށް މާގިނަ ދުވަސްތަކެއް ނުވަނީސް، ވަރަށް ބިރުވެރި ނާމާން އާލާސްކަންފުޅެއްގައި ރަދުން އަވަހާރަވިއެވެ. މި ރަދުން އަވަހާރަވި ހާލަތުގެ ނާމާންކަމުން ފަސްދާނުލެވުނީވެސް ގާ ސަންދޯކެއްގައެވެ. މި ރަދުންގެ ސަންދޯއްކޮޅު އޮތީ އެއްޒަމާނެއްގައި ލޮނުޒިޔާރަތްކޮޅުގައެވެ.

މައުލޫމާތު ނެގުނީ: ތަންޤީހު ކުރެވުނު ދިވެހިރާއްޖޭގެ ތާރީހުގެ ތަންތަންކޮޅު، އަލްއަމީން މުހައްމަދު އަމީން ދީދީ

ގާ ސަންދޯކުގެ ފޮޓޯ: ލޫކަސް ޖަލީލް. ކޮމް