އީ.ކިއު.ޓީއިން އަންދާޒާކުރި ވަރަށްވުރެ ގިނައިން އިންޑިއާގައި އިންވެސްޓްކޮށްފި

ސްވިޑަންގެ އީ.ކިއު.ޓީ ކުންފުނިން އިންޑިއާގައި އިންވެސްޓްކުރަން އަމާޒުކުރި 5 ބިލިއަން އެމެރިކާ ޑޮލަރަށްވުރެ ގިނައިން އެގައުމުގައި ވޭތުވެދިޔަ އަހަރުތަކުގައި އިންވެސްޓްކޮށްފިއެވެ.

އީ.ކިއު.ޓީގެ އޭޝިއާ ބިޒްނަސްގެ ސީއީއޯ އެރިކް ސަލާޓާ ވިދާޅުވީ މިދިޔަ 18 މަސްދުވަހުގެ ތެރޭގައި އެކުންފުނިން އިންޑިއާގައި ކުރި އިންވެސްޓްމަންޓްތަކުގެ އަދަދު 6 ބިލިއަން އެމެރިކާ ޑޮލަރަށް އަރާކަމަށެވެ. އޭޝިއާ ސަރަހައްދުގައި ތިން ވަނަޔަށް އެންމެ ބޮޑު އިގްތިސާދެއް އޮތް އިންޑިއާގައި ކުރިއަތް އޮތްތަނުގައިވެސް ރަނގަޅު ވިޔަފާރީގެ އަދި އިންވެސްޓްމަންޓްގެ ފުރުސަތުތަކެއް ހުރިކަމަށް އެކުންފުނިން ދެކެއެވެ. އީ.ކިއު.ޓީއިން މިހާރުވެސް 295 ބިލިއަން އެމެރިކާ ޑޮލަރުގެ އިންވެސްޓްމަންޓް މެނޭޖްކުރެއެވެ.

ސަލަޓާ ވިދާޅުވީ އިންޑިއާއަކީ އީ.ކިއު.ޓީފަދަ ބައިނަލްއަގްވާމީ އިންވެސްޓްމަންޓް ކުންފުންޏަކަށް ފަހި ފުރުސަތުތަކެއް އަދިވެސް އޮތް ގައުމެއްކަމަށެވެ. އިންޑިއާގެ އިގްތިސާދީ ކުރިއެރުމުގެ ސްޕީޑް ކޮންމެވެސް ވަރަކަށް އަންނަ އަހަރު މަޑުޖެހިދާނެކަމަށް ކުރެވޭ އަންދާޒާތަކާ ގުޅިގެން ސަލަޓާ ވިދާޅުވީ އެއީ އެކުންފުނިން ކަންބޮޑުވާކަމެއް ނޫންކަމަށެވެ. ކުރިއަށް އޮތްތަނުގައި ސިއްހީ ދާއިރާއާއި، ސިނާޢީ ތަރައްޤީގެ ދާއިރާތަކުގައި އެކުންފުނިން އިންޑިއާގައި އިންވެސްޓްކުރާނެކަމަށްވެސް އޭނާ ވިދާޅުވިއެވެ.

އީ.ކިއު.ޓީއިން ދާދިފަހުން ވަނީ ސްރީލަންކާގެ ސޮފްޓްވެއަރ ކުންފުނި ޑަބްލިޔު.އެސް.އޯ.2 ކުންފުނި 600 މިލިއަން އެމެރިކާ ޑޮލަރަށް ގަނެފައެވެ.