ބޮލުގަ ކަމެއް އަޅުވަން އުޅެގެން ކުރީގައިވެސް ނުވި ކަމެއް ދެނެއްވެސް ނުވާނެ: ރައީސް ޑރ.މުޢިއްޒު

މީގެ ކުރިންވެސް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ އިސްތަށިފުޅުގައި އަޅުވަން އުޅެ، ނޭޅުވުނު ކަމެއް ދެން ވެސް ނުވާނެ ކަމަށް އެމަނިކުފާނު ވިދާޅުވެއްޖެއެވެ.

ޕީއެންސީގެ ޓިކެޓުގައި ކުރިއަށް އޮތް މަޖިލިސް އިންތިހާބުގައި ގަލޮޅު ދެކުނު ދާއިރާއަށް ވާދަކުރައްވާ ކެނޑިޑޭޓް ގެ ކެމްޕޭން ޖަލްސާގައި ވާހަކަފުޅު ދައްކަވަމުން ރައީސް ޑރ.މުޢިއްޒު ވިދާޅުވީ، ނިމިދިޔަ އިންތިހާބުތަކުގައި ވެސް އެމަނިކުފާނަށް ޢަމާޒުކޮށް ދޮގު ވާހަކަތައް ފެތުރުމަށް މަސައްކަތް ކޮށްފައިވާއިރު، މާލޭގެ މޭޔަރު ކަމަށް ވާދަކުރެއްވި އިންތިޚާބާއި ރިޔާސީ އިންތިޚާބުގެ އިތުރުން ކުރިއަށް އޮތް މަޖިލިސް އިންތިޚާބާއި ގުޅުވައިގެން ވެސް އެފަދަ ވާހަކަތައް ދައްކަމުން އަންނަ ކަމަށެވެ.

"ތިބޭފުޅުން އަދި ތިގޮތަށް އަޅުގަނޑުގެ ބޮލުގަ ކަމެއް އަޅުވަން އުޅެގެން ކުރީގަވެސް ނުވި ކަމެއް ދެނެއްވެސް ނުވާނެ، އުޑުގަ ޖެހިފަ ބިމުގަ ޖެހުނަސް އަޅުގަނޑާ ދެކޮޅަށް ދެއްކޭނެ އެއް ކަމެއް ވެސް ނޯންނާނެ."

ރައީސް ޑރ.މުޢިއްޒު ވިދާޅުވިއެވެ.

ރައީސް ޑރ.މުޢިއްޒު ވިދާޅުވީ އެމަނިކުފާނުގެ އަބުރު ކަތިލުމަށް އިދިކޮޅުން ކިތަންމެ މަސައްކަތެއް ކުރިއަސް، ޤާނޫނާއި ގަވާއިދާ ޚިލާފު ކަމެއް އެއްވެސް އިރަކު ކޮށްފައި ނުހުންނާނެ ކަމަށާއި، އެފަދަ ވާހަކަތައް ދެއްކިވަރަކަށް ބޭޒާރުވާނީ އެވާހަކަތައް ދައްކާ ބައެއް ކަމަށެވެ.

ރައީސް ޑރ.މުޢިއްޒު ރައްޔިތުންގެ ހައްގާއި މުދަލާއި ފައިސާގައި ނުޖެހޭނެކަމުގެ ޔަގީންކަން ދެއްވާ އެމަނިކުފާނު ވިދާޅުވީ، އެފަދަ ވާހަކަތައް އެމަނިކުފާނުގެ އަބުރުކަތިލުމަށް ދެއްކި ނަމަވެސް އެމަނިކުފާނު، ތެދުވެރިކަމާއި އަމާނާތްތެރިކަމާއެކު ވަޢުދު ފުއްދަވާނެކަން ރައްޔިތުން ގަބޫލުކުރާ ކަމަށެވެ.

"ޤާނޫނާއި  ގަވާއިދާ ޚިލާފު ކަމެއް އޭރުވެސް ކޮށްފައި ނުހުންނާނެ. މިއަދަކުވެސް ނުކުރާނަން. އަދި ކުރިއަށް އޮތްތާނގައި ވެސް ނުކުރާނަން. އަޅުގަނޑަކީ އިރާދަކުރެއްވީތީ ރައްޔިތުންގެ ޙައްގުގައި ޖެހޭނެ މީހެއް ނޫން. ރައްޔިތުންގެ މުދަލަކު ޖެހޭނެ މީހެއް ނޫން. ރައްޔިތުންގެ ފައިސާއަކު ޖެހޭނެ މީހެއް ނޫން. އަޅުގަނޑަށް މާ މުހިންމު الله ސުބުހާނަހޫ ވަތަޢާލާގެ ފުއްސެވުމާއި ރުއްސެވުން ލިބުން،"

ރައީސް ޑރ.މުޢިއްޒު ވިދާޅުވިއެވެ.

ހަމައެއާއިއެކު، ރޭގައި ވާހަކަފުޅުދައްކަވަމުން ރައީސް ޑރ.މުޢިއްޒު ވަނީ ރައްޔިތުން އެމަނިކުފާނާ ހަވާލުކޮށްފައިވާ ޒިންމާ އިޚުލާސްތެރިކަމާއި، ތެދުވެރިކަމާއި އަމާނާތްތެރިކަމާއެކު އަދާކުރައްވާނެ ކަމަށް ވިދާޅުވެ، ރައްޔިތުން ސާބިތުކަމާއެކު ގައުމައިގެން ކުރިއަށްދިއުމަށް އެދިވަޑައިގަންނަވާފައެވެ.