ފަހު ވަގުތުގައި ކެންސަލް ކޮށްލުމުން 100 އަށްވުރެ ގިނަ މީހުންނަށް އުމްރާއަށް ނުފުރިފައި

އުމްރާއަށްދާން ފައިސާ ދައްކައި، ތައްޔާރީތައް ވެފައި ވަނިކޮށް، ފަހު ވަގުތުގައި އުމްރާ ގުރޫޕްގެ ދަތުރު ކެންސަލްކޮށްލުމުން, ގިނަ ބަޔަކު ކަންބޮޑުވުން ފާޅުކޮށްފިއެވެ.

'އަލް އަބްރާރު ޕްރައިވެޓް ލިމިޓެޑް' ނަމަކަށް ކިޔާ މި ގުރޫޕުން ރަމަޟާން މަހުގެ ފަހު 15 ގައި އުމްރާއަށް ދިޔުމަށް 110 މީހުން ފައިސާ ދައްކާފައިވެއެވެ.

ގުރޫޕުން އުމްރާއަށް ދާން ފައިސާ ދެއްކި މީހަކު ”ދުވަސް“ ނޫހަށް މައުލޫމާތު ދިން ގޮތިގައި، މީގެ ދެދުވަސް ކުރިންވެސް އެ ގުރޫޕް މީހުން އުމްރާވެރިންނާ ބައްދަލު ކުރި އިރު އުމްރާ އަށް ނުދެވޭނެ ކަމުގެ އެއްވެސް އިޝާރާތެއް/ ވާހަކައެއް ދައްކާފައެއް ނުވެއެވެ.

”މިއަދު ހެނދުނު ޖެހުނީ ދަބަސް ގެންދަން. ގެންދަން ޖެހުނީމާ، އެންމެ ފަހު މިނެޓްގައި، މިރޭ ފުރާއިރުގައޭ ފޮށި ގެންދަންޖެހޭނީ. ކިޔާފައި ކުއްލި ބައްދަލުވުމެއް ބާއްވައިފި. ބާއްވައިގެން އެންމެން މި ގެންދިޔައީ. ގެންގޮއްސަ ބުނަނީ ހުރިހާ ކަމެއް ނިންމާފައޭ މިއޮތީ. އެކަމަކި މިމަހު 26 ގެ ފަހުން ވާނެ ގޮތް ނޭނގޭތީ، މިހާރު މިއޮތް މަޝްރަހަށް ބަލާފައި، ތިމަންނަ ބޭނުމެއް ނޫނޭ ރިސްކު ނަގާކަށެއް. އެހެންވީމާ ކެންސަލް އޭ“

އެކަމާ ގުޅިގެން އިސްލާމިކް މިނިސްޓަރު ޑރ މުޙައްމަދު ޝަހީމް ޢަލީ ސަޢީދަށް ގުޅުމުން، ކަންކަން ހަމަޖެހިފައިވާ ނަމަ، އުމްރާ ވެރިން ފުރުވާލުމަށް އެންގެވި ކަމަށާ، އަދި އުމްރާ ވެރިން ގޮސް އުޅޭ ހިސާބަށް ނުރައްކަލެއް ނެތް ކަމަށްވެސް މިނިސްޓަރު ވިދާޅުވި ކަމަށް އުމްރާއަށް ދާން ފައިސާ ދެއްކި އެ މީހާ ބުންޏެވެ.

އަދި އެ ގުރޫޕުން، މި ރޯދަމަހު އުމްރާވެރިން އުމްރާއަށް ގެންދަން މިނިސްޓްރީގެ ހުއްދައަށްވެސް އެދިފައި ނުވާ ކަމަށާ، މައްކާ އިން ހޮޓެލްވެސް ބުކް ކޮށްފައި ނުވާ ކަމަށް އެ މީހާ ބުންޏެވެ.

އަދި ރިފަންޑް ދޭނެ ކަމަށް އެ ގުރޫޕުން ބުނި ނަމަވެސް، އެ ދެނީ ޓިކެޓަށް ވާ ބައި ކަނޑާފައި ކަމަށާ، ވިސާ ދިން ކަމުގެ ލިޔުން ދިނުމަށް އެދުމުން އެވެސް ދީފައި ނުވާ ކަމަށް އެ މީހާ ބުންޏެވެ.

އެކަމާ ގުޅިގެން އަބްރާރް ގުރޫޕްގެ އެމްޑީ ޢައްފާން ދިން ބަސްދީގަތުމެއްގައި ބުނީ، އުމްރާ މީހުން ގެންދިޔުމަށް ހުއްދަ ހޯދަން މިނިސްޓްރީއަށް މެއިލް ކުރި ކަމަށާ އެހެން ނަމަވެސް، އެ މެއިލް މިނިސްޓްރީއަށް ނުދިޔައީ ކަމަށެވެ. އަދި ހެޔޮ އެދޭ ފަރާތެއްގެ އެހީއާ އެކު ފައިސާ ދެއްކި މީހުންނަށް ރީފަންޑް ދިނުމުގެ ކަންކަންވެސް ކުރަމުންދާ ކަމަށް އޭނާ ބުންޏެވެ.

އެހެން ނަމަވެސް، އިސްލާމިކް މިނިސްޓްރީއަށް އެ މެއިލް ފޮނުވި ކަން ހާމަވާ މެއިލް ދެއްކުމަށް އެމީހާ ވަނީ އިންކާރު ކޮށްފައެވެ. އަދި، ޓިކެޓް ނެގި ކަމާއި، ހޮޓެލް ބޫކް ކުރި ކަމުގެ ލިޔުން ދެއްކުމަށްވެސް އެ މީހާ ވަނީ އިންކާރު ކޮށްފައެވެ. ސަބަބެއް ކަމުގައި އޭނާ ބުނީ، އިސްލާމިކް މިނިސްޓްރީ އާއި ފުލުހުން މައްސަލަ ތަހުގީގު ކުރަމުން ދިޔުމެވެ.

މި މައްސަލައާ ގުޅިގެން މިނިސްޓްރީގެ އަދި ފުލުހުންގެ ބަހެއްވެސް އަދި ލިބޭ ގޮތެއް ނުވެއެވެ.