ކައުންސިލް އިންތިހާބު: ޕީއެންސީން ރެކޯޑް އަދަދަކަށް ކެންޑިޑޭޓުން ނެރޭނެ

އަންނަ އަހަރު އޮންނަ ލޯކަލް ކައުންސިލްތަކުގެ އިންތިހާބުގައި ރެކޯޑް އަދަދަކަށް ކެންޑިޑޭޓުން ނެރޭނެ ކަަމަށް ޕީއެންސީން މިއަދު ބުނެފި އެވެ.

އަންނަ އަހަރުގެ އޭޕްރީލް މަހު އޮންނަ ކައުންސިލް އިންތިހާބުގައި ޕީއެންސީގެ ޓިކެޓްގައި ވާދަކުރަން އެދޭ ކެންޑިޑޭޓުންނަށް ހުޅުވާލި ފުރުސަތު ހަމަވުމުން އެ މައުލޫމާތު ހިއްސާކުރުމަށް މިއަދު ބޭއްވި ނޫސްވެރީންގެ ބައްދަލްވުމުގައި އެ ޕާޓީގެ ކެމްޕެއިން މެނޭޖަރު އިބްރާހިމް ފަލާހް ވިދާޅުވީ ޕީއެންސީގެ ޓިކެޓަށް ހުޅުވާލުމުން 94 ޕަސެންޓް ގޮނޑިތަކަށް ކެންޑިޑޭޓުން ކުރިމަތިލާފައިވާ ކަމަށެވެ.

މިއީ ރެކޯޑް އަދަދެއްކަން ފާހަގަކޮށް އޭނާ ވިދާޅުވީ ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި ރެކޯޑް އަދަދަކަށް ކެންޑިޑޭޓުން ނެރެވޭނެ ކަމަށެވެ. މީގެ ކުރީން އެއް ޕާޓީއަކުން އެންމެ ގިނަ ކެންޑިޑޭޓުން ނެރެފައިވަނީ އިންތިހާބުކުރާ ގޮނޑީގެ 90 އިންސައްތައަށް ވުރެ ދަށް އަދަދަކަށް ކަމަށް ފަލާހް ވިދާޅުވި އެވެ.

ޕީއެންސީގެ ޓިކެޓަށް ހުޅުވާލުމުން 94 ޕަސެންޓް ގޮނޑިތަކަށް ކެންޑިޑޭޓުން ކުރިމަަތިލި ކަމަށް ވިދާޅުވި ނަމަވެސް އެއީ ކިހާ އަދަދެއް ކަމެއް ސާފުކޮށް ވިދާޅެއް ނުވެ އެވެ.

ޕީއެންސީ ޕްރައިމަރީ މި މަހު 27 ގައި

ފަލާހް ވިދާޅުވި ގޮތުގައި އެ ޕާޓީގެ އިންތިހާބާ ބެހޭ ކޮމެޓީން މިހާރު ދަނީ ހުށައަޅާފައިވާ ހުރިހާ ފޯމްތަކެއް ބަލަމުންނެވެ. އަދި ފޯމްތައް ބަލާ ނިންމާ ޝަރުތު ހަމަވާ ކެންޑިޑޭޓުން ކަނޑައަޅާނެ އެވެ.

އަދި ޕްރައިމަރީ ބާއްވާނެ ދާއިރާތައް ވެސް ކަނޑައަޅާނެ އެވެ. އެ ދާއިރާތަކުގައި ޕްރައިމަރީ އޮންނާނީ މި މަހުގެ 27 ވަނަ ދުވަހު ކަމަށް ވިދާޅުވި އެވެ. ފަލާހް ވަނީ ޕްރައިމަރީ ވަރަށް އިންސާފުވެރި ވާނެ ކަމަށާ މިނިވަން ކަމާއެކު ކުރިއަށް ގެންދާނެ ކަމަށް ވިދާޅުވެފަ އެވެ.

ކައުންސިލް ކެމްޕެއިންގެ ތަރުޖަމާނަށް ފިރުޒުލް

މިއަދު އޮތް ނޫސްވެރީންގެ ބައްދަލްވުމުގައި ފަލާހް ވިދާޅުވީ އަންނަ އަަހަރު އޮންނަ ލޯކަލް ކައުންސިލް އިންތިހާބުގައި އެ ޕާޓީގެ ކެމްޕެއިން ހިންގާއިރު ތަރުޖަމާނަކަށް ބޭފުޅަކު ވަނީ ހަމަޖައްސާފަ އެވެ.

އެއީ ރައީސް އޮފީހުގެ އަންޑަސެކްރެޓަރީގެ މަގާމުގައި ހުންނެވި މުޙައްމަދު ފިރުޒުލް ކަމުގައި ވިދާޅުވި އެވެ. އޭނާ ވެސް މިއަދުގެ ނޫސްވެެރީންގެ ބައްދަލްވުމުގައި ބައިވެރިވި އެވެ.

ޕްރައިމަރީއާ ދިމާކޮށް މެންބަރުން ގުޅުން, 75,000 އަށް އިތުުރުވާނެ

ސިޔާސީ ބޮޑެތި ޕާޓީތަކުގެ ޕްރައިމަރީތަކާއި ދިމާކޮށް ޕާޓީތަކަށް މެންބަރުން އިތުރުވުމަކީ އާންމު ކަމެވެ.

ފަލާހް މިއަދު ވިދާޅުވި ގޮތުގައި މި ފަހަރުގެ ޕްރައިމަރީއާ ދިމާކޮށްވެސް އެތައް ހާސް ބަޔަކު ވަނީ ޕީއެންސީއާ އަލަށް ގުޅިފަ އެވެ. މިހާރުވެސް އެ ޕާޓީގެ މެންބަރުންގެ އަދަދު 70,000 ވުރެ މަތި ކަމަށް ވިދާޅުވި އެވެ. އަދި މިހާރު ލިބިފައިވާ ހުރިހާ ފޯމެއް ޕްރޮސަސް ކޮށް ނިމުމުން މެންބަރުންގެ އަދަދު 75,000 އަށް އަރާނެ ކަމަށް ލަފާކުރެވޭ ކަމަށް ވިދާޅުވި އެވެ.

އިލެކްޝަންސް ކޮމިޝަންގެ ދަފްތަރު ބުނާގޮތުން މިހާރުވެސް އެންމެ މެންބަރުން ގިނައީ ޕީއެންސީގަ އެވެ. 69,000 ވުރެ ގިނަ މެންބަރުން ދަފްތަރުގައި ތިބިއިރު އެ އަދަދާ ގާތް ކުރާ މިންވަރަށް ވެސް އެހެން ޕާޓީއެއްގައި މެންބަރުންނެވެ.