ސަރުކާރަށް ދެ އަހަރުވުމާ ދިމާކޮށް އެމްޑީޕީން މަގުމައްޗަށް ނުކުންނަނީ

މި އަންނަ މަހުގެ 17 ވަނަ ދުވަހު އަނެއްކާ ވެސް މަގުމަތީގެ ބޮޑު ހަރަކާތެއް ބާއްވަން އިދިކޮޅު އެމްޑީޕީން ނިންމައިފިއެވެ.

އެމްޑީޕީން އެގޮތަށް ނިންމައިފައިވަނީ މިރޭ އެޕާޓީން ބޭއްވި ކުއްލި ޤައުމީ މަޖިލީހުގެ ޖަލްސާގައި ހުށަހެޅި ޤަރާރެއް ފާސްކޮށްގެންނެވެ.

ޖަލްސާގައި ހޯރަފުށީ ދާއިރާގެ ކުރީގެ މެންބަރު އަދި މިދިޔަ ދައުރުގެ މަޖިލީހުގެ ނައިބު ރައީސްކަން ކުރެއްވި އަހުމަދު ސަލީމް (ސައްލެ) އެ މަޖިލީހަށް ހުށަހެޅުއްވި އެ ޤަރާރުގައި ބުނީ، މިދިޔަ ހުކުރު ދުވަހު އެމްޑީޕީން ބޭއްވި އެއްވުމުގައި ބައިވެރިވި ރައްޔިތުންނަށް ހުރަސްއެޅުމަށް ރައީސް މުޢިއްޒުގެ އެންގުމަށް އެކި ކަންކަން ކޮށްފައިވާ ކަމަށެވެ.

އެގޮތުން ފުލުހުން ނުބައްދަލު ބާރުގެ ބޭނުންކުރުމާއި، އެލްރާޑްގެ ބޭނުންކުރުމުގެ އިތުރުން، އެ އެއްވުމުގައި ހައްޔަރުކުރި އެއްވެސް މީހަކަށް ޤާނޫނީ ވަކީލަކާއި އަދި ޑޮކްޓަރަކަށް ދެއްކުމުގެ ހުއްދަ ދީފައިނުވާއިރު އެކަންކަަމަކީ ޤާނޫނު އަސާސީއާއި ޚިލާފު ކަންކަމެއް ކަމަށް ވެސް ވެސް އެ ޤަރާރުގައި ބުންޏެވެ.

އަދި އެލްރެޑް އަކީ ދިވެހިރާއްޖެ ބައިވެރިވެފައިވާ ބައިނަލްއަގުވާމީ އިންސާނީ ޙައްޤުތަކާއި ބެހޭ މުޢަހަދާއެއް ކަމުގައިވާ ކޮންވެންޝަން އެގެއިންސްޓް ޓޯޗާގެ ދަށުން މުޅިން މަނާކޮށްފައިވާ ކަމެއް ކަމަށް ފާހަގަކުރެވޭއިރު ވެސް، އެ ހަތިޔާރު އެ އެއްވުމުގައި ބޭނުންކުރީ އެފަދަ ޙާލަތެއް އޮވެގެން ނޫންކަމަށް ޤަބޫލުކުރެވޭ ކަމަށް އެ ޤަރާރުގައި ބުންޏެވެ.

ރައްޔިތުންނަށް އަނިޔާވެރިވުމަށް ސީދާ ރައީސް މުޢިއްޒުގެ އެންގެވުމަށް ފުލުހުން މިހާތަނށް ހަތިޔާރެއްގެ ގޮތުގައި ބޭނުންކޮށްފައިނުވާ ލޯންގް ރޭންޖް އެކޯސްޓިކް ޑިވައިސް ބޭނުންކުރުމުގެ ސަބަބުން މުޒާހަރާގެ ބައިވެރިންނާއި އެ ސަރަޙައްދުގައި ދިރިއުޅޭ މީހުންނާއި ކުޑަކުދިންގެ ކަންފަތަށް ގެއްލުންވެ ނަފްސާނީ ގޮތުން އުނދަގޫވުމުގެ އިތުރުން، ސިއްޚީ އެހެނިހެން މައްސަލަތައް ވެސް ކުރިމަތިވެފައިވާކަން އެނގޭހިނދު، ދެންނެވުނު ޢަމަލަކީ ދިވެހިރާއްޖެ ބައިވެރިވެފައިވާ ބައިނަލްއަގުވާމީ އިންސާނީ ޙައްޤުތަކާއި ބެހޭ މުޢަހަދާއެއް ކަމުގައިވާ ކޮންވެންޝަން އެގެއިންސްޓް ޓޯޗާގެ ދަށުން މުޅިން މަނާކޮށްފައިވާ ކަމެއް ކަމަށް ފާހަގަކުރެވޭ ހިނދު، ދެންނެވުނު ހަތިޔާރު ބޭނުންކުރީ އެފަދަ ޙާލަތެއް އޮވެގެން ނޫންކަމަށް ޤަބޫލުކުރެވޭ ހިނދު، ދެންނެވުނު އެއްވުމުގެ ތެރެއިން އަނިޔާވެރިކަމާއި އެކު އެއްވެސް މީހަކަށް ޤާނޫނީ ވަކީލަކާއި ބައްދަލުކުުރުމުގެ ފުރުސަތު ދީފައިނުވުން އެކަމަކީ ޤާނޫނު އަސާސީއާއި ކަނޑައެޅިގެން ޚިލާފު ކަމެއްކަމަށް ވީހިނދު..،

އެމްޑީޕީގެ ޤަރާރު

އިތުރަށް އެ ޤަރާރުގައި ވަނީ އެމްޑީޕީގެ އެއްވުމުގެ ތެރެއިން ހައްޔަރުކުރި މީހުންެ ބަންދަށް 15 ދުވަސް ޖަހައިފައިވަނީ ޤާނޫނާއި ޚިލާފަށް ކަމަށާއި، އެހެންކަމުން މިވަގުތު އެ ފަރާތްތައް އެތިބީ ޣައިރު ޤާނޫނީ ބަންދެއްގައިކަން ކަނޑައެޅިގެން އެނގޭ ކަމަށެވެ.

ދެންނެވުނު އެއްވުމުގައި ޤާނޫނާއި ޚިލާފު އަދި ބާރުގެ ނުބައްދަލު ބޭނުންކޮށް މީހުން ހައްޔަރުކުރުމަށްފަހު ޤާނޫނީ ވަކީލަކާއި ބައްދަލުކުރުމުގެ ފުރުސަތުނުދީ އަދި އެއްވެސް ކުށެއްގެ ހެއްކެއްނެތި ބަންދުގެ މުއްދަތަށް 15 ދުވަސް އިތުރުކޮށްފައިވަނީ ޤާނޫނާއި ޚިލާފަށްވީ ސަބަބަށްޓަކައި މިވަގުތު އެމީހުން ބައިތިއްބައިފައި އެވަނީ ޣައިރު ޤާނޫނީ ބަންދެއްގައިކަން ކަނޑައެޅިގެން އެނގޭހިނދު، އަދި ދެންނެވުނު އެއްވެސް މީހަކަށް ޑޮކްޓަރަށް ދެއްކުމުގެ ފުރުސަތު މިހާތަނަށް ވެސް ދީފައިނުވަނީ އެމީހުންނަށް ކޮށްފައިވާ އަނިޔާތަށް ހާމަވެގެން ހިނގައިދާނެ ކަމަށް ދެކޭ ހިނދު، ދެންނެވުނު ސަބަބުތައް ހުރުމާއެކު އަންނަނިވި ކަންކަމަށް އިޤުރާރުވަމެވެ.

އެމްޑީޕީގެ ޤަރާރު

އެހެންކަމުން އެމްޑީޕީގެ ޤަރާރުގައި ވަނީ ތިންކަމެއް ކުރަން އެއްބަސްވެފައެވެ. އެއީ:

1. ރައީސް މުޢިއްޒުގެ ސީދާ އެންގެވުމަށްދިން އަނިޔާތައް ކުށްވެރިކުރުމާއެކު ޤާނޫނާ ޚިލާފަށް ބަންދުކޮށްފައިވާ އެންމެން ވަގުތުން ދޫކޮށްލުމަށް ގޮވާލުން

2. ދިވެހި ރައްޔިތުންގެ އަސާސީ ޙައްޤުތަކާއި މިނިވަންކަން ދިފާޢުކުރުމަށްޓަކައި ކުރަމުންމިގެންދާ މަސައްކަތް  އެއްވެސް ހުއްޓުމެއް ނެތި ކުރިޔަށްގެންދިޔުން

3. ދެންނެވުނު އެއްވުމުގައި ރައްޔިތުން އެދުނު ޑިމާންޑްތައް ފުއްދައިނުދޭނަމަ މި ފެށޭ ނޮވެމްބަރު މަހުގެ 17 ވަނަ ދުވަހާއި ދިމާކޮށް މާލޭގައި އަލުން ބޮޑު އެއްވުމެއް ބޭއްވުން

އެ ޤަރާރު ފާސްކޮށްފައިވަނީ އެ ޤައުމީ މަޖިލީހުގައި ބައިވެރިވި ހުރިހާ މެންބަރުންގެ އިއްތިފާގުންނެވެ.

ފާހަގަކުރެވޭ ގޮތުގައި ރޭ އެމްޑީޕީން ބޭއްވި އެއްވުމުގެ ތެރެއިން އެ ޕާޓީގެ ރައްޔިތުންގެ މަޖިލީހުގެ ކުރީގެ ދެ މެންބަރުންކަމުގައިވާ ކުޅުދުއްފުށީ އުތުރު ދާއިރާގެ ކުރީގެ މެންބަރު ޔާސިރު އަބްދުއްލަތީފް އަދި ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ އާއި އެ ޕާޓީގެ ކ. މާފުށީ ކައުންސިލުގެ ރައީސް ހަސަން ސޮލާޙް ވެސް ވަނީ ހައްޔަރުކޮށްފައެވެ.

އެގޮތުން އެ ތިން ބޭފުޅުންނާއެކު އިތުރު ހަތަރު މީހެއްގެ ބަންދަށް 15 ދުވަސް ޖެހުމަށް މިއަދު ކޯޓުން ވަނީ ނިންމާފައެވެ.

އަދި އެމީހުންގެ އިތުރުން ވެސް އިތުރު އެކަކު ފުލުހުން ބަންދުކުރިއެވެ. އެހެން ނަމަވެސް އޭނާ ވަނީ މާލެއިން ބޭރަށް ނުދިއުން ފަދަ ޝަރުތުތަކާ އެކު ކޯޓުން ދޫކޮށްފައެވެ.

އެ މީހުން ހައްޔަރުކުރިއިރު،  ފަރާތްތަކަށް ޤާނޫނީ ވަކީލެއްގެ ހައްގު ނުދިނުމުގެ ކަންބޮޑުވުން މިއަދު ވެސް އެ ޕާޓީން ވަނީ ފާޅުކޮށްފައެވެ.