ފާޑުކިޔުން އަމާޒުވި ވިހިހާސް ރުފިޔާގެ ވަޒީފާގެ ހެލްތުން ބާތިލުކޮށްފި
އޯ ލެވެލް ފެންވަރު ޝަރުތާއެކު 20،000ރ ގެ މުސާރައެއް ލިބޭ ގޮތަށް ހެލްތް މިނިސްޓްރީން ކުރި ވަޒީފާގެ އިއުލާންއަށް ފާޑުކިޔުން އަމާޒުވުމުން އެ އިއުލާން ބާތިލުކޮށްފިއެވެ.
މިނިސްޓްރީ އޮފް ހެލްތުން ޢިއުލާންކޮށްފައިވަނީ ކޮމިއުނިކޭޝަން ޑިރެކްޓަރެއް ހޯދުމަށެވެ.
ފާޑުކިޔުން އަމާޒުވެފައިވާ ހެލްތުގެ ކޮމިއުނިކޭޝަން ޑިރެކްޓަރެއް ހޯދުމަށް ކުރި އިއުލާނުގައި ބުނެފައިވަނީ އެ މަގާމުގެ ޝަރުތަކީ ޖީސީއީ އޯލެވެލް ހުރުމާއެކު ޚަބަރު ފަތުރާ ވަސީލަތެއްގައި މަދުވެގެން 3 އަހަރު ދުވަހުގެ މަސައްކަތު ތަޖުރިބާ ލިބިފައި ވުމެވެ. އަދި ޚަބަރު ފަތުރާ ވަސީލަތެއްގައި އެގްޒެކެޓިވް ލެވެލްގައި 1 އަހަރު ދުވަހުގެ މަސައްކަތު ތަޖުރިބާ ހާސިލުކޮށްފައި ވުމެވެ.
ބައެއް ފަރާތްތަކުން ތުހުމަތު ކޮށްފައިވަނީ މި ވަޒީފާ އަކީ ވަކި ފަރާތަކަށް މަންފާއެއް ހޯދައި ދިނުމަށްޓަކައި އިއުލާން ކޮށްފައިވާ ވަޒީފާއެއް ކަމަށެވެ.
ސޯޝަލް މީޑިއާގައި ހިޔާލު ފާޅުކުރިއެކަކު ބުނެފައިވާގޮތުގައި އިއުލާނުގައި މަދުވަނީ މަޤާމަށް ގެންނަން އުޅޭ މީހާގެ ނަމާއި އައިޑީކާޑު ނަންބަރު އެކަނިކަމަށެވެ.
މިނިސްޓްރީ އޮފް ހެލްތުން މިއަދުކުރި ޓުވީޓެއްގައި ބުނެފައިވަނީ މި ވަޒީފާގެ އިއުލާނަކީ އެޑްމިނިސްޓްރޭޓިވް މައްސަލައެއްގެ ސަބަބުން އޮޅުމަކުން ކުރެވިފައިވާ އިއުލާނެއް ކަމަށާއި މިހާރު އެއިއުލާން ބާތިލްކުރެވިފައިވާކަމަށެވެ.
މިހާތަނަށް ސަރުކާރުގެ ކޮމިއުނިކޭޝަން ޑިރެކްޓަރުންނަށް އައްޔަންކުރައްވަމުން ގެންދަވަނީ މީގެ ކުރިން އިދިކޮޅު މީޑިއާތަކުގައި ހަރަކާތްތެރިވެފައިވާ ނޫސްވެރިންކަން ފާހަގަކޮށްލަންޖެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
