އާސަންދައިން އީވް ކްލިނިކަށް ދޭ ޚިދުމަތް ވަގުތީގޮތުން ހުއްޓާލައިފި

ބަލަމުންދާ މައްސަލައަކާއި ގުޅިގެން އާސަންދައިން އީވް ކްލިނިކަށް ދޭ ޚިދުމަތް ވަގުތީގޮތުން ހުއްޓާލައިފިއެވެ.

އާސަންދަ ކޮމްޕެނީގެ މީޑިއާ އޮފިޝަލަކު މަޢުލޫމާތު ދެއްވާފައިވާ ގޮތުގައި، ބަލަމުންދާ މައްސަލައަކާ ގުޅިގެން އީވް ކްލިނިކަށް އާސަންދައިގެ ޚިދުމަތް ދިނުން ވަގުތީގޮތުން ވަނީ ހުއްޓާލާފައެވެ. ނަމަވެސް، މި މައްސަލައިގެ އިތުރު ތަފްސީލެއް އެ އޮފިޝަލް ހާމަކުރައްވާފައެއް ނުވެއެވެ.

އާސަންދައިގެ އޮފިޝަލް އިތުރަށް ވިދާޅުވީ، އެ ކުންފުނިން ގަވާއިދުން ކްލިނިކްތައް ޗެކްކުރާއިރު ފާހަގަކުރެވޭ ކަންތައްތަކުގެ ސަބަބުން ބައެއް ކްލިނިކްތަކަށް އާސަންދަ ދިނުން ވަގުތީގޮތުން މެދުކަނޑާލާ ކަމަށެވެ. އަދި ބަލަންޖެހޭ ކަންތައްތައް ބެލުމަށްފަހު އީވް ކްލިނިކަށް އަލުން އާސަންދަ ދޫކުރާނެ ކަމަށްވެސް އެ އޮފިޝަލް ވިދާޅުވިއެވެ.

ފާހަގަކޮށްލެވޭ ގޮތުގައި، މިދިޔަ މަހުން ފެށިގެން މަނިޕާލް ހޮސްޕިޓަލުގެ އަގުތައް ބޮޑުވުމާ ގުޅިގެން އެ ހޮސްޕިޓަލުން އާސަންދައިގެ ޚިދުމަތް އައު ބަލިމީހުންނަށް ދިނުން ވަނީ ވަގުތީގޮތުން ހުއްޓާލާފައެވެ.

އާސަންދައިން 2022 ވަނަ އަހަރުން ފެށިގެން އަންނަނީ ސަސްޕެންޑް ކުރާ ތަންތަނުގެ ލިސްޓު އާންމުކުރަމުންނެވެ. މިގޮތުން، މިދިޔަ އަހަރުގެ ނިޔަލަށް 18 ތަނެއް ސަސްޕެންޑް ކުރުމަށްފަހު އަލުން ޚިދުމަތް ދީފައިވާކަން އާސަންދައިގެ ލިސްޓުން އެނގެއެވެ. މިވަގުތު މި ލިސްޓުގައި ވަނީ މާލޭގައި ހިންގާ ހަތަރު ކްލިނިކެކެވެ. އެއީ، ޔޫރޯ މެޑިކަލްކެއާ، ޑރ. ޕިލް ފާމަސީ، ސްޓެމް ސެންޓަރު އަދި އީވް ކްލިނިކެވެ.