ޒަކާތު ފަންޑުން ސްކޮލަޝިޕް ދޭގޮތުގެ އުސޫލު އާންމުކޮށްފި

ޒަކާތު ފަންޑުން މަތީ ތައުލީމު ހާސިލުކުރުމަށް އެހީދިނުމުގައި ނުވަތަ ސްކޮލަޝިޕް ދިނުމުގައި އަމަލު ކުރާނެ އާ އުސޫލެއް އިސްލާމިކް މިނިސްޓްރީން އާންމުކޮށްދި އެވެ.

"ޒަކާތު ފަންޑުން މަތީ ތައުލީމަށް އެހީދިނުމުގެ އުސޫލު"އިއްޔެ ގެޒެޓުގައި އާންމުކޮށްފައިވާއިރު، މި އުސޫލުގެ މަގުސަދަކީ ޝަރުއީ ގޮތުން ހުއްދަ ދާއިރާތަކުން ކިޔެވުމަށް ބޭނުންވާ ދަރިވަރުންގެ ތެރެއިން މާލީ ގޮތުން ފުދުންތެރިކަން ނެތް ދިވެހި ދަރިވަރުންނަށް ޒަކާތު ފަންޑުން އެހީތެރިކަން ދިނުން ކަމަށް ބުނެފައިވެއެވެ.

މި ފަންޑުގެ އެހީގައި ސްކޮލަޝިޕް ދޭނީ އިސްލާމީ ދާއިރާތަކުން ޑިޕްލޮމާ އިން ފެށިގެން ޕީއެޗްޑީއާ ހަމައަށް ކިޔެވުމަށެވެ. ސްކޮލަޝިޕަށް އެދި ހުށަހެޅޭނީ ހަމައެކަނި އެމްކިޔުއޭއިން ގަބޫލުކުރާ މަރުކަޒު ތަކަށެވެ.

ސްކޮލަޝިޕަށް އެދި ހުށަހެޅޭނެ ޝަރުތުތަކުގެ ތެރޭގައި؛

• އުމުރުން 18 އަހަރު ފުރިފައިވާ ދިވެއްސަކަށްވުން

• މާލީ ފުދުންތެރިކަން ނެތުން

• ކޯހަށް ވަނުމަށް ބޭނުންވާ ކްރައިޓީރިއާ ހަމަވުން

• އެހެން ފަރާތެއްގެ ހިލޭ އެހީގައި ކިޔަވަމުންދާ ދަރިވަރަކަށް ނުވުން

• މީގެ ކުރިން ނަގާފައިވާ ސްޓޫޑެންޓް ލޯނެއް ނަގާފައިވާނަމަ ހާއްސަ ހާލަތެއް މެދުވެރިވެގެން މެނުވީ ފައިސާ ދައްކާ ހަލާސްކޮށްފައިވުން ނުވަތަ ގަވާއިދުން ފައިސާ ދައްކަމުން ދިއުން

• މަތީ ތައުލީމާ ބެހޭ ދައުލަތުގެ ވުޒާރާއިން ބްލެކްލިސްޓްކު ކޮށްފައިވާ ދަރިވަރަކަށް ނުވުން

• ފުލްޓައިމް ކޯހެއްގައި ތައުލީމް ހާސިލް ކުރުމަށް އެދޭ ދަރުވަރެއް ކަމުގައިވުން

• ހާސިލް ކޮށްފައިވާ ސެޓްފިކެޓަށްވުރެ މަތީ ފެންވަރެއްގެ ކޯހެއްގައި ތައުލީމް ހާސިލް ކުރުމަށް އެދޭ ދަރިވަރަކަށް ވުން

މި ސްކޮލަޝިޕަށް ހޮވުމުގައި އަންނަނިވި ކަންކަމަށް އިސްކަންދޭނެ ކަމަށްވެސް އުސޫލުގައުވެއެވެ.

• ފަގީރުންނާއި މިސްކީނުންގެ ދަފުތަރުގައި ރަޖިސްޓްރީ ކޮށްފައިވުން

• މާލީ ފުދުންތެރިކަން ނެތް މިންވަރު

• ތައުލީމީ ފެންވަރު

• ގައުމަށް ހިދުމަތް ކޮށްދީފައިވާ މުއްދަތު

ސްކޮލަޝިޕަށް ހޮވޭ ދަރިވަރުންނަށް ރާއްޖޭން ބޭރަށް ކިޔަވަން ދިއުމަށް ދެކޮޅު ޓިކެޓުގެ ހަރަދާއި، ކޯހުގެ ޓިއުޝަން ފީ އާއި ވިސާގެ ހަރަދާއި، ކޯސް ރަޖިސްޓްރޭޝަން ހަރަދާއި، ހެލްތު އިންޝުއަރެންސްގެ އިތުރުން އެސްޓެބްލިޝްމެންޓް އެލަވަންސް ދޭނެ އެވެ. އަދި ސްޓައިފެންޑާއި ބުކް އެލަވަންސް ވެސް މީގެ ތެރޭގައި ހިމެނެ އެވެ.

އަދި ރާއްޖޭގައި ކިޔަވުމަށް ހޮވޭ ދަރިވަރުންނަށް، އެމީހަކު ހުންނަ ރަށަކުން، ކިޔަވަންދާ އެދޭ ރަށަކަށް ދިއުމަށް ދެކޮޅު ޓިކެޓުގެ ހަރަދު ދޭނެ ކަމަށް ވެސް މި އުސޫލުގައި ބަޔާންކޮށްފައިވެ އެވެ.