މާލީ ދަތިތަކުން އަރައިގަތުމަށް އިންޑިޔާއިން ވެދޭ އެހީއަށް ރައީސްގެ ހާއްސަ ޝުކުރު

ރާައްޖެއަށް ކުރިމަތިވެފައިވާ މާލީ ދަތިތަކުން އަރައިގަތުމަށް އިންޑިޔާއިން ފޯރުކޮށްދެމުންދާ އެހީތެރިކަން ފާހަގަކުރައްވައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެ ގަައުމުގެ ބޮޑުވަޒީރު ނަރެންދުރަ މޯދީއާއި އެ ގައުމުގެ ސަރުކާރާއި ރައްޔިތުންނަށް ޝުކުރު އަދާކުރައްވައިފިއެވެ.

ރައީސްގެ ދައުވަތުފުޅަކަށް ދެ ދުވަހުގެ ފުރަމާނަ ދަތުރުފުޅެއްގައި މިއަދު ރާއްޖެއަށް ވަޑައިގެންނެވި އިންޑިޔާގެ ބޮޑުވަޒީރު މޯދީއާއެކު ރައީސް އޮފީހުގައި ބޭއްވެވި ރަސްމީ މަޝްވަރާ ބައްދަލުވުމަށްފަހު، ދެ ލީޑަރުންގެ ހާޒިރުގައި މުހިއްމު އަށް އެއްބަސްވުމެއްގައި ސޮއިކޮށްފައިވެއެވެ.

އެއްބަސްވުމުގައި ސޮއިކުރެއްވުމުގެ ރަސްމިއްޔާތަށްފަހު ދެ ލީޑަރުން މީޑީޔާއާ ބައްދަލުކުރެއްވި ކުރެއްވުމުގައި ރައީސް ދެއްކެވި ވާހަކަފުޅުގައި، ރާއްޖެއަށް ކުރިމަތިވެފައިވާ އިގުތިސާދީ އަދި ބޭރު ފައިސާގެ ލިކުއިޑިޓީގެ ދަތިކަން ހައްލުކުރުމަށް އެ ގައުމުގެ ރިޒާވް ބޭންކުން 400 މިލިއަން ޑޮލަރުގެ ލައިން އޮފް ކްރެޑިޓެއް ހަމަޖައްސައި، އިތުރު އިންޓަރެސްޓު ނާރާ ގޮތަށް އިންޑިޔާއިން ނަގާފައިވާ 50 މިލިއަން ޑޮލަރުގެ ދަރަންޏެއް އަދާކުރުން އެއް އަހަރު ދުވަހަށް ފަސްކޮށްދީފައިވާކަން ފާހަގަކުރެއްވިއެވެ. އަދި އެކަމަށްޓަކައި ހާއްސަ ޝުކުރެއް ބޮޑުވަޒީރާއި އެ ގައުމުގެ ސަރުކާރާއި ރައްޔިތުންނަށް އަދާކުރެއްވިއެވެ.

އޭގެ އިތުރަށް މިއަދު ސޮއިކުރެވުނު އެއްބަސްވުންތަކުގެ ތެރެއިން އިންޑިޔާގެ އެގްޒިމް ބޭންކު މެދުވެރިކޮށް ރާއްޖެއަށް 565 މިލިއަން އެމެރިކާ ޑޮލަރުގެ ލައިން އޮފް ކްރެޑިޓެއް ހަމަޖެހިގެންދިޔަކަން ފާހަގަކުރައްވަމުން، އެ ފައިސާއަކީ އެމަނިކުފާނު އިސްކަންދެއްވާ މުހިއްމު މަޝްރޫއުތައް، އަސްކަރީ، ސިއްހީ، ތައުލީމީ އަދި ބޯހިޔާވަހިކަމުގެ ދާއިރާއިން ކުރިއަށްގެންދިއުމަށް ބޭނުންކުރެވޭނެ ފައިސާ ކަމުގައި ވިދާޅުވިއެވެ.

އޭގެ އިތުރަށް އިންޑިޔާއާއި ރާއްޖޭގެ މެދުގައި އޮތް ވިޔަފާރިއާއި އިގުތިސާދީ ގުޅުން އިތުރަށް ބަދަަހިކުރުމަށް ދެ ގައުމުގެ މެދުގައި މިނިވަން ވިޔަފާރީގެ އެއްބަސްވުމެއް ގާއިމުކުރުމަށް ރަސްމީކޮށް މަޝްވަރާތައް ފެށުމުގެ އެމްއޯޔޫގައި ސޮއިކުރެވުނުކަން ރައީސް ފާހަގަކުރެއްވިއެވެ. އަދި މިނިވަން ވިޔަފާރީގެ އެއްބަސްވުން ވެގެންދާނީ ދެ ގައުމުގެ މެދުގައި އޮތް ވިޔަފާރީގެ ގުޅުން އެތައް ގޮތަކުން ފުޅާވާނެ ސަބަބަކަށް ކަމުގައި ވިދާޅުވިއެވެ.

ރައީސްވަނީ މިއަދު އައްޑޫގެ މަގުތައް ތަރައްގީކުރުމަށް އިންޑިޔާގެ އެހީގައި ހިންގި މަޝްރޫއު ނިންމައި އިފުތިތާހުކޮށްދެއްވިކަން ފާހަގަކުރައްވައި، އިންޑިޔާގެ އެހީގައި ގާއިމުކުރެވުނު ދޮށިމޭނާ އިމާރާތް މިއަދު ހަވީރު އިފުތިތާހުކޮށްދެއްވަން ހަމަޖެހިފައިވާކަން ފާހަގަކުރައްވާފައެވެ.

ރައީސްވަނީ އެކި ދާައިރާތަކުން އިންޑިޔާއިން ރާއްޖެއަށް ވެދެމުންދާ އެހީތެރިކަން ފާހަގަކުރައްވައި އެ ގައުމުގެ ސަރުކާރާއި ރައްޔިތުންނަށް ޝުކުރު އަދާކުރައްވާފައެވެ. އަދި ކުރިއަށް އޮތް ތަނުގައި އިތުރު ދާއިރާތަކުން ދެ ގައުމުގެ ގުޅުން ބަދަހިކުރެއްވުމަށް ސަރުކާރުން މަސައްކަތްކުރާނެ ކަމުގެ ޔަގީންކަން އެމަނިކުފާނުވަނީ ދެއްވާފައެވެ.