މީޑިޔާ ބިލުގެ ކޮމެޓީގައި މައިކަށް ގެއްލުން ދިން މެންބަރުންގެ އަތުން އަގު ނަގަނީ

މިދިޔަ މަހު މިދިޔަ މަހު ބޭއްވި މިނިވަން މުއައްސަސާތަކުގެ ކޮމިޓީ ބައްދަލުވުމުގައި ކޮމިޓީ ކޮޓަރީގެ މައިކަކަށް ގެއްލުން ދިން މައްސަލައިގައި، އެ ވަގުތު މައިކުގައި ހިފައިގެން ތިބި ތިން މެންބަރުންގެ އަތުން މައިކުގެ އަގު ނަގަން ރައްޔިތުންގެ މަޖިލީހުގެ އިމްތިޔާޒާއި ސުލޫކު ކޮމިޓީން ނިންމައިފިއެވެ.

އަގު ނަގަން ނިންމާފައިވަނީ ހެންވޭރު ދާއިރާގެ މެންބަރު ހުސައިން އިމްރާން ލަތީފާއި، ތޮއްޑޫ ދާއިރާގެ މެންބަރު ހުސައިން ސަމީރު އަދި ކެންދޫ ދާއިރާގެ މެންބަރު މައުރޫފް ޒާކިރުގެ އަތުންނެވެ.

މިދިޔަ މަހުގެ 15 ވަނަ ދުވަހު ބޭއްވުނު ކޮމިޓީ ބައްދަލުވުމުގައި، މައުރޫފް ވާހަކަދައްކަވަން މަސައްކަތްކުރެއްވި ވަގުތު، އިމްރާން އެކަމަށް ހުރަސްއަޅުއްވަން މައިކް ދުރަށް ޖައްސަވަން މަސައްކަތްކުރެއްވިއެވެ. އަދި ސަމީރު ވެސް މައިކު ހިފަހައްޓަވައި، މައުރޫފަށް ވާހަކަދެއްކެވުމުގެ ފުރުސަތު ދެއްވަން މަސައްކަތްކުރެއްވިއެވެ. މި ހާދިސާގައި މައިކު ދެކޮޅަށް ދަމަމުން ގޮސް، އިމްރާން މައިކް އުފުރާލައްވައި ވައްޓާލިއެވެ.

މި މައްސަލަ މިއަދު ބެއްވި ސުލޫކީ ކޮމިޓީ ބައްދަލުވުމުގައި އެޖެންޑާކޮށް ބަލައި، މައިކަށް ލިބުނު ގެއްލުމުގެ އަގު ނެގުމަށް ވަނީ ނިންމާފައެވެ.

އެގޮތުން އެ ކޮމެޓީގައި މަޑަވެލި ދާއިރާގެ މެންބަރު މުހައްމަދު ޝަމީޒް ހުށަހެޅުއްވި ގޮތަށް، މައިކަށް ލިބުނު ގެއްލުން އަނބުރާ ހޯދުމަށް، މައިކަށް ހިނގި ޚަރަދު ސާފުކުރުމަށްފަހު މެންބަރުންގެ އަތުން އަގު ނެގުމަށް ވަނީ ނިންމާފައެވެ. މި ހުށަހެޅުމަށް ކިނބިދޫ ދާއިރާގެ މެންބަރު އަލީ އަޝްރަފް ވަނީ ތާއީދުކުރައްވާފައެވެ.

މަޖިލީހުގައި ހިމެނޭ ތަކެއްޗަކީ ދައުލަތުގެ މުދަލަށް ވާތީ، އެ ތަކެއްޗަށް ގެއްލުން ދިނުމުގެ މައްސަލަތައް ސުލޫކީ ކޮމިޓީއަށް ހުށަހަޅައިގެން ބެލުމުގެ ފުރުސަތު މަޖިލީހުގެ ސުލޫކީ ކޮމެޓީއަށް އޮވެއެވެ.