ނާގޯށި ތަރައްޤީކުރަން ބީއެމްއެލުން ފައިސާ ހޯދަނީ!

ސަރުކާރާއި ރައްޔިތުންގެ ޓޫރިޒަމް ކުންފުނި، އެމްޓީޑީސީން ހދ.އަތޮޅުގައި ތަރައްޤީކުރަމުންދާ ނާގޯށި ނިންމަން ބޭންކް އޮފް މޯލްޑިވްސްއިން ފައިސާ ހޯދުމަށް މަސައްކަތްކުރަމުންގެންދާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ހދ.ނާގޯއްޓަކީ ފަތުރުވެރިކަމުގެ މަންފާ ދިވެހި ރައްޔިތުންނަށް ސީދާ ގޮތެއްގައި ހޯދައިދިނުމަށް ރައީސް މައުމޫން ވެރިކަމުގައި ހެދި ކުންފުނި، އެމްޓީޑީސީއަށް ރިސޯޓް ހެދުމަށް ދިން ރަށްތަކުގެ ތެރެއިން ރަށެކެވެ. އެމްޓީޑީސީން ނާގޯށި ތަރައްޤީކުރުމަށް އެތައް ފަހަރެއްގެ މަތިން މަސައްކަތްކުރި ނަމަވެސް އަދިވެސް އެރަށް އޮތީ ތަރައްޤީ ނުކުރެވިއެވެ.

ރައީސް ޑރ.މުއިއްޒު ހއ. އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ފިއްލަދުއަށް ވަޑައިގެން އެ ރަށު ރައްޔިތުންނާ ބައްދަލު ކުރައްވައި ވާހަކަދައްކަވަމުން ވިދާޅުވީ، ރިސޯޓެއްގެ ގޮތުގައި ތަރައްޤީކުރަން ފަށައި މަޑުޖެހިފައޮތް ނާގޯށި ނިންމުމަށް ބޭނުންވާ ފައިސާ ބީއެމްއެލް މެދުވެރިކޮށް ހޯދުމުގެ މަސައްކަތް ފަށާފައިވާކަމަށެވެ. ރައީސް ވިދާޅުވީ ހަނިމާދޫ އިންޓަރނޭޝަނަލް އެއާޕޯޓް ތަރައްޤީކުރުމުގެ މަސައްކަތް ނިމެމުން އަންނައިރު، އެ ސަރަހައްދުގައި ޓޫރިޒަމް ތަރައްޤީކުރުން މުހިއްމުކަމަށެވެ. ރައީސް ވިދާޅުވީ ނާގޯށީގެ އިތުރުން އެ ސަރަހައްދުން އިތުރު ރަށްތައްވެސް ރިސޯޓް ހެދުމަށް ހުޅުވާލާނޭކަމަށެވެ.

ނާގޯށި ތަރައްޤީކުރުމަށް ބީއެމްއެލުން ފެސިލިޓީއެއް ހޯދުމުގެ މަސައްކަތް ކުރަމުންދާކަމަށް ރައީސް ވިދާޅުވިއިރު، އެމްޓީޑީސީން ނާގޯށި ތަރައްޤީކުރުމުގެ މަސައްކަތްކުރާތާ މިހާރު 18 އަހަރަށްވުރެ ގިނަދުވަސް ވެއްޖެއެވެ. އެމްޓީޑީސީގެ ތަފާސްހިސާބުތަކަށް ބަލާއިރު ނާގޯށީގެ ނިމިފައިވަނީ 40 އިންސައްތަ އެވެ. މައުލޫމާތު ލިބިފައިވާ ގޮތުގައި 2022 ވަނަ އަހަރަށްފަހު ނާގޯށީގެ މަސައްކަތް އެދެވޭ ގޮތެއްގައި ކުރިއަށް ގޮސްފައެއް ނުވެއެވެ.

ނާގޯށީގެ އިތުރުން އެމްޓީޑީސީން ވަނީ ހއ އުލިގަމުގައި ސިޓީ ހޮތަލެއް ހެދުމުގެ މަސައްކަތްވެސް ކުރިއަށްގެންގޮސްފައެވެ. ނަމަވެސް ބައެއް ރޫމްތައް ރާނަން ފެށިފަހުން އެމްޓީޑީސީން ފަހުންވަނީ އެތަންވެސް ދޫކޮށްލާފައެވެ. އެމްޓީޑީސީން ވަނީ މީގެ ކުރިން ހެރެތެރެވެސް ހިންގުމަށް މަސައްކަތްކޮށްފައެވެ. ނަމަވެސް އެތަންވެސް ނުހިންގިގެން އެމްޓީޑީސީން ވަނީ އެތަންވެސް ދޫކޮށްލާފައެވެ.

ރިސޯޓް ހޮޓާ ތަރައްޤީކުރުމުގެ ވިޔަފާރިން އެމްޓީޑީސީއަށް ނާކާމިޔާބީއާ ކުރިމަތިލާން ޖެހުނު ނަމަވެސް އެކުންފުނިން އަންނަނީ ހުޅުމާލެއިން ބިމެއްގަނެ، ކާމިޔާބުކަމާއެކު އެކުންފުނީގެ އޮފީސް އިމާރާތް އެޅުމުގެ މަސައްކަތް ނިންމަމުންނެވެ.