އިހަވަންދިއްޕޮޅު ތަރައްޤީކުރުމަށް ފްރީޒޯން ކުންފުންޏަށް

މި ސަރުކާރުގެ އެންމެ މުޙިއްމު އެއް ޕްރޮޖެކްޓްކަމަށްވާ އިހަވަންދިއްޕޮޅުގައި ޓްރާންސްޝިޕްމަންޓް ބަނދަރު ތަރައްގީ ކުރުމުގެ މަސައްކަތް މި ސަރުކާރުން އަލަށް އުފެއްދި މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯން ކުންފުންޏާއި ހަވާލުކުރަން ކެބިނެޓުން ނިންމައިފިއެވެ.

މިކަން ހާމަކުރައްވާފައި ވަނީ މިސަރުކާރުގެ އިކޮނޮމިކް މިނިސްޓަރު މުހައްމަދު ސައީދު މިއަދު އެކްސް މެދުވެރި ކުރައްވާ ކުރެއްވި އެކްސް ޕޯސްޓެއްގައެވެ.

މިނިސްޓަރ ސައީދު ވިދާޅުވީ، އިހަވަންދިއްޕޮޅު ތަރައްގީ ކުރުމުގެ މަޝްރޫއު މޯލްޑިވްސް އިކޮނޮމިކް ގޭޓްވޭގެ ނަމުގައި ކުރިއަށް ގެންދިޔުމަށާއި، އެމްއައިޑީއެފްޒެޑް އާ ހަވާލުކުރުމަށް މިއަދުގެ ކެބިނެޓު ބައްދަލުވުމުގައި ނިންމާފައިވާ ކަމަށެވެ.

"މި ނިންމުމާ އެކު، އެމްއައިޑީއެފްޒެޑްއިން އެ ތަނުގައި ޕޯޓާއި ސްޓޯރޭޖް އަދި ރީއެކްސްޕޯޓު ޒޯނެއް ތަރައްގީ ކުރުމުގެ މަސައްކަތް ވަރަށް އަވަހަށް ފަށާނެ،"

މިނިސްޓަރ ސައީދު ވިދާޅުވެފައިވެއެވެ.

"މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯން" އަކީ 100 ޕަސެންޓު ދިވެހި ކުންފުންޏެއްގެ ގޮތުގައި، ރާއްޖޭގެ އިގުތިސޯދީ ރައްކާތެރިކަން ކަށަވަރުކުރުމާއި ވެލިއުއެޑް ކުރުމާއި ޓްރާންޝިޕްމަންޓް އަދި ރިއެކްސްޕޯޓް ވިޔަފާރި އަށް ހާއްސަކޮށްގެން މި ސަރުކާރުން އުފައްދަން ނިންމާފައިވާ ކުންފުންޏެކެވެ.

އެ ކުންފުނި އުފެއްދުމަށް ނިންމާފައިވަނީ ފަސް ކުންފުންޏެއްގެ ބައިވެރިވުން އޮވެގެންނެވެ. އެ ފަސްކުންފުންޏަކީ އެސްޓީއޯ އާއި އާބަންކޯ އާއި އެމްޕީއެލް އާއި އެމްޓީސީސީ އަދި އެމްއޭސީއެލް އެވެ.

މިނިސްޓަރ ސައީދު އެކްސްގައި ވިދާޅުވި އިހަވަންދިއްޕޮޅު ނޫނީ އައިހެވަން އަކީ 2014 ވަނަ އަހަރު ކުރީގެ ރައީސް އަބްދުﷲ ޔާމީންގެ ސަރުކާރުން އިއުލާނު ކުރި ޕްރޮޖެކްޓެކެވެ. އެ ޕްރޮޖެކްޓަކީ އިހަވަންދިއްޕޮޅުގައި ޒަމާނީ ބަނދަރަކާއި އެކު، ބަނދަރުގެ ވިޔަފާރި އަށް ބޭނުންވާ އިތުރު ދާއިރާތަކެއް ހިމެނޭ މަޝްރޫއެކެވެ.

ނިމިދިޔަ އިބުރާހިމް މުހައްމަދު ޞާލިހުގެ ސަރުކާރުން ވެސް އިހަވަންދިއްޕޮޅުގައި ޓްރާންސްޝިޕްމަންޓް ބަނދަރެއް ހެދުމުގެ މަސައްކަތް އިއުލާނުކުރިއެވެ. ނަމަވެސް ފަސް އަހަރު ނިމުނު އިރު ވެސް އެ ޕްރޮޖެކްޓްގެ އެއްވެސް މަސައްކަތެއް ފެށިފައެއް ނުވެއެވެ.

އިހަވަންދިއްޕޮޅު ޕްރޮޖެކްޓަކީ މި ސަރުކާރުގެ ވައުދުތަކުގެ ތެރޭގައި ހިމެނޭ މުޙިއްމު އެއްވައުދެވެ.