ޒަކާތު ފަންޑުންދޭ ސްކޮލަރޝިޕްތައް އަންނަ ހޮނިހިރުދުވަހު ހަވާލުކުރަނީ
ލިޔުންތެރިޔާ
އަބްދުﷲ ހުސައިން
ދިވެހިރާއްޖޭގެ ޒަކާތު ފަންޑުން ދިނުމަށް ނިންމާފައިވާ ސްކޮލަރޝިޕްތައް އަންނަ ހޮނިހިރުދުވަހު ހަވާލުކުރުމަށް ނިންމާފައިވާކަމަށް އިސްލާމިކް މިނިސްޓްރީން ބުނެފިއެވެ.
އިސްލާމިކް މިނިސްޓްރީން ވަނީ މީގެ ކުރިން ޒަކާތު ފަންޑުން ދިނުމަށް ނިންމާފައިވާ ސްކޮލަރޝިޕްތައް ވަރަށް އަވަހަށް ހަވާލުކުރާނޭކަން ހާމަކޮށްފައެވެ. މިކަމާ ގުޅޭގޮތުން އިސްލާމިކް މިނިސްޓަރު ޑރ.މުހައްމަދު ޑރ.ޝަހީމް އަލީ ސައީދު ވިދާޅުވީ، ޒަކާތު ފަންޑުގެ ސްކޮލަރޝިޕްތައް އަންނަ ހޮނިހިރުދުވަހު ހަވާލުކުރުމަށް ތައްޔާރުވަމުންދާކަމަށެވެ.
މިނިސްޓަރު ވިދާޅުވީ، މިސްކޮލަރޝިޕް އަލުން ދޭން ފެށެނީ މެދުކެނޑިފަ އޮންނާތާ 7 އަހަރު ފަހުންކަމަށެވެ. އެގޮތުން މިފަހަރު ސްކޮލަރޝިޕް ދެވެނީ އިސްލާމީ ދާއިރާތަކުން މަތީ ތައުލީމަށްކަމަށްވެސް މިނިސްޓަރު ވިދާޅުވިއެވެ. އެހެންކަމުން މިއީ އިސްލާމީ ދާއިރާތަކުން މިހާ ގިނަ އަދަދަދަކަށް މަތީ ތައުލީމަށް ސްކޮލަރޝިޕް ދެވޭ ފުރަތަމަ ފަހަރުކަން މިނިސްޓަރު ޝަހީމް ވިދާޅުވިއެވެ.
ރާއްޖެއިން ބޭރުގައި މަތީ ތައުލީމް ހާސިލްކުރާ ދަރިވަރުންނަށް ޒަކާތު ފަންޑުން މާލީ އެހީ ދިނުމަށް ވަޒީރުންގެ މަޖިލީހުން ނިންމެވީ 2012 ވަނަ އަހަރުގެ މާރިޗްމަހުގެ 6 ވަނަ ދުވަހު އޭރުގެ ރައީސުލްޖުމްހޫރިއްޔާ ޑރ.މުހައްމަދު ވަހީދު ހަސަން މަނިކްގެ ކެބިނެޓުންނެވެ.
އޭރު އިސްލާމިކް މިނިސްޓަރަކަށް ހުންނެވީވެސް ޑރ.ޝަހީމެވެ. އެފަހަރު ޒަކާތު ފަންޑުން 20 ވިލިއަން ރުފިޔާ ސްކޮލަރޝިޕް ދެއްވުމަށް ނިންމެވިއިރު، ޒަކާތު ފަންޑުން ސްކޮލަރޝިޕަށް ފަންޑް ދިނުމަށް ނިންމީ އިސްލާމިކް މިނިސްޓްރީން ހުށަހެޅި ހުށަހެޅުމެއްގެ މައްޗަށް ބިނާކޮށެވެ. އެ ހުށަހެޅުމަކީ މަތީ ތަޢުލީމު ޙާޞިލުކުރަން ބޭނުންވާ ކުދިންގެ ތެރެއިން އެ ފުރްޞަތު ލިބިފައިނުވާ ކުދިންނަށް ޒަކާތު ފަންޑުން އެ ފުރްޞަތު ތަނަވަސްކޮށްދިނުމެވެ.
މިއަހަރުގެ ފުރަތަމަ ހަމަސްދުވަހުގެ ނިޔަލަށް ޒަކާތު ފަންޑަށް 60 މިލިއަނަށް ވުރެ ގިނަ ރުފިޔާ ލިބުނުއިރު، 30.07 މިލިއަން ރުފިޔާ އެކި ކަންކަމުގައި ހޭދަކުރެވިފައިވާކަމަށް ޒަކާތު ހައުސްގެ ތަފާސްހިސާބުތަކުން ދައްކައެވެ. މީގެ ތެރޭގައި ފަގީރުންނާއި މިސްކީނުންގެ ދަފްތަރުގައި ރަޖިސްޓްރީވެފައިވާ ފަރާތްތަކަށާއި ނުސީދާގޮތުން ފަޤީރުންނާއި މިސްކީނުންގެ ބައިން ޚާއްޞަ ޙާލަތްތައް މެދުވެރިވެގެން ޙާލުގައި ޖެހޭ ފަރާތްތަކަށް ކުރި ހޭދައާއި ކެންސަރުފަދަ ބަލިތަކަށް ހޭދަކޮށްފައިވާކަން ފާހަގަކޮށްލެވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
