މަސައްކަތް ފެށިތާ 28 ދުވަހުގެ ތެރޭ އަމީނީމަގުގެ ފަހު ދެބައިގައި ތާރުއަޅައި ނިންމާލައިފި

އަމީނީމަގުގެ ފަހު ދެ ސެގްމެންޓްގައި ތާރު އެޅުމުގެ މަސައްކަތް ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) އިން ނިންމާލައިފިއެވެ.

އާރުޑީސީއިން އެކްސް ގައި ކުރި ޕޯސްޓެއްގައި ބުނީ އަމީނީމަގު ސެގްމެންޓް 12 އަދި 13 ގައި ތާރު އެޅުމުގެ މަސައްކަތް މިހާރު ވަނީ ނިމިފައިކަމަށެވެ.

ކުރީ ސަރުކާރުން ފެށި އަމީނީމަގު ހެދުމުގެ މަޝްރޫއުގެ ނުނިމި އޮތް ބައިގެ މަސައްކަތް، ރައީސް ޑރ. މުއިއްޒުގެ ސަރުކާރުން މިދިޔަ އަހަރުގެ ޑިސެންބަރު މަހުގެ 9 ގައި ވަނީ އަލުން ފަށާފައެވެ.

މި މަސައްކަތް ބާރު ސްޕީޑްގައި ކުރިއަށް ދަނިކޮށް ރާއްޖެއަށް ދާދި ފަހުން ކުރި ވިއްސާރައިގައި މަސައްކަތް ވަނީ މެދުކެނޑިފައެވެ. ނަމަވެސް މޫސުން ރަނގަޅު ވުމާއި އެކު މަސައްކަތް އަލުން ފަށައި އަމީނީ މަގު ވަނީ އެއްކޮށް ނިންމާލާފައެވެ.

އެ މަގުގެ ފަހު ސެގްމެންޓް ފުޅާ ކޮށްހަދައި، އަމީނީމަގު ތަރައްގީ ކުރުމުގެ މަސައްކަތުގެ ތެރެއިން، ފެންބޮޑުވުމުގެ މައްސަލައަށް ހައްލު ގެނައުމަށްޓަކައި ޕަމްޕް ވެސް ވަނީ ބަހައްޓާފައެވެ.

ރައީސް ޑރ.މުޢިއްޒު ވަނީ މިއަދުގެ ފަތިސް ނަމާދަށް ފަހު އަމީނީ މަގުގެ ތާރު އެޅުމުގެ މަސައްކަތް ކުރިއަށްދާ ގޮތް ގާތުން ބެއްލެވުމަށް މަސައްކަތް ކުރަމުންދާ ސަރަހައްދަށް ޒިޔާރަތް ކުރައްވާފައެވެ.