ފުލުހުންގެ ތަހުގީގީ މިންގަނޑު ކަނޑައެޅުމުގެ އިހްތިޔާރެއް ނެތް: އެމްއެމްބީސީ

ފުލުހުންގެ ތަހުގީގީ މިންގަނޑު ކަނޑައެޅުމުގެ އިހްތިޔާރެއް ނެތްކަމަށް މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން (އެމްއެމްބީސީ) އިން ބުނެފިއެވެ.

އެމްއެމްބީސީން މިހެން ބުނެފައިވަނީ، އެ އިދާރާއިން އަދަދުގެ ވަސީލަތްތައް ފުލުހުންގެ ބެލުމުގެ ދަށަށް ގެންދިއުމާ ގުޅޭގޮތުން މިއަދު ނެރުނު ނޫސްބަޔާނެއްގައެވެ.

އެމްއެމްބީސީން ބުނި ގޮތުގައި، ފުލުހުންގެ ހިދުމަތުން ތަހުގީގަށް ބޭނުންވާ މައުލޫމާތު ހޯދުމުގައި އަމަލުކުރަންޖެހޭ މިންގަނޑުތައް ކަނޑައެޅުމުގެ އިހްތިޔާރު އެމްއެމްބީސީއަށް ލިބިގެނެއް ނުވެއެވެ. އެގޮތުން އެމްއެމްބީސީން ވަނީ، މީޑިއާތަކުން އާންމުކުރާ ކޮންޓެންޓާއި ގުޅުހުންހުރި މައްސަލަތައް ބަލައި ތަހުގީގު ކުރުމާއި އިދާރީ ފިޔަވަޅު އަޅަން ޖެހިއްޖެ ހިނދެއްގައި އެކަންތަންފީޒު ކުރުމުގެ ޒިންމާ އަދާކުރާނެ ކަމަށް ބުނެފައެވެ.

މީގެ އިތުރުން، ނޫސްވެރިކަމަކީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 28 ވަނަ މާއްދާ "ނޫސްވެރިކަން ކުރުމާއި، މުއާސަލާތީ ވަސީލަތްތައް ބޭނުންކުރުމުގެ މިނިވަކަން ކޮންމެ މީހަކަށް ލިބިގެންވެއެވެ. މީގެތެރޭގައި، ޚަބަރާއި، މައުލޫމާތާއި، ފެންނަ ގޮތްތަކާއި، ހިޔާލުތައް ފާޅުކުރުމާއި، ޝާއިޢުކުރުމާއި، ފެތުރުމުގެ މިނިވަަންކަން ހިމެނެއެވެ. ޝައިޢުކުރާ ނުވަތާ ފަތުރާ ނުވަތަ ފާޅުކުރާ މައުލޫމާތެއްގެ މަސްދަރު ހާމަކުރުމަށް އެއްވެސް މީހަކަށް މަޖްބޫރުކޮށްގެނެއް ނުވާނެއެވެ." އިން ކަށަވަރު ކޮށްދީފައިވާ އަސާސީ މިނިވަން ކަމެއްކަމުގައި ވީހިނދު، އެމްއެމްބީސީ އަކީ އެ މިނިވަންކަން ވީހާވެސް ފުޅާ ދާއިރާއެއްގައި ކުރިއަރުވައި ތަރައްގީކޮށް ދެމެހެއްޓުމުގައި، ރެގިއުލޭޓަރެއްގެ ހައިސިއްޔަތުން އިދާރީ ގޮތުން ކަނޑައަޅަންޖެހޭ މިންގަނޑުތައް ކަނޑައަޅައި ތަންފީޒުކުރުމަށް ގާނޫނު ނަންބަރު 16/2025 (މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ގާނޫނު) އިން މަތިކޮށްފައިވާ ގާނޫނީ ޝަހުސެއްކަން އެ އިދާރާއިން ވަނީ ފާހަގަކޮށްފައެވެ.

ހޯމަ ދުވަހު ރައީސް ޑރ. މުހައްމަދު މުއިއްޒު ބޭއްވި ނޫސްވެރިންގެ ބައްދަލުވުމުގައި، އަދަދު ނޫހުން ކުރި ސުވާލަކަށް ޖަވާބު ދެއްވަމުން ރައީސް ވަނީ، އަދަދު ނޫހުން ހެދި "އައިޝާ" ޑޮކިއުމެންޓަރީ އަކީ ދޮގެއް ކަމުގައި ވިދާޅުވެ، އެ މައްސަލަ ބެލުމަށް އެދި ގޮވާލާފައެވެ. އެހެންކަމުން، ހޯމަ ދުވަހުގެ ރޭ ފުލުހުން ވަނީ އަދަދު ނޫސް ކޯޓު އަމުރެއްގެ ދަށުން ބަލައިފާސްކޮށްފައެވެ. އަދި މިއަދު އަދަދު ނޫހުގެ ސީއީއޯ އަދި އެ ނޫހުގެ މެނޭޖިންގ އެޑިޓަރ ވަނީ ފުލުހުންގެ އިދާރާއަށް ހާޒިރުކޮށްފައެވެ.