4,000 ފްލެޓް ހިމެނޭ ޓަވަރުތަކުގެ، ކޮމާޝަލް ޔުނިޓްތައް ދޫކުރުމަށް ތައްޔާރުވަނީ

ފަހިދިރިއުޅުން ކޯޕަރޭޝަނުން ހުޅުމާލޭގެ ދެވަނަ ފިޔަވަހީގައި ތަރައްޤީކުރަމުންދާ 4،000 ހައުސިން ޔުނިޓް ހިމެނޭ، އަމާން އުދަރެސް އަދި އަމާން ދޯދި ޓަވަރުތަކުގެ ބައެއް ކޮމާޝަލް ޔުނިޓްތައް ކުއްޔަށްދޫކުރުމަށް ތައްޔާރުވެއްޖެއެވެ.

ފަހިދިރިއުޅުން ކޯޕަރޭޝަނުން މިއަދު ވަނީ ނޫސްވެރިންނަށް އެ މަޝްރޫޢުގެ ތެރޭގައި ހިމެނޭ ކޮމާޝަލް ޔުނިޓްތަކާ ގުޅޭގޮތުން މައުލޫމާތު ހިއްސާކޮށްފައެވެ. އަމާން އުދަރެސް އަދި އަމާން ދޯދި މި މަޝްރޫޢުގައި ޖުމްލަ 32 ޓަވަރު ހިމެނޭއިރު އެތަންތަން ތަރައްޤީކުރަމުންދަނީ 6 ޒޯނަކަށް ބަހާލައިގެންނެވެ. ފަހިދިރިއުޅުން ކޯޕަރޭޝަނުން ލަފާކޮށްފައިވަނީ، މި ޓަވަރުތަކުގައި 28،400 މީހުން ދިރިއުޅޭނޭކަމަށެވެ.

އަމާން އުދަރެސް އަދި އަމާން ދޯދި، މިއިން ކޮންމެ ބައެއްގައި 2،000 ހައުސިން ޔުނިޓް ހިމެނެއެވެ. މީގެ ތެރޭގައި ހިމެނެނީ 3 ކޮޓަރީގެ 1400 ޔުނިޓާއި 2 ކޮޓަރީގެ 600 ޔުނިޓެވެ. މީގެ ތެރެއިން 3 ކޮޓަރީގެ ޔުނިޓްތަކުގެ ބޮޑުމިނަކީ 900 އަކަފޫޓެވެ. އަދި 2 ކޮޓަރި ހިމެނޭ ޔުނިޓްތަކުގެ ބޮޑުމިނަކީ 650 އަކަފޫޓެވެ.

މި ޓަވަރުތަކުގައި ސުޕަމާކެޓްތަކާއި ރެސްޓޯރެންޓްތަކުގެ އިތުރުން ކްލިނިކްތައް ހިމެނެއެވެ.

އަމާން އުދަރެސް އަދި އަމާން ދޯދި ޓަވަރުތަކުގެ ކޮމާޝަލް ޔުނިޓްތަކާ ގުޅޭގޮތުން ނޫސްވެރިންނާ މައުލޫމާތު ހިއްސާކުރަމުން ފަހިދިރިއުޅުން ކޯޕަރޭޝަނުގެ ބިޒްނަސް އެނަލިސްޓް މަރިޔަމް ސޮފާ ވިދާޅުވީ، ޓަވަރުތަކުގައި ޖުމްލަ 127 ކޮމާޝަން ޔުނިޓް ހުންނާނޭކަމަށެވެ. މި ކޮމާޝަން ޔުނިޓްތަކުން ކުދި އަދި މެދުފަންތީގެ ވިޔަފާރިތަކަށް ފުރުސަތު ހުޅުވާލާނޭކަމަށް ސޮފާ ވިދާޅުވިއެވެ. ކޮމާޝަލް ޔުނިޓްތައް ހުންނާނީ ކޮންމެ ޓަވަރެއްގެވެސް ފުރަތަމަ ފަންގިފިލާގައެވެ. އެތަންތަނަކީ 580 އާއި 6200 އަކަފޫޓުގެ ތަންތަނެވެ.

ފަހިދިރިއުޅުން ކޯޕަރޭޝަނުން ތައްޔާރުވަމުންދަނީ، ފެށޭ ހަފްތާގެ ތެރޭގައި ޒޯނު އެކެއްގައި ހިމެނޭ ކޮމާޝަލް ޔުނިޓްތައް ކުއްޔަށް ދޫކުރުމަށް ހުޅުވާލާނޭކަމަށެވެ. މި ޔުނިޓްތަކުގެ އަގުތައް ހުންނާނީ މާކެޓް ރޭޓުގައިކަމަށް ފަހިދިރިއުޅުން ކޯޕަރޭޝަނުން ބުނެއެވެ.