އިޤްތިޞާދީ ކޮމިޓީގެ މުޤައްރިރަކަށް ފަޒާދު، ނައިބަކަށް ސައުދުﷲ

ރައްޔިތުންގެ މަޖިލީހުގެ އިޤްތިޞާދީ ކޮމިޓީގެ މުޤައްރިރަކަށް ފުވައްމުލަކު މެދު ދާއިރާގެ ޕީއެންސީ މެންބަރު އަލީ ފަޒާދު އިންތިޚާބު ވެއްޖެއެވެ.

މިހާރު ކުރިއަށް ދާ ވިހިވަނަ މަޖިލީހުގެ އެންމެ މުހިންމު އެއް ކޮމިޓީ ކަމަށްވާ އިޤްތިޞާދީ ކޮމިޓީގެ މުގައްރިރަކަށް ފަޒާދު އިންތިޚާބުކުރިއިރު، ނައިބު މުގައްރިރަކަށް އިންތިޚާބުކޮށްފައި ވަނީ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީއެވެ.

މަޖިލީހުގެ އިޤްތިޞާދީ ކޮމިޓީގައި ތިއްބަވަނީ 11 މެމްބަރުންނެވެ. އެ ކޮމިޓީގައި ތިއްބަވާ މެމްބަރުންނަކީ:

1) ފުވައްމުލަކު މެދު ދާއިރާގެ މެންބަރު، ޢަލީ ފަޒާދު (މުޤައްރިރު)

2) ތިނަދޫ އުތުރު ދާއިރާގެ މެންބަރު، ސަޢުދުﷲ ޙިލްމީ (ނައިބު)

3) މައްޗަންގޮޅި މެދު ދާއިރާގެ މެންބަރު، އަޙްމަދު ޟަމީރު

4) ހޯރަފުށި ދާއިރާގެ މެންބަރު، ޢަލީ މޫދާ

5) ކަނޑިތީމު ދާއިރާގެ މެންބަރު އަމީން ފައިސަލް

6) ކެނދިކުޅުދޫ ދާއިރާގެ މެންބަރު މުޙައްމަދު ޢަފޫ ޙާމިދު

7) ކެންދޫ ދާއިރާގެ މެންބަރު މަޢުރޫފް ޛާކިރު

8) ކާށިދޫ ދާއިރާގެ މެންބަރު މުއްތަސިމް އިބްރާހިމް

9) ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް

10) ފޭދޫ އުތުރު ދާއިރާގެ މެންބަރު އިސްމާޢީލް ނިޒާރު

11) މީދޫ ދާއިރާގެ މެންބަރު އަޙްމަދު ސިޔާމް މުހައްމަދު

އިޤްތިޞާދީ ކޮމިޓީގެ މުޤައްރިރަކަށް ފަޒާދުގެ ނަން ހުށަހެޅުއްވީ ސައުދުﷲއެވެ. އެ ނަމަށް ތާއީދު ކުރެއްވީ ނިޒާރެވެ. ފަޒާދު މުގައްރިރަކަށް އިންތިޚާބުވީ އެ ކޮމިޓީއަށް އެ ވަގުތު ހާޒިރުވެވަޑައިގެން ތިއްބެވި 10 މެންބަރުންގެ އިއްތިފާގުންނެވެ.

ނައިބު މުގައްރިރަކަށް ސައުދުﷲގެ ނަން ހުށަހެޅުއްވީ ނިޒާރެވެ. އަދި އެ ނަމަށް ތާއީދު ކުރެއްވީ ޟަމީރެވެ.

ނައިބު މުޤައްރަރަކަށް ކެންދޫ ދާއިރާގެ މެންބަރު މަޢުރޫފް ޛާކިރު، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލްގެ ނަން ވެސް ހުށަހަޅުއްވާފައެވެ. އެ ނަން ހުށަހަޅުއްވާ މައުރޫފް ވިދާޅުވީ އެ ހުށަހެޅުން ހުށަހެޅުއްވީ މައިނޯރިޓީކަން އެނގިވަޑައިގެން ކަމަށެވެ. ނަމަވެސް ނާޒިލް މިދިޔަ ދައުރުގައިވެސް އެ ކޮމިޓީގެ ނައިބު މުގައްރިރުކަން ކުރައްވާފައިވާ ވުމާއެކު، އެ ކޮމިޓީއަށް ނާޒިލް ގިނަ މަސައްކަތްތަކެއް ކޮށްދެއްވާ ތަޖުރިބާ ލިބިވަޑައިގެންފައިވާކަން މަޢުރޫފު ފާހަގަ ކުރެއްވިއެވެ. ނާޒިލްްގެ ނަމަށް އަމީން ފައިސަލް ވަނީ ތާއީދުކުރައްވާފައެވެ.

ނިމިދިޔަ މަޖިލީހުގައި އިގްތިސޯދީ ކޮމިޓީގައި ހިމެނިވަޑައިގަންނަވަނީ 14 މެންބަރުން ނަމަވެސް އެ އަދަދު 11 އަށް ބަދަލުކުރަން، ވިހިވަނަ މަޖިލީހުގެ ފުރަތަމަ ޖަލްސާގައި ވަނީ ފާސްކޮށްފައެވެ.