ބިދޭސީންނާ ގުޅޭ ފީތަކުން ދައުލަތަށް ބިލިއަނަކަށްވުރެ ގިނަ ރުފިޔާ ހޯދިއްޖެ: އިހުސާން

ރާއްޖޭގައި މަސައްކަތްކުރާ ބިދޭސީންނާ ގުޅޭ އެކި ކަންކަމުން ދައުލަތުގެ ބައިތުލްމާލަށް ލިބެންޖެހޭ ފައިސާ ހޯދުމަށް ސަރުކާރުން ކުރަމުންގެންދާ މަސައްކަތުގެ ދަށުން މިހާތަނަށް ބިލިއަނަކަށްވުރެ ގިނަ ރުފިޔާ ހޯދާފައިވާކަމަށް ހޯމް މިނިސްޓަރު އަލީ އިހުސާން ވިދުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިހުސާން ވިދާޅުވީ، އަދުގެ ސަރުކާރު ވެރިކަމާ ހަވާލުވުމަށްފަހު ބިދޭސީންނާ ގުޅޭ އެކިއެކި ފީތަކުން ދައުލަތަށް ލިބެންޖެހޭ ފައިސާ ހޯދުމަށް މިހާތަނަށް ކުރިއަށްގެންދިޔަ މަސައްކަތްތަކުން އެދެވޭ ނަތީޖާއެއް ހާސިލްވެފައިވާކަމަށެވެ. މިގޮތުން އަހަރުގެ މިހާތަނަށް ބިދޭސީންގެ ފީތަކުން ނުލިބިފާ ފައިސާގެ ތެރެއިން ބިލިއަނަކަށްވުރެ ގިނަ ރުފިޔާ ހޯދައި ދައުލަތުގެ ބައިތުލްމާލަށް ޖަމާކޮށްފައިވާކަން މިނިސްޓަރު ފާހަގަކުރެއްވިއެވެ.

ބިދޭސީންގެ ވަރކްޕާމިޓް ފީ އާއި ވިސާފީގެ އިތުރުން ކޯޓާ ފީ އާއި ޖޫރިމަނާގެ ގޮތުގައި ދައުލަތަށް 1.7 ބިލިއަން ރުފިޔާ ލިބެންޖެހޭކަމަށް ޖޫންމަހުގެ ތިންވަނަ ދުވަހު މިނިސްޓަރު އިހްސާން ވަނީ ވިދާޅުވެފައެވެ.

މިނިސްޓަރު އިހްސާން ވިދާޅުވީ މިއަދުގެ މިހާތަނަށް އާއިރު، ބިދޭސީންނާ ގުޅޭ ފީތަކުން ދައުލަތަށް މިހާތަނަށް ނުލިބިވަނީ 703.7 މިލިއަން ރުފިޔާ ކަމަށެވެ.

ފައިސާ ނުދައްކާ ފަރާތްތައްވާނީ އެކްސްޕެޓްސިސްޓަމުން ބްލޮކްކޮށް އެމީހުންނަށް ހިދުމަތްތަް ދިނުންވެސް ހުއްޓާލާފައި. ފައިސާ ދެއްކީމައި އަނެއްކާވެސް އެމީހުނަނަށް ހިދުމަތް ދެވޭގޮތް ހަމަޖެހިގެންދާނެ

މިނިސްޓަރު އިހްސާން ވިދާޅުވިއެވެ.

މިނިސްޓަރު އިތުރަށް ވިދާޅުވީ ބިދޭސީންގެ ކަންކަން ހަމަމަގަށް އެޅުވުމަށް މިހާރު ކުރިއަށްގެންދާ އޮޕަރޭޝަން ކުރަނގީގެ ދަށުން މިހާތަނަށް 6891 ބިދޭސީންގެ ބަޔޯމެޓްރިކް ޑޭޓާތައް ނަގއި ރައްކާކޮށްފައިވާކަމަށެވެ.

މި އޮޕަރޭޝަނުގެ ދަށުން މިހާތަނަށް ރާއްޖޭގެ މީހުން ދިރިއުޅޭ ރަށްތަކުގެ ތެރެއިން 82 ރަށެއްގައި އުލޭ ބިދޭސީންގެ މައުލޫމާތު ނަގާފައިވާކަން މިނިސްޓަރު ފާހަގަކުރެއްވިއެވެ. މިނިސްޓަރު އިހުސާން ވިދާޅުވީ މިހާރު ކުރިއަށްދާގޮތަށް އޮޕަރޭޝަން ދާނަމަ، އަންނަ އަހަރުގެ ޖެނުއަރީމަސް ނިމެންވާއިރަށް ބިދޭސީންގެ މައުލޫމާތުތައް ނަގައި ނިންމާލެވޭނޭ ކަމަށެވެ.