ދެ އިންތިޚާބު އެއްދުވަހެއްގައި ބޭއްވުމަކީ ރައްޔިތުންގެ ބައިވެރިވުން އިތުރުވާނެ ކަމެއް: ޝިޔާމް

ރިޔާސީ އިންތިޚާބާއި މަޖިލިސް އިންތިޚާބު އެއް ދުވަހެއްގައި ބޭއްވުމުން، ގޮތް ނިންމުމުގައި ރައްޔިތުންގެ ބައިވެރިވުން އިތުރުކުރެވޭނެ ކަމަށް މަސްވެރިކަމާބެހޭ ވަޒީރު، އަހުމަދު ޝިޔާމް ވިދާޅުވެއްޖެއެވެ.

ޕީއެންސީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޝިޔާމް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ ރައްޔިތުންގެ ގާތުން، ރައްޔިތުންގެ ޚިޔާލު ހޯއްދަވައިގެން ކަންކަން ކުރިއަށް ގެންދަވާ ބޭފުޅެއް ކަމަށެވެ.

އަދި ދިވެހިރާއްޖޭގައި ކަންކަން ހިންގަމުން އަންނަނީ ޑިމޮކްރަސީގެ ނިޒާމަށް ކަމަށާ، ރާއްޖޭގައި ކަންކަން ނިންމަމުންދަނީ ރައްޔިތުން ބޭނުންވާ ގޮތަށް ކަމަށެވެ. އެހެންކަމުން، އެންމެ މުހިންމު ކަމަކީ ނިންމާ ނިންމުންތަކުގައި ގިނަ ރައްޔިތުން ޝާމިލްވުން ކަމަށް އޭނާ ވިދާޅުވިއެވެ.

މިއާއެކު ޝިޔާމް ވަނީ، އިންތިޚާބު ތަކުގެ ތަފާސް ހިސާބުތަކަށް އަލި އަޅުވާލައްވަމުން، ރިޔާސީ އިންތިޚާބުގައި ވޯޓުލާ މީހުންގެ ނިސްބަތަށްވުރެ މަޖިލިސް އިންތިޚާބުގައި ވޯޓުލާ މީހުންގެ ނިސްބަތް ކުޑަވާކަން ފާހަގަކުރައްވާފައެވެ.

ދެ އިންތިޚާބު އެއްދުވަހެއްގައި ބޭއްވިއްޖެ ކަމަށްވާނަމަ ރައްޔިތުންގެ ބައިވެރިވުނާއެކީގައި އިންތިޚާބުގެ ކަންކަން އެ ނިމިގެން ދަނީ. އެހެންވެއްޖެ ކަމަށްވަންޏާމުން އަޅުގަނޑުމެން ޑިމޮކްރަސީ ހަރުދަނާ ކުރަން އުޅޭ ބައެއް ކަަމަށް ވަންޏާމުން އެކަމަށް ވަރަށް ބޮޑަށް އެބަ ބާރުލިބޭ.

މަސްވެރިކަމާ ބެހޭ ވަޒީރު އަހުމަދު ޝިޔާމް

ޝިޔާމް އިތުރަށް ވިދާޅުވީ، ކުރީގެ ރައީސް އިބްރާހިމް މުޙައްމަދު ޞާލިޙް، އެމަނިކުފާނުގެ ވެރިކަމުގައި، ތިން އިންތިޚާބު އެއް ދުވަހެއްގައި ބޭއްވުމަށް ތާއީދު ކުރައްވައި ވާހަކަދައްކަވާފައިވާ ކަމަށެެވެ. އޭގެ ސަބަބެއް ކަމުގައި އެމަނިކުފާނު އޭރު ފާހަގަކުރެއްވީ އިންތިޚާބުގެ ކަންކަމުގައި މީހުން ހަލަބޮލިވެ އުޅެންޖެހުމުން، ސަރުކާރުން ރައްޔިތުންނަށް ފޯރުކޮށްދޭންޖެހޭ ޚިދުމަތްތައް ފޯރުކޮށްދިނުމަށް ދަތިވާތީ ކަމަށެވެ.

ނަމަވެސް އަދުގެ ސަރުކާރުން އެކަން ކުރަން އުޅޭތީ އެމްޑީޕީގެ އެ ވިސްނުން މިއަދު ބަދަލުވެފައިވާކަމަށްވެސް ޝިޔާމް ވިދާޅުވިއެވެ.

މީގެ އިތުރުން އިންތިޚާބުތައް އިތުރުވުމަކީ ދައުލަތުގެ ޚަރަދުތަކާއި، އަމިއްލަ ރައްޔިތުންގެ ޖީބުން ކުރަންޖެހޭ ޚަރަދުތައްވެސް އިތުރުވާކަމެއްކަން ތަފާސްހިސާބުތަކުގެ އަލީގައި ޝިޔާމް ވަނީ ހާމަކޮށްދެއްވާފައެވެ.

ހަމައެހެންމެ އެއް އިންތިޚާބުގެ ތެރޭގައި ރައްޔުތުންގެ މެދުގައި އުފެދޭ ހަލަބޮލިކަން އަނެއް އިންތިޚާބަށް އަންނައިރުވެސް ނުލިފާ ކަމަށާ، އޭގެ ސަބަބުން ރަށުގެ އިޖުތިމާޢީ އަދި އިގްތިޞާދީ ތަރައްގީއަށް ކުރަން ހުންނަ ކަންކަމަށްވެސް ބުރޫ އަރާކަން ޝިޔާމް ފާހަގަކުރެއްވިއެވެ.

އަދި އިންތިޚާބު ތަކާ ދިމާކޮށް، އިދިކޮޅު ފަރާތްތަކުން ހަގީގަތާއި ޚިލާފް ވާހަކަތައްވެސް ފަތުރަމުންދާ ކަމަށާ އޭގެ ސަބަބުން ރާއްޖެއިން ބޭރުން ލިބެން ހުންނަ އިންވެސްޓްމަންޓްތަކަށްވެސް ހުރަސް އެޅޭކަމަށް ޝިޔާމް ވިދާޅުވިއެވެ.