އަހަރުގެ މިހާތަނަށް ޗައިނާއިން ރާއްޖެއަށް ލައްކައެއްހާ ފަތުރުވެރިން ޒިޔާރަތްކޮށްފި!

މި އަހަރުގެ މޭ މަހުގެ 15 ވަނަ ދުވަހާއި ހިސާބަށް ޗައިނާ އިން ރާއްޖެ އަށް ލައްކަ އަކާއި ގާތްކުރާ އަދަދަކަށް ފަތުރުވެރިން ޒިޔާރަތްކޮށްފިއެވެ.

ފަތުރުވެރިކަމާއި ބެހޭ ވުޒާރާއިން އާއްމު ކުރާ ޑެއިލީ އަޕްޑޭޓްސް އިން ދައްކާ ގޮތުގައި މިދިޔަ އަހަރުގެ މިމުއްދަތުގައި ފަތުރުވެރިކަމުގެ މާކެޓްގެ ތިން ވަނައިގައި އޮތް ޗައިނާ އިން މި އަހަރުގެ މިހާތަނަށް 92,773 ފަތުރުވެރިން ވަނީ ޒިޔާރަތްކޮށްފައެވެ.

އެއާއިއެކު މާކެޓްގެ އެއްވަނައިގައި ޗައިނާ އޮތް އިރު ދެން ރާއްޖެ އަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ރަޝިއާއިންނެވެ. އެގޮތުން އެގައުމުން 84,162 ފަތުރުވެރިން ޒިޔާރަތްކޮށްފައިވާއިރު، 79,721 ފަތުރުވެރިންނާއި އެކު ތިން ވަނައިގައި ވަނީ އިނގިރާސިވިލާތެވެ.

މިދިޔަ އަހަރު މާކެޓް ގެ އެއްވަނައިގައި އޮތް އިންޑިއާއިން ރާއްޖެ އަށް ޒިޔާރަތްކޮށްފައިވަނީ 47,315 ފަތުރުވެރިންނެވެ. ރާއްޖޭގެ ފަތުރުވެރިކަމުގެ މާކެޓް ގައި މިއަހަރު އިންޑިއާ އޮތީ ހަވަނައިގައި އެވެ.

ފާއިތުވި އަހަރާއި އަޅާބަލާއިރު މި އަހަރުގެ މި މުއްދަތުގައި ރާއްޖެ އަށް ޒިޔާރަތް ކުރި ފަތުރުވެރިންގެ އަދަދު ވަނީ 11.6 އިންސައްތަ އިތުރުވެފައިކަން ފާހަގަކޮށްލަން ޖެހެއެވެ. އެގޮތުން މިއަހަރުގެ މިހާތަނަށް ޖުމްލަ 833,728 ފަތުރުވެރިން ރާއްޖެއަށް ޒިޔާރަތް ކޮށްފައިވާއިރު، މިދިޔަ އަހަރުގެ މި މުއްދަތުގައި ރާއްޖެ އަށް ޒިޔާރަތްކޮށްފައިވަނީ 747,218 ފަތުރުވެރިންނެވެ.

ހަމައެއާއިއެކު މި ހިނގާ މޭމަހު ރާއްޖެ އަށް އެންމެ ގިނައިން ފަތުރުވެރިން ޒިޔާރަތް ކުރީ މި މަހުގެ ފުރަތަމަ ދުވަހުއެވެ. އެއީ 6,424 ފަތުރުވެރިންނެވެ.