ޕީއެންއެފް ޖަލްސާ ހުއްޓުވަން އެސްއޯ ފުލުހުން ނުކުތް ސަބަބު ބަލަނީ

ކުރީގެ ރައީސް ޔާމީން އަބްދުލްގައްޔޫމް އިސްވެ ހުންނަވައި އުފެއްދެވި, ޕީޕަލްސް ނެޝަނަލް ކޮންގްރެސް (ޕީއެންއެފް) އުފެއްދުމަށް ރޭ ބޭއްވި ޖަލްސާ ގިޔާސުއްދީން ސްކޫލުގައި ބާއްވަން އުޅުމުން އެކަން ހުއްޓުވުމަށް ފުލުހުންގެ އެސްއޯ ފައުޖު ބޭނުންކުރި ސަބަބު ރިވިއުކޮށް ބެލުމަށް އަންގާފައިވާ ކަމަށް ހޯމްލޭންޑް އެންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެއެވެ.

ޕީއެންއެފް އުފައްދާ ޖަލްސާ ރޭ 9 ޖަހާއިރު އެންމެ ފުރަތަމަ ބޭއްވުމަށް ހަމަޖެހިފައި އޮތީ ގިޔާސުއްދީން އިންޓަނޭޝަނަލް ސްކޫލުގައެވެ.

ނަމަވެސް, ފުލުހުން ވަނީ މި ޖަލްސާއަށް ހުރަސްއަޅާފައެވެ. ފުލުހުން ވިދާޅުވިގޮތުގައި އެ ޖަލްސާ ހުއްޓުވާފައިވަނީ އެ ސްކޫލުގެ ހޯލު ދޫކުރުމަށް ހެދި އެއްބަސްވުން މިއަދު މެންދުރު ފަހު ބާތިލުކުރުމަށް ފަހު ވެސް, އެ ސްކޫލުގައި ޖަލްސާ ބާއްވަން އުޅުމުން ސްކޫލްގެ ތައްކާތެރިކަން ކަށަވަރުކުރުމަށް އެ ސްކޫލުން އެދިފައިވައިވުމުންނެވެ.

ފުލުހުންގެ އެސްއޯ އާއި ޕީއެންއެފްގެ މެންބަރުންގެ ކުރިމަތިލުމަކަށް ގޮސް، ޕެޕާ ސްރޭ ޖަހާފައިވެއެވެ.

މިކަމާ ގުޅިގެން މިނިސްޓަރު އިހުސާން ރޭ ކުރި ޓުވީޓެއްގައި ވިދާޅުވީ ސުލްހަވެރި އެއްވުންތަކާއި, އިހުތިޖާޖުތަކުގެ ސަލާމަތީ ކަންކަން ބަލަހައްޓާއިރު, ހާލަތާ ނުބައްދަލު ބާރު ބޭނުން ނުކުރުމަށް ރައީސް ޑރ. މުހައްމަދު މުއިއްޒު އަންގަވާފައިވާ ކަމަށެވެ.

ވަކިން ޚާއްސަކޮށް, ޚާއްސަ ހާލަތެއްގައި މެނުވީ އެސްއޯ ފުލުހުން ބޭނުން ނުކުރުމަށް ވެސް އަންގަވާފައިވާ ކަމަށް އޭނާ ވިދާޅުވިއެވެ.

"ރޭ ޣިޔާސުއްދީން ސްކޫލު ކައިރީގައި ފުލުހުން މަސައްކަތް ކުރެއްވި ގޮތް އަދި ބާރުގެ ބޭނުން ކުރުމާއި “އެސް އޯ“ ފުލުހުން ބޭނުން ކުރަން ޖެހުނު ސަބަބު ރިވިއުކޮށް ބަލަން އަޅުގަނޑުވާނީ ފުލުހުންގެ ކަމިޝަނަރަށް ދަންނަވާފައި."

އިހުސާން ވިދާޅުވިއެވެ.

މީގެ ކުރިން ޕީއެންސީގެ ކެމްޕެއިން ޖަލްސާއެއްގައި ވާހަކަދައްކަވަމުން ރައީސް ވިދާޅުވެފައިވަނީ ޤައުމުގެ މުޅި މަސްލަހަތަށް ނުވަތަ ރަށެއްގެ މުޅި މަސްލަހަތަށް ގެއްލުންވާ ހާލަތެއް މެދުވެރިނުވާނަމަ ފުލުހުން ބާރުގެ ބޭނުންނުކުރުމަށް އެމަނިކުފާނު އަންގަވާފައިވާނެ ކަމަށެވެ.

އަދި ކުރީގައި ސިޔާސީ ބޭނުމަށް ފުލުހުން ބޭނުންކުރަމުން އައި ގޮތަށް މި ސަރުކާރުގައި ފުލުހުންގެ ބޭނުންކުރާ މަންޒަރު ނުފެންނާނެކަމަށްވެސް އިހުސާން ވިދާޅުވިއެވެ.

އެ ހަމަނުޖެހުންތަކާ ގުޅިގެން ރޭ ސަރުކާރުން ނެރުނު ބަޔާނެއްގައި ބުނީ ގާނޫނީ އިމުގެ ތެރެއިން ހިންގާ ސިޔާސީ ހަރަކާތަށް އަބަދު ވެސް ސަރުކާރުން އެއްބާރުލުން ދެއްވާނެ ކަމަށެވެ.