ދީނީ އިލްމުވެރިންގެ އަހަރީ ބައްދަލުވުން ފަށައިފި

އިސްލާމީކަންތައްތަކާއި އައުޤާފާ ބެހޭ ވުޒާރާއިން އިންތިޒާމުކޮށްގެން ކުރިއަށް ގެންދާ ދީނީ ޢިލްމުވެރިންގެ އަހަރީ ބައްދަލުވުމުގެ މިއަހަރުގެ ބައްދަލުވުން ފަށައިފިއެވެ.

މި ބައްދަލުވުން ފައްޓަވައިދެއްވީ އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދެވެ.

"21 ވަނަ ޤަރުނުގައި އިސްލާމީ ދަޢުވަތު" މި ތީމުގެ ދަށުން ދެ ދުވަހަށް ކުރިއަށް ގެންދާ މި ބައްދަލުވުމުގައި 101 ޢިލްމުވެރިން ބައިވެރިވެލައްވައެވެ. ރޭ ފެށި މި ބައްދަލުވުމުގައި އޮބްޒާވަރުންގެ ގޮތުގައި 22 ޒުވާން ޚަޠީބުންނާއި 13 އިމާމުންނާއި 24 އިސްލާމް މުދައްރިސުން ހިމެނޭ ގޮތަށް ޖުމްލަ 59 ފަރާތެއް ބައިވެރިވެފައިވެއެވެ.

އެކި ދަންފަޅިތަކަށް ބަހާލައިގެން ކުރިއަށް ގެންދާ މި ޕްރޮގްރާމުގައި ދީނީ ގޮތުން މުހިންމު މައުޟޫޢުތަކާ ގުޅޭ ގޮތުން ބަޙުޘް ކުރުމާއި މަޢުލޫމާތު ދިނުމުގެ ސެޝަންތައް ބޭއްވުމަށް ހަމަޖެހިފައިވެއެވެ. މި ބައްދަލުވުން ހުޅުވައިދެއްވި ރަސްމިއްޔާތުގައި ވަޒީރު ވަނީ އެ ވުޒާރާގެ މަސައްކަތްތަކަށް ދީނީ ޢިލްމުވެރިންގެ ފަރާތުން ލިބެމުންދާ އެއްބާރުލެއްވުން ފާހަގަކުރައްވައި އެ ބޭފުޅުންނަށް ޝުކުރު އަދާކުރައްވައިފައެވެ.

ފަސް އަހަރެއްގެ މެދުކެނޑުމަކަށް ފަހު މި ބައްދަލުވުން އަލުން ބާއްވަން ފެށީ 2024 ވަނަ އަހަރުއެވެ. އެއަށް ފަހު 2025 ވަނަ އަހަރު ވެސް ބައްދަލުވުން ކުރިއަށް ގެންގޮސްފައިވާ އިރު ރާއްޖޭގެ ދީނީ ޢިލްމުވެރިން އެއް ތަނަކުން ބައްދަލުވެ މުހިންމު މައުޟޫޢުތަކާ މެދު ވާހަކަ ދެކެވޭ މި ބައްދަލުވުމަކީ ކޮންމެ އަހަރަކު ވެސް ބާއްވަމުން އަންނަ ޕްރޮގްރާމެކެވެ.