ނަޝީދުގެ ރައްދު އިމްރާނަށާއި ޕީޖީއަށް: މަރުކޮމިޝަނުގެ ރިޕޯޓަށް ދައުވާކުރެވޭނެ

ޑރ. އަފްރާޝީމު އަލީގެ މަރުގެ މައްސަލަ ތަހުގީގުކުރުމަށްފަހު މަރުކޮމިޝަނުން ނެރުނު ރިޕޯޓުގައި ފާހަގަކޮށްފައިވާ ކަންކަމަށް ދައުވާ ކުރެވޭނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިހެން ވިދާޅުވީ، މަރު ކޮމިޝަނުން އެކުލަވާލި ރިޕޯޓާ ގުޅިގެން އެއްވެސް މީހަކު ހައްޔަރުކުރަން ނުވަތަ އެއްވެސް މީހެއްގެ މައްޗަށް ދައުވާއެއް އުފުލާނެ ޖާގައެއް ނެތް ކަމަށް މަރު ކޮމިޝަނުގެ ނައިބު ރައީސް އާއި ޕްރޮސެކިއުޓާ ޖެނެރަލްގެ އޮފީހުން ބުނެފައިވާ ކަމަށް، ހޯމް މިނިސްޓަރު އިމްރާން އަބްދުﷲ މިއަދު މަޖިލީހުގައި ވިދާޅުވުމާއި ގުޅިގެންނެވެ.

މިނިސްޓަރު އިމްރަން ވިދާޅުވީ، ރިޕޯޓާއި ގުޅިގެން ދައުވާ އުފުލަން ޖެހޭ މީހަކު ހުރިކަން ސާފުކޮށްދިނުމަށް، ދެ ފަހަރެއްގެ މަތިން މަރު ކޮމިޝަނާއި ޕީޖީ އަރިހުން އެދިވަޑައިގެން ކަމަށާއި، ނަމަވެސް މިއަދާ ހަމައަށް ވެސް އެފަދަ ފަރާތެއް ކޮމިޝަނުން ބުނެދީފައި ނުވާކަމަށް އިމްރާން ވިދާޅުވިއެވެ.

ނަމަވެސް މަޖިލީހުގެ ޖަލްސާގައި ވާހަކަފުޅުދައްކަވަމުން ރައީސް ނަޝީދު ވިދާޅުވީ، މަރު ކޮމިޝަނުގެ ރިޕޯޓުގައި ބުނާ ފަރާތްތަކާމެދު ދައުވާ ކުރެވޭނެ ކަމަށް މަޖިލީހުގައި ތިއްބަވާ ގާނޫނީ ވަކީލުން ގަބޫލުކުރައްވާކަމަށެވެ.

"މިތަނުގައި ތިއްބެވި ގާނޫނީ ވަކީލުންނަށް ގާނޫނީ ހަމަތަކުގެ މަތިން މި ރިޕޯޓުގައިވާ މައުލޫމަތަށް ބަލައި ދައުވާ ކުރެވެން އޮތް ކަން ވަރަށް ސާފުކޮށް އެބަ ބަޔާންކުރޭ،" ނަޝީދު ވިދާޅުވިއެވެ.

އެހެންކަމުން ދައުވާނުކޯށް އޮތީ ދައުވާކުރާނެ ޖާގަ ނެތިގެން ކަމަށް ގަބޫލު ނުކުރައްވާ ކަމަށް ނަޝީދު ވިދާޅުވިއެވެ.

މިނިސްޓަރު އިމްރާން މިއަދު ވިދާޅުވީ، ޕީޖީގެ ބޭފުޅުންނާއި މަރުކޮމިޝަނުގެ މެންބަރުންނާއި ޕްރޮސިކިއުޓާ ޖެނެރަލްގެ ބޭފުޅުންގެ އިތުރުން ފުލުހުންގެ އިސްވެރިނާއެކު ބޭއްވި އެ ބައްދަލުވުމުގައި ރިޕޯޓާ ގުޅިގެން އެއްވެސް މީހަކު ބަންދުކޮށް ފިޔަވަޅު އަޅަން ޖެހޭތޯ ދެންނެވުުމުން އެއްވެސް ފަރާތަކުން އެކަން ފާހަގަ ކޮށްފައި ނުވާ ކަމަށެވެ.

އެ ރިޕޯޓުގެ މައްޗަށް ބިނާކޮށް އެއްވެސް މީހަކު ބަންދުކޮށް ހައްޔަރު ކުރާނެ ތަނެއް ނެތް ކަމަށް މަރު ކޮމިޝަންގެ ނައިބުރައީސާ އިސްވެ ވިދާޅުވެފައިވާ ކަމަށް އިމްރާނު ވިދާޅުވިއެވެ.