ހުޅުމާލޭގެ ދުވާރުތަކުގެމަތީގައި ބަހައްޓާފައިވާ ގޮނޑިމޭޒުތައް ނަގަން ހަފްތާއެއް

ހުޅުމާލޭގެ އެކި ސަރަހައްދުތަކުގެ ދުވާރުމަތީގައާއި ހެޖުތެރޭގައި، ބަހައްޓާފައިވާ ގޮނޑިއާއި މޭޒު ފަދަ ތަކެތި ނެގުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އަންގައިފި އެވެ.

ހުޅުމާލޭގެ ބެލެނިވެރިކަން އޮތް އެޗްޑީސީން މިއަދު ބުނީ، ހުޅުމާލޭގެ ދުވާރުމައްޗާއި ހެޖުތެރޭގައި ބަހައްޓާފައިވާ ގޮނޑި އަދި މޭޒު ފަދަ ތަކެތި ނެގުމަށް މިދިޔަ އަހަރުވެސް އެކި ފަހަރުމަތީން ތަކުރާރުކޮށް، އަންގާފައިވީ ނަމަވެސް، ގިނަ ފަރާތްތަކުން އަދިވެސް އެ ސަރަހައްދުގައި ގޮނޑިއާއި މޭޒު ޖަހައިގެން ކެފޭ ޚިދުމަތް ދެމުންދާކަން ފާހަގަކުރެވިފައިވާ ކަމަށެވެ.

މަގު ބޭނުންކުރާ ފަރާތްތަކަށް ދަތިވާ ގޮތަށް، ދުވާރު މައްޗާއި ހެޖުތެރޭގައި ގޮނޑިއާއި މޭޒު ބަހައްޓައިގެން ވިޔަފާރި އުސޫލުން ބޭނުންކުރުމަކީ މަނާކަމެއްކަން ތަކުރާރުކޮށް ހަނދާންކޮށްދީފައިވާ ކަމަށް ވެސް އެޗްޑީސީން ބުންޏެވެ.

ބޮޑެތި ގަސްތައް އިންދުން މަނާ

އެޗްޑީސީން ބުނީ ބިޔަވާ ޒާތުގެ ގަސްތައް ހެޖުތެރޭގައި އިންދާފައި ހުރުމުގެ ސަބަބުން، ހުޅުމާލޭގެ މަގުތަކަށް ޖަމާވާ ފެން ހިންދުމަށް ދަތިވެ، މަގުތަކުގައި ފެން ބޮޑުވުމާއި ތާރުގަނޑު ހަލާކުވުން ފަދަ މައްސަލަތައް ދިމާވާތީ، އެފަދަ ބިޔަ ގަސްތައް ނެގުމުގެ މަސައްކަތް ކުރާނެ ކަމަށެވެ.

ހުޅުމާލޭގެ ދުވާރުމައްޗާއި ހެޖުތެރޭގައި ބަހައްޓާފައިވާ ތަކެތި ނެގުމަށް ހަފްތާއެއްގެ މުހުލަތު ދީފައިވާ ކަމަށާ އެގޮތުން، މި މަހުގެ 23 ވާ ބުރާސްފަތި ދުވަހުގެ ކުރީން އެ ތަނުގައި ބަހައްޓާފައިވާ ގޮނޑިއާއި މޭޒު ފަދަ ތަކެތި ނެގުމަށް ވަނީ އިލްތިމާސް ކޮށްފަ އެވެ.

މި މުއްދަތުގެ ތެރޭގައި އެ ތަކެތި ނުނަގައިފިނަމަ ހުޅުމާލޭގެ ދުވާރުމައްޗާއި ހެޖުތެރޭގައި ބަހައްޓާފައިވާ ގޮނޑިއާއި މޭޒު ފަދަ ތަކެއްޗާއި، ހެޖުތެރޭގައި ހައްދާފައިވާ ބިޔަ ގަސްތައް ނަގައި، އެ ސަރަހައްދުތައް ސާފުކުރުމުގެ މަސައްކަތް އެކަމާ ގުޅުންހުރި އިދާރާތަކާ ގުޅިގެން އެޗްޑީސީން ކުރިއަށްގެންދާނެ ކަމަށް ވެސް ވަނީ ބުނެފައެވެ.

އަދި، މި މަސައްކަތުގެ ތެރެއިން މުދަލަށް ލިބިދާނެ ގެއްލުމަކަށް އެޗްޑީސީން ޒިންމާ ނުވާނެ ކަމަށާއި، މިފަދަ ކަންކަމުގައި މިހާތަނަށް އާންމު ރައްޔިތުންނާއި ވިޔަފާރިތަކުގެ ފަރާތުން އެ ކޯޕަރޭޝަނަށް ދެއްވާ އެއްބާރުލުން ފާހަގަކޮށް ޝުކުރު އަދާކުރާ ކަމަށް ވެސް ވަނީ ބުނެފައެވެ.