އެޑްޓޯރިއަލް އާ ހިލާފް ކޮންޓެންޓެއް ދެއްކުމުން ޕީއެސްއެމުން މީޑިއާ ކައުންސިލްގެ މައްސަލަ މަޖިލީހަށް ހުށަހަޅައިފި

ނިމިގެންދިޔަ މީޑިއާ ކައުންސިލްގެ އެވޯޑް ހަފްލާގައި ދައުލަތުގެ މީޑިއާގެ އެޑްޓޯރިއަލް އާ ހިލާފް ކޮންޓެންޓެއް ދެއްކުމުން، ޕީއެސްއެމުން މީޑިއާ ކައުންސިލްގެ މައްސަލަ މަޖިލީހަށް ހުށަހަޅައިފިއެވެ.

ޕީއެސްއެމުން މިރޭ ނެރެފައިވާ ބަޔާނެއްގައި ބުނެފައިވަނީ، ނޫސްވެރިކަމުގެ އެވޯޑް ހަފްލާ ރޭ ޕަބްލިކް ސަރވިސް މީޑިއާގެ ޓީވީ ޗެނަލްތަކުން ލައިވްކޮށް ދެއްކިއިރު، ޕީއެސްއެމްގެ އެޑްޓޯރިއަލް ކޮންޓެންޓާ ހިލާފަށް އަދި ނޫސްވެރިކަމުގެ އާއްމު މިންގަނޑާ ހިލާފް ވީޑިއޯއެއްް އެ ހަފްލާ އިންތިޒާމްކުރި ފަރާތުން ދައްކާފައިވާކަމަށެވެ.

ޕީއެސްއެމްއިން ލައިވް ކަވަރޭޖް ހަދާ ހަފްލާތަކުގައި ދައްކާ ވީޑިއޯ ފޫޓޭޖްތަކަކީ ޕީއެސްއެމްގެ އެޑްޓޯރިއަލްއަށް ފެތޭ ކޮންޓެންޓަށް ވާންޖެހެއެވެ.

އެވޯޑް ލިބޭ ކެޓަގަރީތަކާ އެ ކެޓަގަރީއަށް ނޮމިނޭޓް ވެފައިވާ ފަރާތްތައް މީޑިއާ ކައުންސިލަށް އެނގޭއިރު، ޕީއެސްއެމަށް ކުރިއަލާ އެނގުމަކާ ނުލައި އެ ވީޑިއޯ ދައްކާފައިވަނީ ގަސްދުގައި ދުރާލާ ތައްޔާރުވެގެންކަމަށް ޕީއެސްއެމުން ބުނެއެވެ. އަދި މިކަން މީޑިއާ ކައުންސިލުން ކޮށްފައިވަނީ ޕީއެސްއެމްގެ އެޑްޓޯރިއަލް އާ ހިލާފް ކޮންޓެންޓު ޕީއެސްއެމުން ދެއްކުމުގެ ނިޔަތުގައި ކަމަށްވެސް ދައުލަތުގެ މީޑިއާއިން ވަނީ ބުނެފައެވެ. އެހެންކަމުން ޕީއެސްއެމުން ވަނީ މީޑިއާ ކައުންސިލްގެ މި އަމަލު އެންމެ ހަރުކަށި އިބާރާތުން ކުއްވެރިކޮށްފައެވެ.

ދައުލަތުގެ މީޑިއާއިން ބުނީ މިކަމަކީ ޕީއެސްއެމަށް ރައްޔިތުން ކުރަމުން އަންނަ އިތުބާރު ގެއްލި ކުންފުނީގެ މައްޗަށް ގާނޫނީ ވާޖިބުތައް އަދާކުރުމަށް ހުރަސްއެޅި އިއާދަނުކުރެވޭ ވަރުގެ ގެއްލުންތަކެއް ލިބިދާނެ ކަމެއްކަމަށް ދެކޭ ކަމަށެވެ.

މީޑިއާ ކައުންސިލަކީ ގާނޫނަކުން އުފެދިފައިވާ ކައުންސިލަކަށް ވާތީ، އެކައުންސިލަށް ގާނޫނުން މަތިކޮށްފައިވާ ޒިންމާތައް ޒިންމާދާރުކަމާއެކީ އަދާކުރުމަށާއި އެންމެހާ ފަރާތްތަކުގެ ހައްގުތަކަށް ހުރުމަތްތެރިކޮށް ހިތުމަށް ޕީއެސްއެމުން ވަނީ މީޑިއާ ކައުންސިލަށް އިލްތިމާސްކޮށްފައެވެ.

ވޮއިސްއަށް މައުލޫމާތު ލިބިފައިވާ ގޮތުގައި މި މައްސަލާގައި އެމްއެމްސީގެ ރައީސަކަށް ހުންނެވި އަހްމަދު މުސްތަފާ މިހާރު ވަނީ، ޕީއެސްއެމްގައި އޭނާ ހުންނެވި މަގާމުން ވަކިކުރައްވާފައެވެ. މުސްތޮ މަގާމުން ވަކިކުރެއްވީ ޕީއެސްއެމްގެ ބޯޑުންކަމަށް މައުލޫމާތު ލިބެއެވެ. އޭނާ އަކީ ދައުލަތުގެ މީޑިއާގައި އުޅޭތާ 30 އަހަރަށްވުރެ ގިނަ ދުވަސްވެފައިވާކަން ފާހަގަކޮށްލެވެއެވެ.