ސްޓެލްކޯގެ ބިލިން ސިސްޓަމާއި މުވައްޒަފުންނާމެދު އިތުބާރު އެބައޮތް: ފަހުމީ

ސްޓެލްކޯއިން ކަރަންޓް ބިލު ހަދަނީ މީޓަރުގެ ރީޑިންއަށް ބެލުމަށްފަހުކަމަށާއި، މިކަމުގައި އޮޅުވާލުމެއް ނެތްކަމަށް އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެއެވެ.

ފަހުމީ މިފަދައިން ވިދާޅުވީ، ޕީއެންއެފްއިން ބޭއްވި ޖަލްސާއެއްގައި ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ސްޓެލްކޯއިން ކަރަންޓް ބިލް ކުރުމާ ގުޅޭ ދެއްކެވި ވާހަކަތަކަށް ރައްދު ދެއްވަމުންނެވެ.

މިގޮތުން ރައީސް ޔާމީން ވަނީ ސްޓެލްކޯއިން މިހާރު ގޭގެއަކަށް މީޓަރު ރީޑިން ނަގާކަށް ނުދާ ކަމަށާއި ކަރަންޓް ބިލް ހަދަނީ ކުރީގެ އެއްޗަކަށް ބަލާ, ގްރޯތް ފެކްޓާއެއް ލައިގެން ކަމަށް ވިދާޅުވެފައެވެ. އަދި މި މައްސަލަ މަދަނީ ކޯޓަށް ހުށަހަޅަން ޖެހޭ ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީންގެ މި ވާހަކަތަކާއި ގުޅިގެން ފަހުމީ އެކްސް ގައި ކުރެއްވި ޕޯސްޓެއްގައި ވިދާޅުވީ، ސްޓެލްކޯގެ ބިލިން ސިސްޓަމާއި މުވައްޒަފުންނާމެދު ސުވާލު އުފެދޭ ގޮތަށް ފެނަކައާއި ދެކޮޅަށް ކޮށްފައިވާ ދޮގު ތުހުމަތުތައް ކުށްވެރި ކުރައްވާ ކަމަށެވެ.

ފަހުމީ ވިދާޅުވީ، ސްޓެލްކޯއިން ބިލް ހަދާނީ މީޓަރުގެ ރީޑިންއަށް ބެލުމަށް ފަހު އިތުރު އެެއްވެސް އިންސައްތަ އެއް ނުލައި ކަމަށާއި، ބިލު ހަދާއިރު  އެއްވެސް އެއްޗެއް އަންދާޒާކޮށްގެން ނުހިމަނާނެ ކަމަށެވެ.

ފަހުމީ މިފަދައިން ވިދާޅުވިއިރު، ސްޓެލްކޯއިން ވެސް ވަނީ ރައީސް ޔާމީންގެ ވާހަކަތަކާއި ގުޅިގެން، އެކަން ދޮގުކޮށް ބަޔާނެއް  ނެރެފައެވެ.