އަޒީޒާ މިސްކިތަށް ގެއްލުންދިންތާ 24 ގަޑިއިރު؛ ތުހުމަތުވާ މީހާ ހައްޔަރު ނުކުރޭ

ހުޅުމާލޭގައި ހުންނަ އަޒީޒާ މިސްކިތަށް ގެއްލުންތަކެއްދިންތާ 24 ގަޑިއިރު ވެގެން ދިޔައިރުވެސް އެ ގެއްލުން ދިން މީހާ ހައްޔަރު ނުކުރާކަން އެނގިއްޖެއެވެ.

ވޮއިސްއަށް މައުލޫމާތު ލިބިފައިވާ ގޮތުގައި ހުޅުމާލެ ފޭސް އެކެއްގައި ހުންނަ މަސްޖިދު އަޒީޒާ މިސްކިތަށް ގެއްލުންދީފައިވަނީ އާދިއްތާ ދުވަހުގެރޭ މެންދަމުގެ ވަގުތެއްގައެވެ. ވޮއިސްއަށް މައުލޫމާތު ހިއްސާކުރި ފަރާތުން ބުނީ މިސްކިތަށް ގެއްލުންދިންކަމަށް ބެލެވެނީ އެރޭ މެންދަމު 03:30 ހާއިރުކަމަށެވެ.

މިސްކިތަށް ދިން ބޮޑެތި ގެއްލުންތަކުގެ ތެރޭގައި ބައެއް ދޮރުފަތްތަކުގެ ބިއްލޫރިތައް ތަޅާލުން ހިމެނެއެވެ.

މީގެ އިތުރުން މިސްކިތު އެތެރޭގައި ހުރި މުސްހަފްތައް އުކާލުމާއި އެތަކެއްޗަށް ގެއްލުންދިންކަމަށްވެސް މައުލޫމާތު ލިބެއެވެ.

މި ހާދިސާއާ ބެހޭގޮތުން ފުލުހުން އަދި ބުނިހާވެސް އެއްޗަކީ އެ މައްސަލައެއް ހުށަހެޅުނީ ޖުލައި 20 ވަނަ ދުވަހުގެ ފަތިހު 3:47 އެހައިކަންހާއިރު ކަމަށާ މައްސަލަ ތަހުގީގު ކުރަމުންދާ ކަމަށެވެ.

މައްސަލައާ ގުޅިގެން މީހަކު ހައްޔަރު ކުރިތޯ ތަކުރާރުކޮށް ސުވާލުކުރުމުންވެސް ފުލުހުން ޖަވާބެއް ނުދެއެވެ.

މިސްކިތްތަކަށް ދޭތެރެއަކުން ގެއްލުންދޭއިރު، މިސްކިތުގައި ހުންނަ ތަކެތި ވަގަށް ގެންދިއުމަކީވެސް ދޭތެރެއަކުން ހިނގަމުން އަންނަ ކަމެއްކަން ފާހަގަކޮށްލެވެއެވެ.