ވާނުވާގައި ތިބި މީހުން ޝަރުތުތަކެއް ހަމަވާނަމަ، ބަންދުން ދޫކޮށްލުމާ ގުޅޭގޮތުން މަޝަވަރާކޮށްފި

ޝަރީޢަތް ނިމެންދެން ބަންދުކުރެވިފައިވާ މީހުންގެ ތެރެއިން ޝަރުޠުހަމަވާ މީހުން، މޮނިޓަރ ކުރެވޭނެ ނިޒާމެއްގެ ތެރެއިން ބަންދުން ދޫކޮށްލުމާ ގުޅޭގޮތުން ޕީޖީ އޮފީހުން ބޭއްވި ބަންދު ފޯރަމްގައި މަޝްވަރާކޮށްފިއެވެ.

ޕްރޮސެކިއުޓަރ ޖެނެރަލްގެ އޮފީހުން އިންތިޒާމުކޮށްގެން މިދިޔަ ބްރާސްފަތި ދުވަހު ޖުޑީޝަރީއަަށް ހާއްސަކޮށްގެން ބޭއްވި "ބަންދު ފޯރަމް" ގައި ވަނީ ޝަރީއަތް ނިމެންދެން ބަންދުކޮށްފައިވާ، ނުވަތަ ވާނުވާ ބަންދު ޖަހާފައިތިބި މީހުންނާ ގުޅޭގޮތުން ފުޅާދާއިރާއެއްގައި މަޝަވަރާކޮށްފައެވެ. ބަންދު ފޯރަމްގައި ވަނީ ޝަރީޢަތް ނިމެންދެން ބަންދުކުރެވިފައިވާ މީހުންގެ ތެރެއިން ޝަރުޠުހަމަވާ މީހުން، މޮނިޓަރ ކުރެވޭނެ ނިޒާމެއްގެ ތެރެއިން ބަންދުން ދޫކޮށްލުމާ ގުޅޭ ޤާނޫނީ މަޝްވަރާކޮށްފައެވެ.

މި މަޝްވަރާތަކުގައި ފުލުހުން ބުނެފައިވަނީ ޝަރީޢަތް ނިމެންދެން ބަންދުގައި 435 މީހުން ތިބި ކަމަށެވެ. މި މީހުންނާ ގުޅޭގޮތުން އެ ބައްދަލުވުމުގައި ކޮމިޝަނާ އޮފް ޕޮލިސް އަލީ ޝުޖާއު ވިދާޅުވެފައިވަނީ، ޝަރީއަތް ނިމެންދެން ބަންދުކޮށްފައި މިވަގުތު ގިނަ ބަޔަކު އެބަ ތިބި ކަމަށެވެ. އަދި އެއީ ކަންބޮޑުވުން އޮތް މައްސަލައެއް ކަމަށްވީ ނަމަވެސް އޭގެތެރޭގައި ދޫކޮށްލައިގެން ނުވާނެ ބަޔަކު އެބަތިބިކަމަށެވެ. އެގޮތުން ބޮޑެތި ކުށްތަކަށް އަރައިގެންފައިވާ މީގެ ކުރިންވެސް ބަންދުން ދޫކޮށްލުމުން އޭގެ ނޭދެވޭ އަސަރު ޝަރީޢަތަށާއި މުޖުތަމަޢަށްކޮށްފައި އެބަހުރިކަމަށް ސީޕީ ފާހަގަކުރެއްވިއެވެ.

ބަންދު ފޯރަމުގައި މަޝްވަރާކުރެވުނު އިތުރު ކަންކަމުގެ ތެރޭގައި ކަފާލާތުގެ ދަށުން ބަންދުން ދޫކޮށްލުމުގެ ނިޒާމު ފުޅާކުރުމާއި، ހެކިން ކޯޓަށް ޙާޟިރުކުރުމުގައި ދިމާވާ މައްސަތަކަށް ޙައްލު ހޯދުމާއި، މައްސަލަތަކުގެ ޢިބްތިދާއީ އަޑުއެހުންތައް މަދުކުރުމަށްޓަކައި، ޝަރީޢަތުގެ ބޭރުން އިދާރީ ގޮތުން ކުރެވެންހުރި ކަންކަން ޝަރީޢަތުގެ އަޑުއެހުމެއް ބޭއްވުމާ ނުލައި ކުރިއަށްގެންދިއުން ފާހަގަކޮށްލެވެއވެެ. މީގެ އިތުރުން ކޯޓުތަކުގައި ތާވަލުކުރެވޭ އަޑުއެހުންތައް ކެންސަލްކުން މަދުކުރުމަށްޓަކައި، ސެންޓްރަލައިޒްޑް ޝެޑިއުލިންގ ނިޒާމެއް ޤާއިމުކުރުމަށްވެސް ވަނީ މަޝްވަރާކޮށްފައެވެ.

ޝަރުޢީ ދާއިރާއަށް ޚާއްޞަކޮށްގެން ކުރިއަށްގެންދިޔަ ފޯރަމްގައި، ދިވެހިރާއްޖޭގެ ހައިކޯޓުގެ ފަނޑިޔާރުންނާއި، ކްރިމިނަލް ކޯޓު، ޑްރަގް ކޯޓު އަދި ޖުވެނައިލް ކޯޓުގެ ޤާޟީންނާއި ކޯޓުތަކުގެ މެޖިސްޓްރޭޓުން ހިމެނޭގޮތުން 60 އަށްވުރެ ގިނަ ފަނޑިޔާރުން ބައިވެރިވެވަޑައިގެންނެވިއެވެ. ބަންދު ފޯރަމްގެ ފުރަތަމަ ބައި ކުރިއަށްގެންދިޔައީ، ޖުޑީޝަރީ ފިޔަވައި ޖިނާއީ ޢަދުލުގެ ނިޒާމުގައި ހިމެނޭ އެހެން އިދާރާތަކާއެކު މި ހިނގާ ފެބުރުއަރީމަހުގެ އެއްވަނަ ދުވަހުއެވެ.