ތިން އިންތިޚާބުގެ ވޯޓުލުން ފަށައިފި

މިއަދު ބާއްވާ ކައުންސިލް އިންތިޚާބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބު އަދި ރިޔާސީ އިންތިޚާބާއި މަޖިލިސް އިންތިޚާބު އެއްދުވަހެއްގައި ބޭއްވުމާމެދު ރައްޔިތުން ދެކޭގޮތް ބެލުމަށް ނަގާ ފެންނަ ނުފެންނަ އިންތިޚާބުގެ ވޯޓުލުން ފަށައިފިއެވެ.

ތިން އިންތިޚާބުގެ ވޯޓުލުން 8:00 ގައި ފަށާފައިވާއިރު، ވޯޓުލުމުގެ ވަގުތު ހަމަވާނީ ހަވީރު 4:00 ގައެވެ. އޭގެ ފަހުން ވޯޓު ލާން ކިޔުއަށް ނޭރޭނެ ކަމަށާ ނަމަވެސް ކިޔުގައި ތިބޭ މީހުންނަށް ވޯޓު ލެވޭނެ ކަމަށް އިލެކްޝަންސް އިން ބުނެއެވެ.

މިއަދު ކުރިއަށްދާ އިންތިޚާބުގައި 294،876 މީހަކަށް ވޯޓުލުމުގެ ހައްގު ލިބިގެންވެ އެވެ. އެއީ 144،506 އަންހެނުންނާއި 150،370 ފިރިހެނުންނެވެ.

މުޅި ރާއްޖޭގައި 582 ވޯޓު ފޮށި ބަހައްޓާފައިވާއިރު އެ ވޯޓު ފޮށިތަކުގެ ސެކިއުރިޓީ ބެލެހެއްޓުމުގައި ފުލުހުން ހަރަކާތްތެރިވާނެ އެވެ.

މި އިންތިޚާބުތަކުގައި ރާއްޖެއިން ބޭރުން ވޯޓުލާން ބޭނުން މީހުން ރެޖިސްޓާވާން ހުޅުވާލުމުން ކަނޑައެޅިފައުވާ އަދަދަށް ރެޖިސްޓާވެފައިނުވާތީ ރާއްޖެއިން ބޭރުގައި އެއްވެސް ފޮށްޓެއް ނުބަހައްޓާ ކަމަށް އީސީން މީގެ ކުރިން ވަނީ ބުނެފައެވެ.