ޤަވައިދާ ހިލާފަށްއުޅޭ ބިދޭސީން ހޯދުމަށް ޤައުމީ ފެންވަރުގައި މާދަމާ ހާއްސަ އޮޕަރޭޝަނެއް ފަށަނީ
ލިޔުންތެރިޔާ
އަބްދުﷲ ހުސައިން
ރާއްޖޭގައި ޤަވާއިދާ ހިލާފަށް އުޅޭ ބިދޭސީން ހޯދުމަށް ޤައުމީ ފެންވަރުގައި މާދަމާ ހާއްސަ އޮޕަރޭޝަނެއް ފެށުމަށް ނިންމާފައިވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިކަން އިއުލާނު ކުރެއްވީ ފ.ނިލަންދޫ ރައްޔިތުންނާ ބައްދަލުކުރުމަށް މިރޭ އެރަށުގައި ބޭއްވި ޖަލްސާގައެވެ. ރައީސް ވިދާޅުވީ ޤަވާއިދާ ހިލާފަށް އުޅޭ ބިދޭސީންގެ މައްސަލައަކީ މިހާރު ރާއްޖޭގައި އެންމެ ބޮޑު އެއް މައްސަލަ ކަމަށެވެ. އެގޮތުން ނުގަވައިދުން އުޅެމުންދާ ބިދޭސީންގެ ސަބަބުން ދިވެހިންނަށް ލިބެންޖެހޭ ފުރުސަތުތައް ހަނިވެފައިވާކަން ރައީސް ވަނީ ފާހަގަކުރައްވާފައެވެ.
މި އޮޕަރޭޝަން ރާއްޖޭގައި މީހުން ދިރިއުޅޭ ހުރިހާ ރަށެއްގައި ފަށާނޭކަމަށާއި، ހާއްސަ ގޮތެއްގައި ބޮޑެތި އާބާދީތައް ދިރިއުޅެމުންދާ ރަށްތައް ބަލާނޭކަމަށް ރައީސްގެ ވާހަކަފުޅުގައި ފާހަގަކުރެއްވިއެވެ.
އެތައް ހަރުފަތެއް މައްޗަށް ޖައްސައި މާދަމައިން ފެށިގެން ނޭޝަން ވައިޑްކޮށް ރާއްޖޭގެ ހުރިހާ ރަށެއްގައި ޚާއްޞަކޮށް އާބާދީ ބޮޑެތި ރަށްތަކުގައި މިދެންނެވި ގޮތަށް ނުގަވައިދު ހިންގާ ވިޔަފާރިތައް ހޯދައި އެ ތަންތަން ވަގުތުން ބަންދުކޮށް އެ ފަރާތްތައް ރިޕޯޓުކުރުމުގެ ޚާއްޞަ އޮޕަރޭޝަނެއް މާދަމާ އެބަ ފަށަން. މީގެ ނަތީޖާއަކަށް ވެސް ވާނީ ދިވެހި ރައްޔިތުންނަށް ވިޔަފާރިކުރުމަށް އެ އޮންނަ ފުރުޞަތައް ޙައްޤު ފުރުޞަތުތައް އަނބުރާ ހޯދައިދިނުން
ރައީސް ވިދާޅުވިއެވެ
ރައީސް ވިދާޅުވީ ނުގަވައިދުން އުޅެމުންދާ ބިދޭސީންގެ ސަބަބުން ދިވެހިންނަށް ހައްގުވާ ވިޔަފާރީގެ ފުރުސަތުތައް ގެއްލެމުންދާކަމަށާއި، އެ ފުރުސަތު އެބައިމީހުންނަށް ލިބެނީ ދިވެހިންގެ ތެރެއިން ބައެއް މީހުން ފުރުސަތު ދޭތީކަން ރައީސް ވިދާޅުވިއެވެ. އެހެންކަމުން ނުގަވައިދުން އުޅޭ ބޭރު މީހުންނަށް އެ ފުރުސަތު ނުދީ ދިވެހިންނަށް ވަޒީފާގެ އެ ފުރުސަތުތައް ތަނަވަސްކޮށްދިނުމަށް ރައީސް ވަނީ އެދިވަޑައިގަންނަވާފައެވެ.
ރައީސް ވިދާޅުވީ ޒުވާނުން ތިބީ ވަޒީފާގެ ފުރުޞަތުތައް ވަރަށްބޮޑަށް ބޭނުންވެފައި ކަމަށާއި، ދިމާވެގެން މިއުޅޭ މައްސަލަތައް ހައްލުކުރެވޭނީ އެންމެން ގުޅިގެން މަސައްކަތްކުރުމުން ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
