ލީޑަޝިޕް ސަމިޓް އޭޝިޔާ 2024 ގައި ބައިވެރި ވުމަށް ރެޖިސްޓަރވާން ހުޅުވާލައިފި

ވޯލްޑް އޮފް ޓުމޯރޯ އިން އިންތިޒާމް ކޮށްގެން ކުރިއަށް ގެންދާ ލީޑަޝިޕް ސަމިޓް އޭޝިޔާ 2024 ގައި ބައިވެރި ވުމަށް ރެޖިސްޓަރވާން ހުޅުވާލައިފިއެވެ.

އޭޕްރީލް 22 އަދި 23 ވަނަ ދުވަހު ވިލާ ނޮޓިކާ މޯލްޑިވްސް ގައި އޮންނަ މި ކޮމްފަރެންސްގައި ބައިވެރިވުމުގެ ފުރުސަތު ސަރުކާރުގެ މުވައްސަސާ ތަކާއި، އަމިއްލަ ކުންފުނި ތަކާއި އާއްމު ފަރުދުންނަށްވެސް ހުޅުވާލެވިފައިވާ ކަމަށް ވޯލްޑް އޮފް ޓުމޯރޯއިން ބުނެއެވެ. އަދި ކޮންފަރެންސްގައި ރެޖިސްޓަރ ކުރަން ބޭނުންވާ ފަރާތްތަކަށް މި ލިންކު މެދުވެރިކޮށް ރެޖިސްޓަރ ކުރެވޭނެ ކަމަށްވެސް ބުނެފައިވެއެވެ.

މި ކޮންފަރެންސް އާއި ބެހޭ އިތުރު މައުލޫމާތު “ވޮއިސް” އާ ހިއްސާ ކުރަމުން ވޯލްޑް އޮފް ޓުމޯރޯގެ ފަރާތުން މުހައްމަދު އާލިމް ވިދާޅުވީ، މިއީ ބޭރުގެ ތަޖުރިބާކާރު ލީޑަރުންގެ ޚިޔާލާއި، ޢިލްމާއި ތަޖުރިބާ ހިއްސާ ކުރުމާއި، އޭގެ އަލީގައި އަމިއްލަ ވިޔަފާރި ތަކާއި ކުންފުނި ތަކުގައި މަސައްކަތް ކުރާ ފަރާތްތަކަށް ކުރިއަށް ދިޔުމަށް އެހީވެދިނުމަށް އިންތިޒާމް ކުރާ ކޮންފަރެންސެއް ކަމަށެވެ.

މިފަދަ ކޮންފަރެންސް ތަކަކީ އާއްމުކޮށް ރާއްޖެއިން ބޭރުގައި ބޭއްވޭ ކޮންފަރެންސްތައް ކަމަށް ވާއިރު އެ ކޮންފަރެންސް ތަކުގައި ބައިވެރި ވުމަށް ބޭނުންވާ ދިވެހިން ބޮޑު ޚަރަދެއް ކުރަންޖެހެއެވެ. އެގޮތުން ޓިކެޓާއި ހުރުމާއި ކެއުމުގެ ޚަރަދުވެސް އަމިއްލައިން ކުރަންޖެހޭ އިރު އެކަން ކަމަށް ގާތްގަޑަކަށް 5000 އެއްހާ ޑޮލަރު ހޭދަވެއެވެ.

ވޯލްޑް އޮފް ޓުމޯރޯ ގެ ފަރާތުން ބާއްވާ މި ކޮންފަރެންސް އަށް ރާއްޖޭގެ ބޭރުގެ ފަރާތްތަކުން 799 ޑޮލަރު ދައްކަން ޖެހުނު ނަމަވެސް ރާއްޖޭގައި ރެޖިސްޓަރ ވެފައިވާ ކުންފުނިތަކާއި، ރާއްޖެއިން ބައިވެރިވާ ފަރާތްތަކަށް 40-45 ޕަސެންޓްގެ ޑިސްކައުންޓެއް ދިނުމަށް ވަނީ ހަމަޖެހިފައެވެ.

އެއީ ކޮންފަރެންސް އޮންނަ ރިސޯޓަށް ދިޔުމަށާއި އައުމުގެ ޚަރަދުގެ އިތުރުން ކެއުން ބުއިންވެސް ހިމެނޭހެން ދައްކަންޖެހޭ ޖުމްލަ ފައިސާއެވެ.

އާލިމް އިތުރަށް ވިދާޅުވި ގޮތުގައި މި ކޮންފަރެންސްގައި ރާއްޖޭގެ އެކި ދާއިރާ ތަކުގައި ފާހަގަކޮށްލެވޭ ފަރާތްތަކުގެ އިތުރުން، އިނގިރޭސިވިލާތާއި، އެމެރިކާ، ކެނެޑާ، ސިންގަޕޫރާއި ދުބާއީގެ އިތުރުން ޖޯޑަން އާއި ތައިލޭންޑްގެ ޓޮޕް ލީޑަރުން ބައިވެރިވެ އެބޭފުޅުންގެ ތަޖުރިބާ ހިއްސާ ކުރައްވާނެއެވެ. އަދި މި އިވެންޓް ނިންމާފައި ޕާޓީއެއްވެސް ބޭއްވުމަށް ހަމަޖެހިފައިވާއިރު އެ ޕާޓީގެ ތެރެއިން، އެ ލީޑަރުންނާއި، ކޮންފަރެންސްގެ ބައިވެރިންގެ މެދުގައި މުއާމަލާތް ކުރެވި، ޚިޔާލު ބަދަލުކޮށް މަޝްވަރާކޮށް، ސުވާލު ކުރުމުގެ ފުރުސަތުވެސް ލިބިގެންދާނެކަން އާލިމް ފާހަގަކުރެއްވިއެވެ.

މިއީ އަމިއްލަ ވިޔަފާރިތަކާއި އެނޫން ފަރާތްތަކަށްވެސް ލިބިފައިވާ ރަނުގެ ފުރުސަތެއް. މި ކޮން ފަރެންސްގައި ޓީޗަރުންނާއި އަމިއްލަ ކުންފުނި ތަކާއި، އެނޫން ދާއިރާތަކުގައި މަސައްކަތް ކުރާ ފަރާތްތައްވެސް ބައިވެރިވަމުންދާކަން އަޅުގަނޑު އުފަލާއިއެކު ފާހަގަކުރަން. ބޭރުގައި ބާއްވާ މިފަދަ ކޮންފަރެންސް ތަކުގައި މައުލޫމާތު ދެއްވާ، ބޭފުޅުން މީގައިވެސް ދެއްވާނީ. ބޭރުގެ ކޮންފަރެންސް ތަކާއި ޚިލާފަށް މީތި މިއީ ރާއްޖޭގެ ކޮންޓެކްސްޓް އެޕްލައި ކޮށްގެން ކުރިއަށް ގެންދާ ކޮންފަރެންސް އެއް. އެހެންވީމާ މިފަދަ ބޮޑު އޮޕޮޗުނިޓީއެއް ދޮރާއި ހަމައަށް އައީމަ ދޫކޮށްލައިގެން ނުވާނެ.

މުހައްމަދު އާލިމް

މިއީ ވޯލްޑް އޮފް ޓުމޯރޯއިން ބާއްވާ ދެވަނަ ކޮންފަރެންސްއެވެ. މީގެ ފުރަތަމަ ކޮންފަރެންސް ބާއްވާފައިވަނީ އިންޓަނޭޝަނަލް ކޯޗިންގ ފެޑެރޭޝަން އާއި ގުޅިގެން ނިމިދިޔަ އަހަރުގެ ތެރޭގައެވެ.

މި ކޮންފަރެންސް އާއި ގުޅެ އިތުރު މައުލޫމާތު ބޭނުންވާ ފަރާތްތަކުން 7999927 އަށް ގުޅާ ލުމުން ލިބިގެންދާނެ ކަމަށް ވޯލްޑް އޮފް ޓުމޯރޯ އިން ބުނެފައިވެއެވެ.