ކޮޅުވެއްޓި ބަންޑުން ޖަހާލުން: ދެވަނަ މީހާ ވެސް މަރުވެފައި އޮއްވާ ފެނިއްޖެ

ރޭ ދަންވަރު މާލެއިން ރީތިރަށް ރިސޯޓަށް ދަތުރުކުރަމުންދިޔަ "އަލްމާކް ފިޔަ" ނަމަކަށް ކިޔާ ކޮޅުވެއްޓި ބަންޑުން ޖަހާލި ހާދިސާގައި ކަނޑުވި މީހުންގެ ތެރެއިން ދެވަނަ މީހާ ވެސް މަރުވެފައި އޮއްވާ ފެނިއްޖެ އެވެ.

ކޮޅުވެއްޓި ބަންޑުން ޖަހާލިއިރު އޭގައި ހަތް މީހުން ތިއްބެވެ. އޭގެ ތެރެއިން 4 މީހަކު ސަލާމަތްކުރެވުނުއިރު، ތިން މީހަކު ގެއްލުނެވެ. އޭގެ ތެރެއިން އެކަކު ކުރީން ވަނީ ފެނިފަ އެވެ. އެމީހާ ފެނިފައިވަނީ ކަނޑުގެ އަޑިން ކޯސްޓްގާޑުގެ ޑައިވަރުންނަށެވެ. އެމީހާ ކަނޑުން ނެގިއިރުވެސް އޮތީ މަރުވެފައިކަމަށް ފުލުހުން ވަނީ ބުނެފައެވެ. މަރުވެފައިވަނީ ގއ. ދާންދޫއަށް ނިސްބަތްވާ އުމުރުން 38 އަހަރުގެ އަހުމަދު ޝިފާން އެވެ.

އެމްއެންޑީއެފުން ދެންމެ ބުނީ ގެއްލުނު ތިން މީހުންގެ ތެރެއިން ދެވަނަ މީހާ މިހާރު ފެނިފައިވާ ކަމަށެވެ. އޭނާ ވެސް އޮތީ މަރުވެފަ އެވެ. އެއީ ބިދޭސީ އެކެވެ. ދެން ނުފެންނަނީވެސް ބިދޭސީ އެކެވެ.

ބަންޑުން ޖަހާލި ކޮޅުވެއްޓި އޮތީ ކަނޑު އަޑީގައެވެ. އެމްއެންޑީއެފުން އަދިވެސް ދަނީ ގެއްލުނު މީހުންގެ ހަބަރެއް ވޭތޯ ބަލަމުންނެވެ.

މިދުވަސްވަރަކީ މޫސުން ގޯސް ދުވަސްވަރެއްކަމުން ކަނޑުމައްޗަށް އެރުމުގެ ކުރިން މޫސުމާ ބެހޭ އެންމެފަހުގެ މައުލޫމާތު ހޯދުމަށް ކަމާބެހޭ ފަރާތްތަކުން ދަނީ އިލްތިމާސްކުރަމުންނެވެ.