އެމްޑީޕީގެ ކެންޑިޑޭޓަކީ ނަޒާހަތްތެރި ކެނޑިޑޭޓެއް ނޫން - ދިއްދޫ ދާއިރާގެ ރައްޔިތުން

ދިއްދޫ ދާއިރާގެ ރައްޔިތުން، އެދާއިރާއިން މަޖިލީހަށް ކުރިމަތިލާ އެމްޑީޕީ ކެނޑިޑޭޓައި މެދު ހިތްހަމަ ނުޖެހޭ ކަމަށާއި، ބޭނުންވަނީ ނަޒާހަތްތެރި ކެނޑިޑޭޓެއް ކަމަށް އެ ރައްޔިތުން ބުނެފިއެވެ.

ދިއްދޫ ދާއިރާއަށް އެމްޑީޕީގެ ފަރާތުން ވާދަކުރައްވާ އަބްދުﷲ ވަހީދަކީ މީގެ ކުރިން ކޮރަޕްޝަންގެ މައްސަލަތަކެއްގައި ރެކޯޑްއޮތް މީހެއްކަމަށް ވަނީ ތުހުމަތުކުރެވިފައެވެ.

އެގޮތުން އޭނާ އަފަރ ނޯޓް ޔުޓްލިޓީސްގެ މެނޭޖިން ޑިރެކްޓަރަކަށް ހުންނެވިއިރު އަމަލލުކޮށްފައިވަނީ ސަރުކާރާއި ސަރުކާރުން ބައިވެރިވާ ކުންފުނިތަކުގެ ބޯޑާއި ޗެއާމަން އަދި މެނޭޖިން ޑިރެކްޓަރުންނަށް މުސާރަ ދިނުމަށް ކަނޑައަޅާފައިވާ އުސޫލާއި ޚިލާފަށް ކަމަށް އޭސީސީން ބުނެފައިވެއެވެ. އެ އުސޫލުގެ ދަށުން އަޕާނޯތު ޔުޓްލިޓީސް ގެ މެނޭޖިން ޑިރެކްޓަރަށް އިދާރީ އެލަވަންސްގެ ގޮތުގައި ކަނޑައަޅާފައިވަނީ ދިހަހާސް ފައްސަތޭކަ ރުފިޔާއެވެ. ނަމަވެސް އޭނާ މުސާރަ ނަގާފައިވަނީ ފިނޭންސް މިނިސްޓްރީގެ އުސޫލާއި ޚިލާފަށް ކަމަށްވެސް އޭސީސީން ބުނެފައިވެއެވެ.

އަދި ފިނޭންސް މިނިސްޓްރީގެ އުސޫލާއި އެއްގޮތަށް އަމަލުކުރުން އެކުންފުންޏަށް އެތައްފަހަރެއްގެ މަތިން އަންގާފައިވާކަން ފާހަގަކުރެވިފައިވާކަމަށް އޭސީސީން ބުނެފައިވެެއެވެ.

އެހެން ނަމަވެސް މެނޭޖިން ޑިރެކްޓަރަކަށް ވަހީދު ހުންނެވި ދުވަސްވަރު މުސާރައާއި އިނާޔަތުގެ ގޮތުގައި ފިނޭންސް މިނިސްޓްރީން ކަނޑައަޅާފައިވާ މުސާރައާއި އިނާޔަތްތަކަށްވުރެ އިތުރަށް 198083.33 ރުފިޔާ ނަގާފައިވާކަމަށް އޭސީސީން ބުނެފައިވެއެވެ.

އޭސީސީން ބުނީ އަޕަރ ނޯތު ޔުޓިލިޓީސް ކުންފުނީގެ މެނޭޖިން ޑިރެކްޓަރުގެ މަގާމުގެ ނުފޫޒު ބޭނުންކޮށްގެން އެ ކުންފުނީގެ ބޯޑުގެ މެމްބަރުންނަށް ވެސް ފިނޭންސުން ކަނޑައަޅާފައިވާ އިނާޔަތްތަކާއި މުސާރައަށް ވުރެ އިތުރަށް ފައިސާ ދީފައިވާކަމަށް އޭސީސީގެ ތަހުގީގަށް ފާހަގަކުރެވިފައިވާކަމަށެވެ.

އެކަމާއި ގުޅިގެން ވޮއިސްއަށް މައުލޫމާތު ދެއްވަމުން ދިއްދޫ ދާއިރާގެ ރައްޔިތުން ވިދާޅުވެފައިވަނީ ދާއިރާ ތަމްސީލުކުރުމަށް އެމީހުން ބޭނުންވަނީ ނަޒާހަތްތެރި ކޮރަޕްޝަންގެ އަމަލެއް ކޮށްފައި ނުވާ ރައްޔިތުން ދެކެ ލޯބިވާ މީހެއް ކަމަށެވެ. އަދި ވަހީދަކީ މީގެ ކުރިންވެސް

ކޮރަޕްޝަންގެ މައްސަލަތައް އޮތް މީހަކަށް ވުމުން އޭނާ މަޖިލީހަށް ހޮވައިފިނަމަ މިހާރުވެސް ކޮރަޕްޝަންގެ ހާއްޔަކަށް ވެފައިވާ މަޖިލިސް ތެރެއިން ކޮރަޕްޝަންގެ އަމަލުތައް އިތުރަށް ހިންގުމަށް މަގުފަހިވެގެންދާނެ ކަމަށެވެ. ކޮރަޕްޝަންގެ އަމަލެއް ހިނގާފައިވާ ނަމަ އެކަން ރައީސް އިބްރާހިމް މުހައްމަދު ސާލިހުގެ ސަމާލުކަމަށް ގެންނަން އެމަނިކުފާނު ވިދާޅުވެފައި ވުމުގެ ސަބަބުން އެމްޑީޕޕީގެ ފަރާތުން ދިއްދޫދާއިރާ އަށް ކުރިމަތިލާފައިވާ ވަހީދުގެ މައްސަލަ ރައީސް ސާލިހުގެ ސަމާލުކަން ގެންނަން ބޭނުންވާ ކަމަށްވެސް އެ ރައްޔިތުން ބުނެފައިވެއެވެ. އަދި ވީހާވެސް އަވަހަކަށް އޭނާގެ މައްސަލަ ބަލައި، އެމްޑީޕީގެ ފަރާތުން ދާއިރާއަށް ނަޒާހަތްތެރި ކެނޑިޑޭޓަކު ނެރެދިނުމަށް އެ ރައްޔިތުން ވަނީ ވިދާޅުވެފައެވެ.