ހަނގުރާމައަށްދާ ދިވެހިންނަށް ހޯމް މިނިސްޓަރުގެ އިންޒާރެއް!

ބޭރު ގައުމުތަކުގައި ކުރާ ހަނގުރާމައިގައި ބައިވެރިވުމަށް ދާ ދިވެހިންނަށް ހޯމް މިނިސްޓަރު އިމްރާން އަބްދުﷲ ވަރުގަދަ އިންޒާރެއް ދެއްވައިފިއެވެ.

މިނިސްޓަރު އިމްރާން މިހެން ވިދާޅުވީ، ސީރިއާގައި ހުރި ދިވެހި ހަނގުރާމަވެރިއެއް ކަމަށްވާ، ބިލާލް އަބްދުލް ކަރީމް ނަމަކަށް ކިޔާ މީހަކު، ޓީވީ ޗެނަލެއް ކަމަށްވާ "އޮން ދަ ގްރައުންޑް ނިއުސް"އަށް ދިން އިންްޓަވިއު އެއްގައި ދެއްކި ވާހަކަތަކާއި ގުޅިގެންނެވެ.

އެ ހަނގުރަމަވެރިޔާ ދިވެހި ބަހުން ދިން އިންޓަވިއުގައި ބުނީ، އެމީހުން ސީރިއާއަށް ދިޔައީ މުސްލިމުން އުޅެމުންދާ ދަތި ހާލަތުން ސަލާމަތް ކުރުމަށް ކަމަށެވެ.

އޭނާ ބުނިގޮތުގައި އެމީހުން އައިއެސްއާ ގުޅުމެއް ނެތެވެ. ރާއްޖޭގެ ހާލަތާމެދުވެ ކަންބޮޑުވުން ފާޅުކުރަމުން އޭނާ ބުނީ، ދީނާ ދުރު “ސެކިއުލާ” ބައެއްގެ ވަރުގަދަ ނުފޫޒު ސަރުކާރުގެ ތެރޭގައި އޮތް ކަމަށެވެ.

ރާއްޖެއަށް އައުމާމެދު ވިސްނާނީވެސް އެ މީހުންނަށް އުފަލުގައި އުޅެވޭނެ ގޮތްތައް ފަހި ވުމުން ކަމަށްވެސް ބުނެފައި ވެއެވެ.

އޭނާގެ އެވާހަކަތަކާއި ގުޅިގެން މިނިސްޓަރު އިމްރާން ކުރެއްވި ޓުވީޓުގައި ވިދާޅުވީ، ޓެރަރިޒަމްގެ ނުރައްކަލުން ދިވެހި ގައުމު ސަލާމަތް ކުރުމަށް އަޅަންޖެހޭ ކޮންމެ ފިޔަވަޅެއް މި ސަރުކާރުން އަޅަމުން ގެންދާނެ ކަމަށެވެ.

ދިވެހިރާއްޖޭގެ ސަލާމަތާ ރައްކާތެރިކަމަށް ބުރޫއަރާ ގޮތަށް ދުނިޔޭގެ އެއްވެސް ހިސާބެއްގައި ދިވެހިން މަސައްކަތް ކުރުމަކީ ސަރުކާރުން އަޅާނުލާ ދޫކޮށްލައިގެން ތިބޭނެ ކަމެއް ނޫން ކަމަށް އިމްރާނު ވިދާޅުވިއެވެ.

ބޭރުގެ ގައުމުތަކުގައި ކުރަމުންދާ ހަނގުރާމައިގައި ދިވެހިންގެ ތެރެއިން ބަޔަކު ބައިވެރިވަމުންދާއިރު އެގެ ތެރެއިން ބައެއް މީހުން މަރުވެ، ތުއްތު ކުދިން ވަނީ ހަލުގައި ޖެހިފައެވެ.