ބުރާސްފަތި ދުވަހު ފްލެޓް ލިސްޓް އިއުލާންކުރާނަން: ރައީސް ޑރ.މުއިއްޒު
ކުރީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ބިނާކުރި ފުރަތަމަ 4000 ފްލެޓްތަކުގެ ދާއިމީ ލިސްޓް ބުރާސްފަތި ދުވަހު އިއުލާންކުރައްވާނޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެެއެވެ.
ރައީސްް މުޢިއްޒު މިފަދައިން ވިދާޅުވީ މިއަދު ދ. ހުޅުދެލީ ރައްޔިތުންނާއިއެކު ބޭއްވި ބައްދަލުވުމުގައެވެ.
މި ބައްދަލުވުމުގައި ވާހަކަދައްކަވަމުން ރައީސް ވަނީ އެމަނިކުފާނު މީގެ ކުރިންވެސް ވިދާޅުވިފަދައިން ރޯދަމަހުގެ ކުރިން ފްލެޓް ލިސްޓް އިއުލާންކުރައްވާނެ ވާހަކަ ތަކުރާރުކުރައްވާފައެވެ. މާލެ ރައްޔިތުންނަށް މިވަގުތު އެންމެ މުހިންމު އެއް ކަމަކީ ބޯހިޔާވަހިކަން ކަން ފާހަގަކުރައްވަމުން ރައީސް ވަނީ އެމަނިކުފާނު ރޯދަމަހުގެ ކުރިން ފްލެޓް ލިސްޓް އިއުލާންކުރައްވާނެ ކަމާއި ދޭތެރޭ ބައެއް ފަރާތްތަކުން ޝައްކު އުފައްދަވާ ކަމަށް ވިދާޅުވެފައެވެ.
ނަމަވެސް، ބުރާސްފަތި ދުވަހު ފްލެޓް ލިސްޓު އިއުލާންކުރައްވާނީ ކޮންސްޓްރަކްޝަން މިނިސްޓްރީން ބާއްވާ ޕްރެސް ކޮންފަރެންސަކާއިއެކު ކަމަށް ރައީސް ވަނީ ހާމަކުރައްވާފައެވެ. މި ފްލެޓް ލިސްޓު އާންމުކުރައްވާނީ ފްލެޓް ލިބޭ ފަރާތްތަކާއި ނުލިބޭ ފަރާތްތައް އެނގޭ ފަދައިން ކަމަށާއި ފްލެޓް ނުލިބޭ ފަރާތްތަކަށް ފްލެޓް ނުލިބޭ ސަބަބު ފަދަ ތަފްސީލުތައް ދެފުށްފެންނަހެން ހާމަވާނެ ކަމަށް ރައީސް ވިދާޅުވިއެވެ. އެގޮތުން، ފްލެޓް ނުލިބޭ ފަރާތްތަކަށް ޝަކުވާ ހުށަހެޅުމުގެ ފުރުސަތުވެސް ހުޅުވާލާނެ ކަމަށް ރައީސް ވިދާޅުވިއެވެ.
އެމްޑީޕީ ސަރުކާރުގެ ގެދޮރުވެރިޔާ ސްކީމްގެ ދަށުން ސަރުކާރު ނިމެން ގާތްވެފައިވަނިކޮށް އެކުލަވާލި 4000 ފްލެޓް ލިސްޓާއި ގުޅިގެން ވަރަށް ބައިވަރު އާންމުން ވަނީ ޝަކުވާ ހުށަހަޅާފައެވެ. އެގޮތުން ޝަރުތު ހަމަނުވާ އެތައް ފަރާތްތަކަށް ފްލެޓް ބަހާފައިވާކަންވެސް އޭސީސީ އިން ވެސް ވަނީ ފާހަގަކޮށްފައެވެ. އޭސީސީ އިން މި ލިސްޓުގެ މައްސަލަ ތަހުގީގުކުރަމުންދާއިރު މި ސަރުކާރުން ވަނީ ފްލެޓް ލިސްޓު ރިވިއުކުރުމުގެ ގޮތުން ފްލެޓް ލިސްޓުގެ މަސައްކަތް މަޑުޖައްސާލާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
