މަތިން އޯޑަރެއް ނާންނަނީސް ފުލުހުންނާއި ސިފައިންގެ ފައުޖެއް މަސައްކަތެއް ނުކުރާނެ: ރައީސް ޞާލިހު

މަތިން އަންނަ އޯޑަރަކަށް މެނުވީ ސިފައިންނާއި ފުލުހުންގެ ފައުޖެއް، މަސައްކަތް ނުކުރާނެ ކަމަށް އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު ވިދާޅުވެއްޖެއެވެ.

ރައީސް ޞާލިހު މިހެން ވިދާޅުވެފައި ވަނީ، މިމަހު ނުވަ ވަނަ ދުވަހުގެ ރޭ ޕީޕަލްސް ނެޝަނަލް ފްރަންޓް (ޕީއެންއެފް) ގެ އާންމު ޖަލްސާ ޣިޔާސުއްދީން ސްކޫލްގައި އެ ސްކޫލްގެ ހުއްދަ ނެތި ބާއްވަން މަސައްކަތް ކުރުމުން އެކަން ހުއްޓުވުމަށް އެސްއޯ ފުލުހުން ނެރެ ބާރުގެ ބޭނުންކޮށްފައިވަނީ ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ އެންގުމާ ޚިލާފަށް، އެއްގޮކަށްވެސް އެސްއޯ ފުލުހުން ފޮނުވައިގެން ނުވާނެކަމުގެ “ކްލިއަރ އިންސްޓްރަކްޝަންސް” ދެއްވާފައިވަނިކޮށްކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވުމާއި ގުޅިގެންނެވެ.

އެގޮތުން ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ފުވައްމުލަކު މެދު ދާއިރާއަށް އެމްޑީޕީގެ ޓިކެޓްގައި ވާދަކުރައްވާ ކެންޑިޑޭޓްގެ ކެންޕެއިން ޖަލްސާގައި ރޭ ވާހަކަދައްކަވަމުން ރައީސް ސާލިހު ވިދާޅުވީ، ރައީސް މުޢިއްޒަށް އެނގިވަޑައިނުގެން، އަދި އެމަނިކުފާނު ނާންގަވަނީސް އެފަދަ ކަމެއް ހިނގުމަކީ ކަންބޮޑުވެލައްވާ ކަމެއް ކަމަށެވެ. އަދި މިގައުމުގެ ސިފައިން ވެސް ފުލުހުން ވެސް އޯޑަރާއި ހިލާފަށް އަމަލުނުކުރާނެ ކަމަށާއި، އެއީ ޔަގީން ކަމެއް ކަމަށް އެމަނިކުފާނު ވިދާޅުވިއެވެ.

ފުލުހުންގެ އެއްވެސް އިސް ބޭފުޅަކަށް އެނގިވަޑައިނުގަންނަވާ. މިނިސްޓަރަށް އެނގިވަޑައިނުގަންނަވާ. ރައީސްއަށް އެނގިވަޑައިނުގަންނަވާ ކަމަށް ވިދާޅުވަނީ އެކަން ހިނގިވާހަކަ. މިއީ އަޅުގަނޑުމެން ކަންބޮޑުވާންޖެހޭ ކަމެއް. އެކަމަކު އަޅުގަނޑަކީ ވެސް ރާއްޖޭގެ ވެރިކަން ފަސް އަހަރުކޮށްފައި ހުރި މީހަކަށްވާތީވެ އަޅުގަނޑަށް ހަމަ ޔަގީން ފުލުހުން ވެސް ސިފައިން ވެސް އޯޑަރަށް ނޫން ގޮތަކަށް އެމީހުން އަމަލެއް ނުކުރާނެ. އެ ހަމަ ޔަގީންކަމެއް. މިހެން ދެންނެވިއަސް ބައެއް ވަކިވަކި އިންޑިވިޖުއަލް މީހުން ތިބެދާނެ. ބައެއް ކަންތައްތައް ކުރަން. އެހެންނަމަވެސް ޖުމްލަކޮށް އެސްއޯ ފުލުހުން ވެސް ޓްރެފިކް ފުލުހުންވެސް އަދި ސިފައިންގެ ފައުޖެއް ވެސް އަމަލެއް ނުކުރާނެ މަތިން އޯޑަރެއް ނާންނަނީހެއް. އެހެންވީމަ ނޭނގޭ ވިދާޅުވެ ޑިމޮކްރަސީއަށް އެޅި ހުރަސް އެއީ އަޅުގަނޑުމެންނަށް ގަބޫލުކުރެވޭނެ ކަމެއް ނޫން.

އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު

މިއާއެކު ރައީސް ޞާލިހު ވިދާޅުވީ، އެމަނިކުފާނު ވެރިކަމުގައި ހުންނެވިއިރު، އެމްޑީޕިންވެސް މެންބަރުން ތަކެއް ވަކިވެވަޑައިގެން، ޕާޓީއެއް އުފެއްދެވި ކަމަށެވެ. އަދި އެޕާޓީ އުފެއްދުމަށް މުވައްސަސާ ތަކަށް ފުރިހަމަ އެއްބާރުލުން ދެއްވި ކަމަށާ، އެހެން ޕާޓީތަކުން ބާއްވާ ސިޔާސީ ހަރަކާތްތައް ބޭއްވުމަށްޓަކައި ދޭންޖެހޭ ހުރިހާ އެހީތެރިކަމާއި، އެއްބާރުލުމެއް ދެއްވި ކަމަށް އެމަނިކުފާނު ވިދާޅުވިއެވެ.

ރައީސް ސާލިހު ވިދާޅުވީ ފާޑު ކިޔުމާއި، ބަސް ބުނުމުގެ ފުރުސަތު ރައްޔިތުންނަށް ނުދީ، ރައްޔިތުންގެ އަޑުނާހާ ކަމަށްވާނަމަ ތިބެންޖެހޭނީ ދުރުގައި ކަމަށެވެ.

އަޅުގަނޑު ފަސް އަހަރު ވެރިކަންކޮށްފައި ފައިބައިގެން މިއައީ. އަޅުގަނޑުމެންގެ ތެރެއިން ވެސް ބަޔަކު ނުކުމެ ޕާޓީއެއް ހެދި. އެއްވެސް ދަށްޗެއް ނެތި އެހުރިހާ ކަމެއް ކުރަން ސަރުކާރުގެ ހުރިހާ މުއައްސަސާއަކުން އަޅުގަނޑުމެން އެއްބާރުލުން ދިނިން. އަދި އެހެން ޕާޓީތަކުން ބާއްވާ ސިޔާސީ ހަރަކާތްތައް ބޭއްވުމަށްޓަކައި ވާންޖެހޭ ހުރިހާ އެހީތެރިކަމެއް ކޮށްދޭންޖެހޭ ހުރިހާ އެހީތެރިކަމެއް އަޅުގަނޑުމެންގެ ސަރުކާރުން ކޮށްދީފައި ވާނީ. އެއީ އެމްޑީޕީ ގަބޫލުކުރާ ސިޔާސަތަކީ. އަޅުގަނޑުމެންނާ ދިމާލަށް ފާޑު ކިޔޭނެ. ކިޔަންޖެހޭނެ. ރައްޔިތުން އިންތިޚާބުކޮށްފައި ހުންނަ ޕަބްލިކް ސަރވިސްގައި ހުންނަ މީހަކާއި ދޭތެރޭގައި ރައްޔިތުންނަށް އެއްޗެހި ކިޔޭނެ. ބުނެވޭނެ ފާޑު ކިޔޭނެ. އެމީހެއްގެ ޕާސަނަލް މާ ބޮޑު ދާއިރާއެއް ނޯންނާނެ. އެކަން ގަބޫލުކޮށްގެން އެކަހަލަ މަގާމުތަކަށް އަޅުގަނޑުމެން އަންނަންޖެހޭނީ.

އެމްޑީޕީގެ އިސް އެޑްވައިޒަރ އަދި ކުރީގެ ރައީސް އިބްރާހީމް މުހައްމަދު ސާލިހު

ރައީސް ސާލިހު އިތުރަށް ވިދާޅުވީ މިމައްސަލަ ރައްޔިތުން މަޖިލީހުން ބަލަންޖެހޭ ކަމަށާއި، މިކަން ހިނގާދިޔަ ގޮތް ސާފުކުރަންޖެހޭ ކަމަށެވެ. އަދި 241 ކޮމެޓީން މިމައްސަލަ ބަލާނެ ކަމުގެ ޔަގީންކަން އެބައޮތް ކަމަށް އެމަނިކުފާނު ވިދާޅުވިއެވެ.