ސަރުކާރުގެ ޓެކްސީ ލައިނަށް 80 ޕަސެންޓް ރައްޔިތުން ތާއީދު ކުރާނެ

ސަރުކާރުގެ ޓެކްސީ ލައިންގެ ޚިދުމަތާއި ރައްޔިތުން ދެކޮޅު ނުވާނެ ކަމަށާ އެކަން އެނގިވަޑައިގަންނަވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ދުނިޔޭގެ ނޫސްވެރިކަމުގެ މިނިވަން ކަމުގެ ދުވަހާއި ގުޅިގެން ބޭއްވި ނޫސްވެރީންގެ ބައްދަލްވުމުގަ އެވެ. ރައީސް ވިދާޅުވީ ސަރުކާރުން ޓެކްސީ ލައިނެއް ތައާރަފު ކުރަނީ ނިޒާމީ ގޮތެއްގައި ޓެކްސީގެ ހިދުމަތް ދެވޭނެ އިންތިޒާމެއް ގާއިމު ކުުރުމަށެވެ.

އެއީ ރައްޔިތުން އެދޭ ކަމެއް ކަމަށާ އެކަމަށް ގިނަ ބަޔަކު ތާއީދު ކުރާނެ ކަން ޔަގީން ކުރައްވާ ކަމަށް ރައީސް ވިދާޅުވި އެވެ. ރައީސް ވިދާޅުވި ގޮތުގައި އެކަމާއި މެދު ރައްޔިތުންގެ ވޯޓެއް ނަގައިފިނަމަ 80 ޕަސެންޓް ރައްޔިތުން އެކަމަށް ތާއީދު ކުރާނެ ކަމަށެވެ.

ރައީސް ވިދާޅުވީ ޓެކްސީ ލައިން ފެށުމާއެކު ރައްޔިތުންނަށް ވަރަށް ބޮޑު ފަސޭހައެއް ލިބޭނެ ކަމަށެވެ. އަދި ޓެކްސީ ޑްރައިވަރުންނަށް ވެސް އެކަމުން ދެރަ އެއް ނުވާނެ ކަމަށެވެ. ސަރުކާރުން ޓެކްސީ ލައިން ފަށަނީ ވާދަވެރި މާހައުލެއް އުފައްދަން ނޫން ކަމަށާ ރައްޔިތުންގެ ފަސޭހައަށްޓަކާ ކަމަށް ވިދާޅުވި އެވެ.

ޓެކްސީ ލައިން ޤާއިމްކުރުމަށް ސަރުކާރުން ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ،އެމްޓީސީސީއާ ކަމަށެވެ. އަދި އެ ކުންފުނިން އަންނަނީ މިއަހަރުގެ މެދުތެރޭގައި ޓެކްސީ ލައިންގެ ޚިދުމަތް ފެށުމަށް ތައްޔާރުވަމުން ކަމަށް ޓްރާސްޕޯޓް މިނިސްޓްރީން ވަނީ ބުނެފަ އެވެ.