ރާއްޖެ-ޕާކިސްތާނުގެ ގުޅުން ބިނާވެފައިވަނީ އެއް އަޤީދާއަކާއި އިހްތިރާމްގެ މައްޗަށް: ސަފީރު

ދިވެހިރާއްޖެއާއި ޕާކިސްތާނުގެ ގުޅުން ބިނާވެފައިވަނީ އެއް އަޤީދާއަކާއި، އެއް ސަޤާފަތަކާއި، އެއް ތަރިކައަކާއި، އެއް މަޞްލަޙަތުތަކަކާއި، އެކަކު އަނެކަކަށް ކުރާ އިޙްތިރާމާއި އިތުބާރުގެ މައްޗަށް ކަމަށް ޕާކިސްތާނުގެ ހައި ކޮމިޝަނަރ ފައިސަލް ރަސޫލް ލޯދީ ވިދާަޅުވެއްޖެއެވެ.

އޭނާ މިހެން ވިދާޅުވީ، ޕާކިސްތާނުގެ ޤައުމީ ދުވަސް ފާހަގަކުރުމަށް މާލޭގައި ހުންނަ ޕާކިސްތާނު ހައި ކޮމިޝަނުގައި އިއްޔެ ބޭއްވުނު ޚާއްސަ ރަސްމިއްޔާތުގައި ވާހަކަދައްކަވަމުންނެވެ.

މި ރަސްމިއްޔާތުގައި ޕާކިސްތާނުގެ ހައި ކޮމިޝަނަރ ވައިސް އެޑްމިރަލް (ރ) ފައިސަލް ރަސޫލް ލޯދީ ޕާކިސްތާނުގެ ދިދަ ނެންގެވިއެވެ.

މި ރަސްމިއްޔާތުގައި ޕާކިސްތާނުގެ ރައީސް، ބޮޑުވަޒީރު އަދި ޑެޕިއުޓީ ބޮޑުވަޒީރާއި ޚާރިޖީ ވަޒީރުގެ މެސެޖުތައް ކިޔައިދީފައިވާއިރު، ހައި ކޮމިޝަނަރ ވާހަކަފުޅު ދައްކަވަމުން، ޕާކިސްތާނު ރިޒޮލިއުޝަންގެ މުހިންމުކަން ފާހަގަކުރެއްވިއެވެ. އަދި ޕާކިސްތާނުގެ މިނިވަންކަމަށް ޓަކައި ޤައުމުގެ ކާބަފައިން ކުރެއްވި ޤުރުބާނީތަކަށް ތަޢުރީފު ކުރެއްވިއެވެ.

މީގެ އިތުރުން ހައި ކޮމިޝަނަރގެ ވާހަކަފުޅުގައި، ރާއްޖޭގެ ރައީސް ޑރ. މުޙައްމަދު މުޢިއްޒުއާއި ޕާކިސްތާނުގެ ބޮޑުވަޒީރު މުޙައްމަދު ޝަހްބާޒް ޝަރީފްގެ ދެމެދުގައި އޮތް ސްޓްރެޓެޖިކް ވިޝަންގެ މުހިންމުކަން ފާހަގަކުރެއްވިއެވެ. އަދި ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާކުރުމަށް މަސައްކަތް ކުރައްވާނެކަމަށް ވިދާޅުވިއެވެ.

ހައި ކޮމިޝަނަރ ވިދާޅުވީ، ޕާކިސްތާނަކީ ބައިނަލްއަޤްވާމީ އެއްބާރުލުމާއި ޑިޕްލޮމަސީއަށް އަހަންމިއްޔަތުކަން ދޭ ޤައުމެއްކަމަށެވެ. އަދި އދ. ގެ ޗާޓަރާއި ބައިނަލްއަޤްވާމީ ޤާނޫނުގެ މުޤައްދަސްކަމަށް ޕާކިސްތާނުން ޤަބޫލުކުރާކަމަށް ވިދާޅުވިއެވެ. އެހެންކަމުން، ފަލަސްޠީނުގައާއި، ޖަމްމޫ - ކަޝްމީރުގައި އދ. ގެ ޤަރާރުތައް ތަންފީޒުކުރުމަށް ޕާކިސްތާނުން ގޮވާލާކަމަށް ވިދާޅުވިއެވެ.

ޕާކިސްތާނާއި ދިވެހިރާއްޖޭގެ ގުޅުމާ ބެހޭގޮތުން ވާހަކަދައްކަވަމުން، ހައި ކޮމިޝަނަރ ވިދާޅުވީ ދެ ޤައުމުގެ ގުޅުން ބިނާވެފައިވަނީ އެއް އަޤީދާއަކާއި، އެއް ސަޤާފަތަކާއި، އެއް ތަރިކައަކާއި، އެއް މަޞްލަޙަތުތަކަކާއި، އެކަކު އަނެކަކަށް ކުރާ އިޙްތިރާމާއި އިތުބާރުގެ މައްޗަށް ކަމަށެވެ. އަދި މި ގުޅުން އަހަރުތަކާއެކު ފުޅާވެ، މިހާރު ތަޢުލީމު، ޞިއްޙަތު، އިންސާނީ ވަސީލަތްތައް ތަރައްޤީކުރުން، ވިޔަފާރި، އިޤްތިޞާދު، މޫސުމަށް އަންނަ ބަދަލުތައް، ދިފާޢީ އެއްބާރުލުން، މީޑިއާ މެނޭޖްމަންޓް، ޤާނޫނު ތަންފީޒުކުރާ އިދާރާތަކުގެ ތަމްރީނު، އަދި ކަނޑުގެ ސަލާމަތާއި ރައްކާތެރިކަން ފަދަ ގިނަ ދާއިރާތަކެއް ހިމެނޭކަމަށް ވިދާޅުވިއެވެ.

ރަސްމިއްޔާތުގައި ވާހަކަދައްކަވަމުން ޚާރިޖީ ވަޒީރު ޑރ. ޢަބްދުالله ޚަލީލް ވަނީ ޕާކިސްތާނުގެ ރައީސަށާއި، ސަރުކާރަށާއި އަދި ރައްޔިތުންނަށް ހޫނު މަރުޙަބާއާއި ތަހުނިޔާ ދެންނަވާފައެވެ. އަދި ދެ ޤައުމުގެ ގުޅުން ބިނާވެފައިވަނީ އެއް އަޤީދާއަކާއި، އެއް ސަޤާފަތަކާއި، އެއް ތަރިކައަކާއި، އެއް މަޞްލަޙަތުތަކަކާއި، އެކަކު އަނެކަކަށް ކުރާ އިޙްތިރާމާއި އިތުބާރުގެ މައްޗަށްކަން އޭނާވެސް ފާހަގަކުރެއްވިއެވެ. އަދި ރާއްޖޭގެ ތަރައްޤީއަށް ޕާކިސްތާނުން ދެއްވާ އެހީތެރިކަމަށް ޝުކުރު އަދާކުރެއްވިއެވެ.

މި ރަސްމިއްޔާތަށްފަހު ޕާކިސްތާނު ދުވަސް ފާހަގަކުރުމުގެ ގޮތުން ރޯދަވީއްލުމެއްވެސް ދީފައިވެއެވެ. މި ރަސްމިއްޔާތުގައި ރާއްޖޭގެ ވަޒީރުންނާއި، އެމް.އެން.ޑީ.އެފްގެ އިސް އޮފިސަރުންނާއި، ސަރުކާރުގެ އިސް ބޭފުޅުންނާއި، ވިޔަފާރިވެރިންނާއި، މީޑިއާގެ ބޭފުޅުންނާއި، ރާއްޖޭގައި ދިރިއުޅޭ ޕާކިސްތާނު ރައްޔިތުން ބައިވެރިވިއެވެ.