ކޮޅުވެއްޓިއެއް ބަންޑުން ޖަހާލުން: ކަނޑުވި މީހުންގެ ތެރެއިން އެކަކު ފެނިއްޖެ

މާލެއިން ފުރައިގެން ރީތިރަށް ރިސޯޓަކަށް ދަތުރުކުރަމުންދިޔަ ކޮޅުވެއްޓިއެއް ބަންޑުންޖަހާލި ހާދިސާގައި ކަނޑުވި މީހުންގެ ތެރެއިން އެކަކު ފެނިއްޖެއެވެ.

ފުލުހުން ބުނީ ރޭ ދަންވަރު ހިނގި މި ހާދިސާގައި ގެއްލުނު 3 މީހުންގެ ތެރެއިން އެކަކު ފެނިފައިވާކަމަށެވެ. އޭނާ ފެނުނުއިރު އޮތީ ނިޔާވެފައި ކަމަށްވެސް ފުލުހުން ބުންޏެވެ. މި މީހާ ފެނިފައިވަނީ މިއަދު ހެނދުނު 08:04 ހާއިރުކަމަށް ފުލުހުން ބުންޏެވެ.

ކޮޅުވެއްޓި ބަންޑުން ޖަހާލިއިރު އޭގައި 7 މީހަކު ތިއްބެވެ. "އަލްމާކް ފިޔަ" ނަމަކަށް ކިޔާ މި އުޅަނދު ބަންޑުން ޖަހާލުމާ ގުޅިގެން ކަނޑުވެ ގެއްލުނު މީހާ ފެނިފައިވަނީ ކޯސްޓްގާޑުގެ ޑައިވަރުންގެ ޓީމުން ކުރި މަސައްކަތުންނެވެ. ދިގުމިނުގައި 100 ފޫޓު ހުންނަ އެ އުޅަނދު އަޑިއަށްދިޔަ ސަރަހައްދުގައި ކޯސްޓްގާޑުގެ ޑައިވަރުންގެ ޓީމުން ގެއްލުނު މީހުން ހޯދުމުގެ މަސައްކަތް ކުރަމުންދާކަމަށް އެމްއެންޑީއެފުން ވަނީ ބުނެފައެވެ. އަދި މިހާތަނަށް 4 މީހަކު ވަނީ ސަލާމަތްކޮށްފައެވެ.

މިދުވަސްވަރަކީ މޫސުން ގޯސް ދުވަސްވަރެއްކަމުން މޫސުމާ ބެހޭ އެންމެ ފަހުގެ މައުލޫމާތު ކަށަވަރުކޮށްގެން ނޫނީ ކަނޑުމައްޗަށް ނޭރުމަށް ކަމާބެހޭ ފަރާތްތަކުން ދަނީ އިލްތިމާސްކުރަމުންނެވެ.