ރޭ ހުޅުމާލެއިން ކަރަންޓު ދިޔައީ ބަޔަކު ސަބްސްޓޭޝަނަކަށް ގެއްލުންދިނުމުގެ ސަބަބުން: ސްޓެލްކޯ

ރޭ ހުޅުމާލޭގެ ދެވަނަ ފިޔަވަހީގެ ބައެއް ސަރަހައްދުތަކުން ކަރަންޓު ކެނޑިފައިވަނީ ސަބްސްޓޭޝަނަކަށް ބަޔަކު ގެއްލުންދޭން އުޅުމުގެ ތެރޭގައި ނެޓްވޯކް ފީޑާރގެ ބައެއް އޮފްވެގެން ކަމަށް ސްޓެލްކޯއިން ބުނެފިއެވެ.

ސްޓެލްކޯއިން މިއަދު ބުނީ، ރޭ ދަންވަރު 3:30 ހާއިރު، ހުޅުމާލޭގެ ދެވަނަ ފިޔަވަހީގެ ވިނަރެސް އަދި ހިޔާގެ ބައެއް ޓަވަރުތަކުންނާއި، އެމްޕީއެލް ޓަވަރުތަކުން ކަރަންޓުގެ ޚިދުމަތް މެދުކެނޑުނު ކަމަށާއި، ކަރަންޓު ކެނޑިފައިވަނީ އެ ގެއްލުމުގެ ސަބަބުން ކަމަށެވެ.

އަދި އެ ފަރާތްތަކަށް ކަރަންޓު އަލުން ދެވިފައިވަނީ ފަތިހު 04:57 ހާއިރު ކަމަށް ވެސް ސްޓެލްކޯއިން ބުންޏެވެ.

ސަބްސްޓޭޝަނަށް ގެއްލުންދިން މައްސަލަ މިހާރު ފުލުހުންނަށް ހުށަހަޅާފައިވާ ކަމަށް ވެސް ސްޓެލްކޯއިން ބުންޏެވެ.

"މިދެންނެވި ސަބްސްޓޭޝަނަށް ގެއްލުންދިން މައްސަލަ ކަމާ ބެހޭ ފަރާތަށް ހުށައަޅާ މިފަދަ ހާދިސާތައް ތަކުރާރުވިޔަ ނުދިނުމަށް ކަމާބެހޭ ފަރާތްތަކުގެ ސަމާލުކަމަށް ގެނައުމަށް މިކުންފުނިންދަނީ މަސައްކަތްކުރަމުންނެވެ،" ސްޓެލްކޯ އިން ބުންޏެވެ.

ސްޓެލްކޯ އިން ގިނަ ބަޔަކަށް ތަކުލީފަކަށްވާ އަދި އަމިއްލަ ފުރާނައަށް ވެސް ނުރައްކާތެރި ޢަމަލުތައް ހިންގާ ފަރާތްތަކުގެ މައުލޫމާތު ކަމާއިބެހޭ ފަރާތްތަކާއި ހިއްސާކުރުމަށް ޢާންމުންގެ ކިބައިން އެދިފައެވެ.

މުޖުތަމަޢުގެ ގިނަ ބަޔަކަށް ތަކުލީފަކަށްވާ، އަދި އަމިއްލަ ފުރާނައަށްވެސް ނުރައްކާތެރި މިފަދަ އަމަލުތައް ހިންގާ ފަރާތްތަށް ހުއްޓުވުމަށާއި، ތަކުރާރުވިޔަ ނުދިނުމަށްޓަކައި، މިފަދަ ކަންކަން ކުރާ ފަރާތްތަކުގެ މަޢުލޫމާތު ކަމާއިބެހޭ ފަރާތްތަކާއި ހިއްސާ ކުރަމުން ގެންދިއުމަކީ މިކުންފުނީގެ ވަރަށް ބޮޑު އިލްތިމާސެކެވެ. އަދި މި ހާދިސާގެ ސަބަބުން ކަސްޓަމަރުންނަށް ދިމާވި ދަތިތަކަށް ނިހާޔަތަށް މަޢާފަށް އެދެމެވެ.

ސްޓެލްކޯ

ސްޓެލްކޯގެ ސަބްސްޓޭޝަންތަކަށް ގެއްލުންދީ، އެ ސްޓޭޝަންތަކުން ވައްކަންކުރާ މައްސަލަވެސް ވަނީ ބޮޑުވެފައެވެ. އެފަދަ ކަންކަމުގެ ސަބަބުން ވަރަށް ގިނަ ފަހަރު އެ ސްޓޭޝަން ހުންނަ ސަރަޙައްދުން ކަރަންޓު ކެނޑިފައިވާކަން ފާހަގަކުރެވެއެވެ. އަދި އެ ސަބްސްޓޭޝަންތަކުގައި ހުންނަ ޓްރާންސްފޯމަރުތައް ނިއްވާލައި، އޭގެން ވައްކަންކުރަން އުޅެނިކޮށް ކަރަންޓުގައި ޖެހި މަރުވުން ފަދަ ޙާދިސާތައް ހިނގައިފައިވާކަން ވެސް ފާހަގަކުރެވެއެވެ.

އެގޮތުން މިދިޔަ އަހަރު މާރިޗު މަހުގެ ތިން ވަނަ ދުވަހު ވަނީ، ހިޔާގެ ތިން ވަނަ ޓަވަރުގެ ކައިރީގައި ހުންނަ ޓްރާންސްފޯމަރު ތެރެއިން ވައްކަން ކުރަން އުޅެނިކޮށް ކަރަންޓުގައި ޖެހިގެން ވެސް މީހަކު މަރުވެފައެވެ.