ޑިމޮކްރެޓްސްގެ ރައީސަކަށް އިންތި، ނައިބަކަށް ވައްޑޭ އިންތިހާބުކޮށްފި

ދަ ޑިމޮކްރެޓްސްގެ އައު ރައީސަކަށް، ރައްޔިތުން މަޖިލީހުގެ މާފަންނު އުތުރު ދާއިރާގެ ކުރީގެ މެމްބަރު، އިމްތިޔާޒް ފަހުމީ (އިންތި) އިންތިހާބުކޮށްފިއެވެ.

ޑިމޮކްރެޓްސްގެ ރައީސަކަށް އިންތި ހޮވާފައިވަނީ، އެކަމަށްޓަކައި މިރޭ، ބޭއްވި އެޕާޓީގެ ޖެނެރަލް އެސެމްބްލީގައެވެ. ޑިމޮކްރެޓްސްގެ ރައީކަމުގެ މަޤާމަށް އިންތި އައްޔަނުކުރުމަށް 34 މެމްބަރަކު ވޯޓުދިނެވެ. ޑިމޮކްރެޓްސްގެ ރައީސްކަމުގެ މަޤާމަށް އިންތި ހޮވިއިރު، އޭނާ މިހާތަނަށް ހުންނެވީ އެޕާޓީގެ ތަރުޖަމާނުކަމުގެ މަޤާމުގައެވެ.

މި ބައްދަލުވުމުގައި ޑިމޮކްރެޓްސްގެ ނައިބުރައީސަކަށް ހޮވާފައިވަނީ، އުނގޫފާރު ދާއިރާގެ ކުރީގެ މެންބަރު މުޙައްމަދު ވަހީދު (ވައްޑޭ) އެވެ.

ޑިމޮކްރެޓްސްގެ ރައީސަކަށް އިންތި އަދި ނައިބަކަށް ވައްޑޭ ހޮވާފައިމިވަނީ، ކުރިން އެޕާޓީގެ ރައީސަކަށް ހުންނެވި ހަސަން ލަތީފް، އަދި ނައިބަކަށް ހުންނެވި މުހައްމަދު ޝިފާޒް (ޝިއްޕެ) ޕާޓީ ދޫކޮށްލުމުން އެ ދެ މަޤާމު ހުސްވުމުންނެވެ. ހަސަން ލަތީފް އެމްޑީޕީއާ ގުޅިވަޑައިގެންނެވީ، ޑިމޮކްރެޓްސްގެ ތެރެއިން ސަރުކާރެއް އުފަންކުރުވައިގެން ރައްޔިތުންނަށް ހިދުމަތްކުރުމުގެ ފުރުސަތު އޮތްކަން ގަބޫލުކުރަން ދަތިކަމަށް ވިދާޅުވެއެވެ. މިކަމާ ގުޅޭގޮތުން ރާއްޖެޓީވީގައި ވާހަކަދައްކަވަމުން ހަސަން ވިދާޅުވީ ޑިމޮކްރެޓްސްއާ ހިލާފަށް، އެމްޑީޕީއަކީ ބޮޑު ޕާޓިއެއްކަމުން ރައްޔިތުންނަށް ހިދުމަތް ކުރުމަށް ކުރެވޭނެ މަސައްކަތްތައް ގިނަވާނެ ކަމަށެވެ.