ދިރާސީ އާ އަހަރު ފެށުމުގެ ކުރީން ހުރިހާ ސްކޫލެއް އޭސީކޮށް ނިންމަން ފެނަކައަށް

ދިރާސީ އާ އަހަރު ފެށުމުގެ ކުރީން ހުރިހާ ސްކޫލެއް އޭސީކޮށް ނިންމަން ފެނަކަ ކޯޕަރޭޝަނާއި މިއަދު ހަވާލުކޮށްފި އެވެ.

އެޑިއުކޭޝަން މިނިސްޓްރީގައި މިއަދު އޮތް ރަސްމިއްޔާތެއްަގއި ފެނަކައަށް އެ މަސައްކަތް ހަވާލުކޮށް އެއްބަސްވުމުގައި ވަނީ ސޮއިކޮށްފަ އެވެ. އެޑިއުކޭޝަން މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އިސްމާއީލް ޝަފީއު އެވެ. ފެނަކަ ކޯޕަރޭޝަންގެ ފަރާތުން ސޮއިކުރެއްވީ ކުންފުނީގެ މެނޭޖިން ޑިރެކްޓަރު މުހައްމަދު ނަޖާހު އެވެ.

އެޑިއުކޭޝަން މިނިސްޓްރީން ބުނީ ސަރުކާރުން ފަށާފައިވާ ކޫލް ސްކޫލް ޕްރޮޖެކްޓްގެ ދަށުން ހުރިހާ ސުކޫލްތަކެއް ދިރާސީ އާ އަހަރު ފެށުމުގެ ކުރީން އޭސީކޮށް ނިންމާނެ އެވެ.

އެޑިއުކޭޝަން މިނިސްޓްރީން ބުނި ގޮތުގައި މި މަަސައްކަތް ފެނަކައާ ހަވާލުކުރީ 54 މިލިއަން ރުފިޔާއަށް ކަމަށެވެ.

ރާއްޖޭގައި މި ވަގުތު ގާތްގަނޑަކަށް 3604 ކްލާސްރޫމް ހުރި ކަމަށާ، އެ ހުރިހާ ކްލާސްރޫމެއް މި އަހަރުގެ ސެޕްޓެމްބަރ މަސް ނޫނީ، މިއަހަރު ނިމުމުގެ ކުރިން އޭސީ ކުރުމަކީ ސަރުކާރުގެ އަމާޒު ކަމަށް ރައީސް ވަނީ ކުރީން ވިދާޅުވެފަ އެވެ.

ކޫލް ސްކޫލް ޕްރޮޖެކްޓްގެ ފޭސް 2 ގައި ސްކޫލުގައި ސޯލަރ ޕެނަލް ހަރުކުރުމަށް ނިންމާފައިވާއިރު މީގެ ސަބަބުން ސްކޫލުގައި ބޭނުންކުރާ ކަރަންޓުގެ %30 ސޯލަރ ހަކަތައަށް ބަދަލުވެ، ކަރަންޓަށް ދާ ޚަރަދު ކުޑަވެގެންދާނެ ކަމަށް އެޑިޔުކޭޝަން މިނިސްޓްރީން މީގެ ކުރިން ބުނެފައިވެއެވެ.