ބޭރުގައި ތިބޭ ދިވެހި ދަރިވަރުންނަށް ދިވެހި އިސްލާމް ކިޔަވައިދޭ ޕްރޮގްރާމް ފަށަނީ

މިސަރުކާރުން ނިންމާފައިވާ ފަދައިން ރާއްޖެއިން ބޭރުގައި ތިބި ދިވެހި ދަރިވަރުންނަށް ދިވެހި އިސްލާމް ކިޔަވައި ދިނުމުގެ ޕްރޮގްރާމް އަންނަ ހަފުތާގައި ފަށަނެކަމަށް މި ސަރުކާރުން ހާމަކުރައްވައިފިއެވެ.

މިކަން ހާމަކުރައްވާފައި ވަނީ ރާއްޖޭގެ ރައީސުލްޖުމުހޫރިއްޔާ ކަމުގެ މަޤަމާއި ހަވާލުވެ ވަޑައިގެންނެވުމަށް ފަހު ފުރަތަމަފަހަރަށް ރާއްޖޭގެ އަތޮޅުތަކަށް ރައީސް ޑރ.މުހައްމަދު މުއިއްޒު ކުރައްވަން ފެއްޓެވި ދަތުރުފުޅުގެ ތެރެއިން ތ.އަތޮޅު ވަންދޫ ރައްޔިތުންނާއި އެމަނިކުފާނު ބައްދަލުކުރެއްވި ބައްދަލުވުމުގެ ތެރެއިން އެޑިއުކޭޝަން މިނިސްޓަރު ޑރ.އިސްމާއީލް ޝަފީޢު ދެއްކެވި ވާހަކަފުޅުގައެވެ.

މިނިސްޓަރ ޝަފީއު ވިދާޅުވީ ދިވެހި އަދި އިސްލާމަކީ ހަމައެކަނި ދިވެހިރާއްޖޭގައި ކިޔަވާ ދަރިވަރުންނަށް އުނގަންނައިދޭން ޖެހޭ މާއްދާތަކެއްކަމަށް ރައީސް ދެކެވަޑައި ނުގަންނަވާކަމަށާއި، އެހެންކަމާއިއެކު ބޭރުގައި ތިބޭ ދަރިވަރުންނަށް އެ ދެމާއްދާ ކިޔަވައި ދިނުމަށް ޕްރޮގްރާމެއް ރޭވި އަންނަ ހަފުތާތެރޭގައި އެޕްރޮގްރާމް ފެށިގެންދާނެ ކަމަށެވެ.

"އަންނަ ހަފުތާ ތެރޭގައި ރާއްޖެއިން ބޭރުގައި ދިރިއުޅޭ ދިވެހިންނަށް ދިވެހިބަހާއި އިސްލާމް ކިޔަވައިދިނުމުގެ ޕްރޮގުރާމު ފަށައިގަންނާނަން. މި ޕްރޮގުރާމަކީ ކުރިންވެސް އޮތް ޕްރޮގުރާމެއް. އެހެންނަމަވެސް ފާއިތުވެދިޔަ ސަރުކާރުން މާބޮޑު ސަމާލުކަމެއް ނުދިނުމުގެ ސަބަބުން ލަންކާގައި އޮތް ޕްރޮގުރާމުވެސް، މެލޭޝިޔާގައި އޮތް ޕްރޮގުރާމުވެސް އޮތީ ހުއްޓިފައި،" ޝަފީއު ވިދާޅުވިއެވެ.

ޝަފީއު ވިދާޅުވިއެވެ.

މިއަދުގެ އެ ބައްދަލުވުމުގައި މިނިސްޓަރ ޝަފީއު ވަނީ މި ސަރުކާރުން ކިޔަވައި ދިނުމަށް ގެންނަމުންދާ ބައެއް ބަދަލުތައް ރައްޔިތުންނާއި ހިއްސާ ކުރައްވާފައެވެ. އެގޮތުން އެކަޑަމިކް އަހަރު ކޮވިޑް 19 ގެ ކުރިން އޮތްގޮތަށް ބަދަލުކުރަމުން ގެންދަވާކަން ހާމަކުރެއްވިއެވެ.

އޭގެ އިތުން މިނިސްޓަރ ވިދާޅުވީ މި ސަރުކާރުން އަލަށް ކިޔަވައިދެން ފެށި ޤައުމިއްޔަތު މާއްދާ ކިޔަވައިދެން ވާންޖެހޭ ހުރިހާ ތައްޔާރީއެއް މިހާރުވެ، ނިމިފައިވާ ކަމަށާއި އަދި 11 ސްކޫލެއްގައި ޕައިލެޓް ޕްރޮޖެޓްގެ ދަށުން މިހާރު ޤައުމިއްޔަތު މާއްދާ ކިޔަވައިދެން ވެސް ފަށާފައިވާ ކަމަށެވެ.

މި 11 ސްކޫލުން ލިބޭ މަޢުލޫމާތުތަކުގެ އަލީގައި އިތުރަށް ރަނގަޅުކުރަން ޖެހޭ ކަންތައްތައް ރަނގަޅުކޮށް އަންނަ އަހަރުގެ ދިރާސީ އަހަރުގެ ކިޔަވައިދިނުމުގެ ތެރޭގައި ޤައުމިއްޔަތު މާއްދާ ހުރިހާ ސްކޫލެއްގައި ވެސް ކިޔަވައިދެވިގެންދާނެ ކަމަށެވެ.