ފެނާއި ނަރުދަމާގެ އެއްވެސް މަޝްރޫޢުއެއް ހުއްޓާލައިގެން ނުތިބޭނަން: ޑރ މުއްޠަލިބު

ރައީސް ޑރ. މުހައްމަދު މުއިއްޒުގެ ސަރުކާރުން ފެނާއި ނަރުދަމާގެ އެއްވެސް މަޝްރޫއުއެއް މަޑުޖައްސާލާފައި ނުވަތަ ހުއްޓާލާފައި ނުބާއްވާނެ ކަމަށް ޢިމާރާތް ކުރުމާއި ބިނާރާ ބެހޭ ވުޒާރާގެ ވަޒީރު ޑރ. އަބްދުالله މުއްތަލިބު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ކެންދޫ ދާއިރާގެ އެމްޑީޕީގެ މެމްބަރު، މަޢުރޫފު ޒާކިރު ވަނީ ބ. ދޮންފަނުގެ ފެނާއި ނަރުދަމާގެ ނިޒާމް ގާއިމް ކުރުމުގެ މަސައްކަތް ހުއްޓިފައިވާތީ އެކަމާއި ގުޅެގޮތުން ވަޒީރާއި ސުވާލު ކުރައްވާފައެވެ.

އެ ސުވާލަށް ޖަވާބު ދެއްވަމުން ވަޒީރު ވިދާޅުވީ އެ މަސައްކަތް ފެނަކައާއި ހަވާލުކޮށްފައިވަނީ 2021 ވަނަ އަހަރުގެ ތެރޭގައި ކަމަށެވެ. އަދި ޕްރޮޖެކްޓް ނިންމަން ކަނޑައަޅާފައި އޮތް ތާރީޚަކީ 22 ޖޫން 2023 ކަމަށާ، އެހެން ނަމަވެސް 2023 ވަނަ އަހަރުގެ ޖުލައި މަހުންފެށިގެން މަޝްރޫޢު މަޑުޖެހި ކުރިއަށް ނުދާތީއާއި، ފެނަކައަށް މަޝްރޫޢު ނިންމޭނެ ކަމުގެ އެއްވެސް ޔަގީންކަމެއް ނެތުމުން، އެ ކޮންޓްރެކްޓް މި އަހަރުގެ ތެރޭގައި ބާތިލް ކޮށްފައިވާ ކަމަށް މުއްޠަލިބު ވިދާޅުވިއެވެ.

މުއްޠަލިބު ވިދާޅުވީ އެ މަސައްކަތާއި ފެނަކަާއި ދެންވެސް ހަވާލު ކުރެވިފައިހުރި، އެފަދަ ހުރިހާ މަސައްކަތެއް އެމްޑަބްލިޔު އެސްސީއާ ހަވާލު ކުރުމަށް މަސައްކަތް ކުރައްވަމުންދާ ކަމަށެވެ.

ފެނަކައަކީ މިކަހަލަ ޕްރޮޖެކްޓް ހިންގާނެ ކޮންޓްރެކްޓަރަކަށް ނުވާތީ، އާއި ޚިދުމަތް ފޯރުކޮށްދޭ ސާވިސް ޕްރިވައިޑާ އަކަށް ވާތީ، ސަރުކާރުން ނިންމީ އެގޮތަށް ފެނަކައާއި ހަވާލު ކޮށްފައި ހުރި ހުރިހާ މަސައްކަތެއްގެ ކޮންޓްރެކްޓް ބާތިލްކޮށް އެމްޑަބްލިޔުއެސްސީއާ ވާހަކަދައްކައިގެން، ޑައިރެކްޓް ނެގޯޝިއޭޝަނެއްގެ ތެރެއިން އެމްޑަބްލިޔުއެސްސީއާ ހަވާލު ކޮށްގެން ކުރިއަށް ގެންދަން

ވަޒީރު ޑރ. އަބްދުالله މުއްތަލިބު

އަދި އެ މަސައްކަތްތައް މި މަސް ތެރޭގައި ޓެންޑަރ ކުރެވި އެވޯޑް ކުރެވޭނެ ކަމަށް އުއްމީދު ކުރައްވާކަމަށްވެސް ވަޒީރު ވިދާޅުވިއެވެ.

މިއާއެކު ވަޒީރު ވަނީ، ފެނާއި ނަރުދަމާގެ އެއްވެސް ރަށެއްގެ ޕްރޮޖެކްޓެއް ހުއްޓާލައިގެން މި ސަރުކާރުން ނުތިބޭނެ ކަމުގެ ޔަގީންކަން ދެއްވާފައެވެ.

ސަރުކާރުން ވަރަށް ބޮޑަށް އިސްކަމެއް ދޭ ކަމެއް އެއީ އަސާސީ ޚިދުމަތްތައް ފޯރުކޮށްދިނުން. ފެނާއި ނަރުދަމާގެ އެއްވެސް ރަށެއްގެ މަޝްރޫއެއް، މިހާރު ޚިދުމަތް މުލިބި ހުރި އެއްވެސް ރަށެއްގެ މަޝްރޫޢުއެއް އަޅުގަނޑުމެން ހުއްޓާލައި ނޫނީ މަޑުޖައްސާލައިގެން ނުތިބޭނަން. ވީހާވެސް އަވަހަށް މަޝްރޫއުތައް ފަށައި، ރައްޔިތުންނަށް ޚިދުމަތް ފޯރުކޮށްދިނުމަކީ ސަރުކާރުން އެންމެ އިސްކަންދޭ ކަންތައް.

ވަޒީރު ޑރ. އަބްދުالله މުއްތަލިބު

މުއްތަލިބު ވިދާޅުވީ މި ސަރުކާރުން މަސައްކަތް ކުރަމުން ދަނީ ނަތީޖާ ނެރެންކަމަށާއި އެ ޔަގީންކަން ރައްޔިތުންނަށް ދޭކަމަށެވެ.