ބްލޫމްބަރގް އިނިޝިއޭޓިވްގެ ގްރާންޓަސް ޕްރޮގްރާމުން އެހީއަށް އެދި ހުށަހެޅުމުގެ ފުރުސަތު ހުޅުވާލައިފި

މަޝްހޫރު ބިލިއަނަރު މައިކަލް ބްލޫމްބަރގްގެ ބްލޫމްބަރގް އިނިޝިއޭޓިވްގެ ގްރާންޓަސް ޕްރޮގްރާމުން އެހީއަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.

"ބްލޫމްބަރގް އިނީޝިއޭޓިވް ޓު ރެޑިއުސް ޓޮބޭކޯ ޔޫސް" އަކީ ދުނިޔޭގެ ފެންވަރުގައި ހިލޭ އެހީ ދިނުމުގެ ތަފާތު ހަރަކާތްތައްކަށް އެހީދެއްވާ ފަރާތެއް ކަމުގައިވާ މައިކަލް ބްލޫމްބަރގްގެ އެހީގައި، ފަގީރު އަދި މެދުފަންތީގެ ޤައުމުތަކާ އެކުގައި ދުންފަތުގެ އިސްތިއުމާލުކުރުން މަދުކުރުމަށް 2006 ވަނަ އަހަރުން ފެށިގެން ހިންގާ މަޝްރޫޢު އެކެވެ. މި މަޝްރޫޢު އިންތިޒާމުކޮށް ހިންގަނީ ހިލޭ ސާބަހަށް މަސައްކަތްކުރަމުންދާ ޖަމިއްޔާއެއްކަމަށްވާ "ކެމްޕެއިން ފޯ ޓޮބޭކޯ ފްރީ ކޮޑްސް" އާ ގުޅިގެންނެވެ. މި މަޝްރޫޢުގެ ދަށުން ކުރިއަށްގެންދާ ގްރާންޓް ޕްރޮގްރާމުގެ 39 ބުރުން އެހީއަށް އެދުމުގެ ފުރުސަތު މިހާރު ވަނީ ހުޅުވާލާފައެވެ.

މިކަމާ ގުޅޭގޮތުން ހެލްތު ޕްރޮޓެކްޝަން އޭޖެންސީން ކުރި އިއުލާނެއްގައި ބުނެފައިވަނީ، އެހީއަށް އެދި ހުށަހަޅަންޖެހެނީ ސީދާ އެ ޕްރޮގްރާމުގެ ވެބްސައިޓް މެދުވެރިކޮށް ކަމަށެވެ. މި ޕްރޮގްރާމުގެ ދަށުން އެހީދިނުމަށް ނިންމާފައިވަނީ އެ ޕްރޮގްރާމެއްގެ ދަށުން ފާހަގަކޮށްލެވޭ ބަދަލުތަކާއި ކުރިއެރުންތައް ދުންފަތް ކޮންޓްރޯކުރުމުގެ ސިޔާސަތްތަކަށް ގެނައުމަށް އަމާޒުކުރެވިފައިވާ ހުށަހެޅުންތަކަށެވެ.

މި ޕްރޮގްރާމުގެ ދަށުން އެހީއަށް އެދި ހުށަހެޅޭނީ މިހިނގާ ފެބުރުއަރީމަހުގެ 25 ވަނަ ދުވަހުގެ ނިޔަލަށެވެ.