ވޭތުވެދިޔަ 25 އަހަރުގެ ތެރޭ ނުފެތުރޭ ވަރަށް އެފްރިކާގައި ކޮލެރާ ފެތުރެނީ

ފާއިތުވި 25 އަހަރުގެ ތެރޭގައި ވެސް ނުފެތުރޭ މިންވަރަކަށް އެފްރިކާގައި ކޮލެރާ ފެތުރެން ފަށައިފިއެވެ.

އެފްރިކަން ޔޫނިއަންގެ ޕަބްލިކް ހެލްތު އޭޖެންސީއެއް ކަމަށްވާ އެފްރިކާ ސެންޓަރސް ފޮރ ޑިޒީޒް ކޮންޓްރޯލް އެންޑް ޕްރިވެންޝަން (ސީޑީސީ) އިން ބުރާސްފަތި ދުވަހު، ނެރުނު ރިޕޯޓެއްގައި ބުނެފައިވަނީ މިއަހަރުގެ މިހާތަނަށް ގާތްގަނޑަކަށް 300,000 ކޮލެރާގެ ކަށަވަރުކުރެވިފައިވާ އަދި ޝައްކުކުރެވޭ ކޭސްތައް ރެކޯޑުކޮށްފައިވާ ކަމަށެވެ. މީގެ އިތުރުން، މި ބަލީގައި 7,000 އަށްވުރެ ގިނަ މަރުގެ ހާދިސާތައް ރިކޯޑުކޮށްފައިވާކަމަށެވެ. މިއީ ފާއިތުވި އަހަރު ރެކޯޑު ކުރެވުނު ޖުމްލަ 254,075 ކޭސްއަށްވުރެ 30 އިންސައްތަ އިތުރުވުމެކެވެ.

މި ބަލި އެންމެ ހަލުވި ދުވެލީގާއި ފެތުރެމުންދާކަމަށް ރިޕޯޓުކޮށްފައިވަނީ އެންގޯލާ އަދި ބުރުންޑީގައެވެ. އެގޮތުން އެންގޯލާއިން މިހާތަނަށް  33,563 ކޮލެރާގެ ކޭސް ފެނިފައިވާ ކަމަށާއި، ކޮލެރާގެ ސަބަބަުން 866 މަރުގެ ހާދިސާ ހިނގާފައިވާކަމަށް ރިޕޯޓުތަކުން ދައްކައެވެ. ބުރުންޑީން މަދުވެގެން 2,380 ކޭސް ފެނިފައިވާއިރު، މީގެ ސަބަބުން 10 މީހަކު މަރުވެފައިވާކަމަށް އެ ރިޕޯޓުތަކުން ދައްކައެވެ.

އެފްރިކާ ސީޑީސީގެ ޑިރެކްޓަރ ޖެނެރަލް ޖީން ކަސޭޔާ ބުރާސްފަތި ދުވަހުގެ ނޫސްވެރިންނާ ވާހަކަދައްކަވަމުން ވިދާޅުވެފައިވަނީ ކޮލެރާއަކީ އެގައުމުގައި އަދިވެސް ވަރަށް ބޮޑު މައްސަލައެއްކަމާއި ކޮންމެ އަހަރަކުވެސް އިތުރު ކޭސްތައް ފެންނަމުންދާކަމަށެވެ.

ދުނިޔޭގެ ސިއްޙީ ޖަމްޢިއްޔާތަކުން އެފްރިކާގެ ޤައުމުތަކަށް ކޮލެރާގެ ބަލިމަޑުކަން ކޮންޓްރޯލްކުރުމަށް އެކިގޮތްގޮތުން އެހީތެރިކަން ފޯރުކޮށްދެމުންދެވެ. އެގޮތުން ވެކްސިން ފޯރުކޮށްދިނުމާއި، ސާފު ބޯފެން ލިބޭނެ މަގު ތަނަވަސްކޮށްދިނުމާއި، ސިއްޙީ ހޭލުންތެރިކަން އިތުރުކުރުމުގެ ޕްރޮގްރާމްތައް ވެސް ހިންގަމުންދެއެވެ.

ކޮލެރާއަކީ ވިބްރިއޯ ކޮލެރޭ ކިޔާ ބެކްޓީރިއާ އަކުން ޖެހޭ ބައްޔެކެވެ. އާންމުކޮށް މި ބަލި ފެތުރެނީ ތަޣައްޔަރުވެފައިވާ ފެން ހަށިގަނޑުގެ އެތެރެއަށް ދިޔުމުންނެވެ.

މި ބަލި ޖެހުމުން ގަދައަށް ހުން އައުމާއި، ބޭރަށްހިންގުން އަދި ޑީހައިޑްރޭޝަން ނުވަތަ ހަށިގަނޑުން ފެން މަދުވުމުގެ ނުރައްކަލާއި ކުރިމަތިވެއެވެ. އަދި އަވަހަށް ފަރުވާ ނުލިބިއްޖެނަމަ، ގަޑިއިރުތަކެއްގެ ތެރޭގައި ވެސް ބަލިން މަރުވުމުގެ ފުރުޞަތު ވަރަށް ބޮޑެވެ. މި ބައްޔަކީ ގައިންގަޔަށް އަރާ ބައްޔެއް ނޫނެެވެ. އެހެންކަމުން މި ބަލި ޖެހިފައިވާ މީހަކާ ބައްދަލުވުމަކީ އާންމު ގޮތެއްގައި ނުރައްކަލެއް ނޫނެވެ.

އެފްރިކާގެ ގިނަ ޤައުމުތަކުގައި ސާފު ބޯފެން ލިބުމުގެ ދަތިކަމާއި، އެކަށީގެންވާ ނަރުދަމާ ނިޒާމެއް ނެތުމާއި، ސިއްޙީ ޚިދުމަތްތައް ފޯރުކޮށްދިނުމުގައި ހުރި ގޮންޖެހުންތަކުގެ ސަބަބުން ކޮލެރާ ފަދަ ބަލިތައް ފެތުރުމަށް ވަރަށް ބޮޑަށް މަގުފަހިވެއެވެ. އަދިއެގައުމުގެ މޫސުމަށް އަންނަ ބަދަލުތަކާއި ތަފާތު ޤުދުރަތީ ކާރިސާތަކުގެ ސަބަބުން ވެސް މި ހާލަތު އިތުރަށް ގޯސްވަމުންދެއެވެ.