ނިޔާވި ދެމައިން ދިޔައީ ޗުއްޓީ ދަތުރެއްގައި މާލެދާން!
ހދ.ނޮޅިވަރަމްފަރުން ފުރައިގެން އެ އަތޮޅު ހަނިމާދޫއަށް ދަތުރުކުރަނިކޮށް ލޯންޗެއް ބަންޑުން ޖަހާލި ހާދިސާގައި ނިޔާވި ދެމައިން ދަތުރުކުރަމުންދިޔައީ ޗުއްޓީ ދަތުރެއްގައި މާލެއަށް ކަމަށް އެނގިއްޖެއެވެ.
ވޮއިސްއަށް އެނގިފައިވާ ގޮތުގައި މި ހާދިސާގައި ނިޔާވި ގުރައިޝާ އަބްދުﷲ އާއި އޭނާގެ އަންހެން ދަރިފުޅު އީރާ ހަނިމާދޫއަށް ދަތުރުކުރަމުންދިޔައީ ޗުއްޓީ ދަތުރެއްގައި މާލެއަށް ދިއުމަށެވެ. އީރާގެ ބައްޕައަކީ މާލޭގައި ވަޒީފާ އަދާކުރަމުންދާ ފަރާތެއް ކަމަށްވެއެވެ.
މި ހާދިސާގައި ނިޔާވި ނޮޅިވަރަމްފަރު ސްކޫލްގެ ޓީޗަރ ހުސައިން އަބްދުﷲ އާއި އޭނާގެ އަންހެނުން ކަމުގައިވާ މަރިޔަމް މަނިކެ އަކީ ގުރައިޝާގެ މަންމައާއި ބައްޕައެވެ. މި ދެމަފިރިން ހަނިމާދޫއަށް ގޮސްފައިވަނީ އީރާއާއި ގުރައިޝާ ފުރުވާލުމަށެވެ.
އެމްއެންޑީއެފުން މައުލޫމާތު ދޭގޮތުގައި މި ހާދިސާ ހިނގާފައިވަނީ އެ ލޯންޗް ކޮޅިގަނޑެއްގައި ޖެހިގެންނެވެ.
މި ލޯންޗުން ދިހަ މީހަކު ދަތުރުކޮށްފައިވާއިރު، އޭގެ ތެެރެއިން ފަސް މީހަކު ވަނީ ނިޔާވެފައެވެ. މި މީހުންގެ ޖަނާޒާތައް ހދ.ހަނިމާދޫގައި ބޭއްވުމުގެ މަސައްކަތް ދަނީ ކުރަމުންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
