މެއި މަހު އެކަނިވެސް ނުކުޅެދުންތެރިކަން ހުންނަ މީހުންނަށް އެހީގެ ގޮތުގައި 50 މިލިއަނަށްވުރެ ގިނަ ރުފިޔާ

މެއި މަހު އެކަނިވެސް ނުކުޅެދުންތެރިކަން ހުންނަ މީހުންނަށް މާލީ އެހީގެ ގޮތުގައި 50 މިލިއަނަށްވުރެ ގިނަ ރުފިޔާ ހޭދަކޮށްފައިވާ ކަމަށް ތަފާސް ހިސާބުތަކުން ދައްކައިފިއެވެ.

އެންސްޕާއިން މިއަދު އާއްމު ކުރި ތަފާސް ހިސާބުތަކުން އެނގޭ ގޮތުން، އެ އެޖެންސީގެ ނުކުޅެދުންތެރިކަން ހުންނަ މީހުންގެ ދަފްތަރުގައި 14،308 މީހުން ވަނީ ރެޖިސްޓާ ކޮށްފައެވެ. އޭގެ ތެރޭގައި އަލަށް ރެޖިސްޓާ ކުރެވުނު 156 މީހުން ހިމެނެއެވެ.

ދަފްތަރުގައި ރެޖިސްޓާ ކޮށްފައިވާ މީހުންގެ ތެރެއިން 14،144 މީހުންނަށް މެއި މަހުގައި މާލީ އެހީ ފޯރުކޮށްދީފައުވާއިރު، އެމީހުންނަށް މާލީ އެހީގެ ގޮތުގައި، 50،768،000 ރުފިޔާ ހޭދަކޮށްފައިވާ ކަމަށް ތަފާސް ހިސާބުތަކުން އެނގެ އެވެ.

މީގެ އިތުރުން ފަޤީރު ހާލަތުގައި ދިރިއުޅޭ މައިންބަފައިންގެ އެހީތެރިކަމެއް ނެތި އެހެން މީހަަކު ބަލަހައްޓާ ކުދިންނަށާއި އެކުދިން ބަލަހައްޓާ ފަރާތަކަށް މާލީ އެހީގެ ގޮތުގައި 177،500 ރުފިޔާ ހޭދަކޮށްފައިވާއިރު، މާލީ އެހީ ލިބޭ 93 ބެލެނިވެރިއަކާއި 131 ކުދިން ތިބި ކަމަށް ތަފާސް ހިސާބުތަކުން އެނގެއެވެ.

ދިވެހިރާއްޖޭގެ އާބާދީގެ 7 އިންސަތައަކީ ނުކުޅެދުންތެރިކަން ހުންނަ ފަރާތްތައް ކަމަށް ތަފާސް ހިސާބުތަކުން އެނގޭ ކަމަށް އިޖުތިމާޢީ ތަރައްޤީއާ ބެހޭ ވުޒާރާއިން ދާދިފަހުން ވަނީ ބުނެފައެވެ.

ޔޫއެންގެ ގްލޯބަލް ޑިސްއެބިލިޓީ ފަންޑްސް އިން ރާއްޖޭގެ ނުކުޅެދުންތެރިކަން ހުންނަ މީހުންގެ ޙާލަތާއި ގުޅޭގޮތުން އެކުލަވާލައި ނެރެފައިވާ ރިޕޯޓްގައި، 2022 ވަނަ އަހަރުގެ ބޯހިމެނުމުގެ ތަފާސްހިސާބުތަކާ ހަވާލާދީ ބުނެފައިވާ ގޮތުން، ރާއްޖޭގެ ނުކުޅެދުންތެރިކަން ހުންނަ މީހުންގެ އަދަދު 24،401 އަށް އަރައެވެ.

އެހެންކަމުން ރާއްޖޭގެ އާބާދީގެ، ކޮންމެ 15 މީހުންގެ ތެރެއިން އެކަކީ ނުކުޅެދުންތެރިކަން ހުންނަ މީހެކެވެ.

ރާއްޖޭގައި ތިބި ނުކުޅެދުންތެރިކަން ހުންނަ މީހުންގެ އަދަދު 24،000 އަށް އެރި ނަމަވެސް އޭގެ ތެރެއިން ރެޖިސްޓާ ކޮށްފައި ވަނީ 14،000 އެއްހާ މީހުން ކަމަށްވެސް އެ ރިޕޯޓްގައި ބުނެފައިވެއެވެ.