އއ.އަތޮޅަށް ކުރެއްވި ދަތުރުފުޅަށްފަހު ރައީސް ޑރ.މުއިއްޒު މާލެ ވަޑައިގަންނަވައިފި

އއ.އަތޮޅުގެ ރަށްތަކަށް ކުރެއްވި ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު މާލެ ވަދައިގަންނަވައިފިއެވެ.

އއ.އަތޮޅުގެ ރަށްތަކަށް ކުރެއްވި ދަތުރުފުޅު ރައީސް ފެއްޓެވީ މިދިޔަ އަންގާރަދުވަހުއެވެ. މި ދަތުރުފުޅުގައި ރައީސް ވަނީ އއ އަތޮޅުގެ 8 ރަށަކަށް ޒިޔާރަތްކުރައްވާފައެވެ. އޭގެ ތެރޭގައި ހިމެނެނީ، މާޅޮސް، ފެރިދޫ، ހިމަންދޫ، ބޮޑުފުޅަދޫ، މަތިވެރީ، ރަސްދޫ، ތޮއްޑޫ އަދި އުކުޅަހެވެ. އެ ރަށްރަށަށް ވަޑައިގެން ރައީސް ވަނީ ބައެއް ރަށްރަށުގެ މަޝްރޫޢުތައް ފައްޓަވައިދެއްވައި، ބައެއް ރަށްރަށުގައި ނިމިފައިވާ މަޝްރޫޢުތައް ފައްޓަވައިދެއްވާފައެވެ. މީގެ އިތުރުން ރައީސް ވަނީ ރަށުގެ މުއައްސަސާތަކާއި ރައްޔިތުންނާއި ބައްދަލުކުރައްވާފައެވެ.

ރައީސްގެ މި ދަތުރުފުޅުގައި ސަރުކާރުގެ އަސާސީ ހިދުމަތްތަކާއި، އުމްރާނީ މަޝްރޫޢުތައް ހިންގާ ކުންފުނިތަކުގެ ވެރިން ބައިވެރިވެ ވަޑައިގެންނެވިއިރު، އެފަރާތްތަކުން ވަނީ ރަށްރަށުގެ އެ މައުލޫމާތުތައް ހޯއްދަވައި ދެން ކުރަންޖެހޭ ކަންކަމާ ގުޅޭގޮތުން ރަށުގެ ކަމާބެހޭ ފަރާތްތަކާއެކު ވާހަކަތައް ކުރިއަށްގެންގޮސްފައެވެ.

މީގެ އިތުރުން ރައީސްގެ ދަތުރުފުޅާ ގުޅިގެން އޭޓީއެމްގެ ހިދުމަތް ނެތް ރަށްރަށުގައި އެ ހިދުމަތް ގާއިމްކޮށް ބައެއް ރަށްރަށުގައި ވަނީ ޑޮލަރު އޭޓީއެމްތައް ބަހައްޓައި ހިދުމަތްދޭން ފަށާފައެވެ.

އއ އަތޮޅުގެ ކުރިން ރައީސް ވަނީ ބ.އަތޮޅުގެ މީހުން ދިރިއުޅޭ ހުރިހާ ރަށަކަށް ވަޑައިގެންފައެވެ.